વડોદરા / દેશનું 'રખોપું' કરતા જવાનનો પરિવાર 3 દિવસથી ભૂખ્યો, ચોતરફ પાણી છતાં મદદે પહોંચ્યું VTV

આપણી સેના પર થાય છે ગર્વ
 

વડોદરામાં વરસાદને કારણે વિકટ બનેલી સ્થિતિ વચ્ચે તમે સેનાના જવાનોને સેવા કરતા જોયા હશે. જવાનો રાત દિવસ એક કરીને લોકોને મુશ્કેલીમાંથી બહાર કાઢતા હતા. જવાનો પોતાની ગાડીમાં બેસાડી લોકોને તેમના યોગ્ય સ્થાને પહોંચાડતા હતા. તો પાણી ફસાઈ ગયેલા વાહનોને ટોઈંગ કરી બહાર કાઢતા હતા. આ એવા દ્રશ્યો હતા કે જેને જોઈ તમને આપણી સેના પર ગર્વ થાય. અને ગર્વ થવું જ જોઈએ. કારણ કે દેશના વીર જવાનો ન માત્ર સરહદ પર પરંતુ દેશની અંદર પણ જ્યારે જ્યારે કોઈ મુશ્કેલી આવે ત્યારે આ જવાનો હંમેશા આગળ રહેતા હોય છે. 

દેશના રખોપા કરતા જવાનનો પરિવાર ફસાયો પાણીમાં

પોતે મુશ્કેલીનો સામનો કરે છે અને દેશવાસીઓને સુરક્ષિત રાખે છે. પરંતુ આપણા એ વીર જવાનોનો પરિવાર કેટલો સુરક્ષિત છે તે એક સવાલ છે. કારણ કે જવાનો પરાક્રમ કરે છે ત્યારે આપણે તેની વાહવાહી તો ખુબ કરીએ છીએ. પરંતુ તેના પરિવારની કોઈ સાર સંભાળ નથી લેતું. એ સૈન્યનો જવાન કે જે દેશના રખુપા કરવા માટે સરહદ પર છે. પણ તેનો પરિવાર પાણી વચ્ચે ફસાઈ ગયો હતો. અને એવો ફસાયો હતો કે પરિવારજનોએ 3 દિવસ સુધી અન્નનો એક દાણો પણ માંઢામાં મુક્યો ન હતો.

તંત્રએ ન કરી મદદ

ધોધમાર વરસાદ બાદ પેદા થયેલી સ્થિતિ વચ્ચે આ પરિવાર એવો ફસાઈ ગયો હતો કે તેને પાડોશીના ઘરે રાત વાતો કરવાનો વારો આવ્યો. .કારણ કે ઘરમાં તો કમરથી પણ ઉપર સુધી પાણી ભરાયેલા હતા. આ પરિવારે મદદની અનેક ગુહાર લગાવી. તંત્રના અધિકારીઓનો સંપર્ક કર્યો. પણ કોઈ મદદે ન આવ્યું. બધા એ માત્ર આશ્વાસનના બે ત્રણ શબ્દો રેલાવી દીધા. 

VTV પહોંચ્યું વ્હારે

પરંતુ આખરે આ પરિવારજનો ગુગલ પર શોધીને વીટીવીનો સંપર્ક કરે છે અને મદદની માંગ કરે છે. ત્યારે વીટીવીની ટીમ એક ક્ષણનો પણ વિરામ કર્યા વિના. સીધી જ આ પરિવારની મદદ માટે પહોંચી જાય છે. અમારી ટીમને એ ખબર હતી કે આર્મી જવાનના આ પરિવારે છેલ્લા 3 દિવસથી અન્નનો દાણો પણ મોઢામાં નથી મુક્યો. તો અમે સૌથી પહેલા તે પરિવાર માટે થોડું ઘણું ખાવાનું અને પાણીની બોટલ લઈ ત્યાં પહોંચીએ છીએ.

અચાનક ચાઈના બોર્ડર પર સ્થિત જવાનનો આવ્યો ફોન

જ્યારે અમારી ટીમ તે પરિવાર પાસે પહોંચે છે ત્યારે પરિવારમાં જાણે એક નવી ઊર્જા આવી જાય છે. તેમને લાગે છે કે કોઈ તો મદદે આવ્યું. અમે પરિવાર પાસે પહોંચી ગયા હતા ત્યારે બરાબર તે સમયે આ પરિવારના સભ્ય અને દેશ માટે ચાઈના બોર્ડર પર સ્થિત સ્વપનિલ પવારનો ફોન આવે છે. એ સ્વપનિલ કે જેના પરિવારની મદદ અમે પહોંચ્યા હતા. અમારા સંવાદદાતાએ સ્વપનિલ સાથે વાતચીત કરી. 

જવાનની માં રડી પડી

અમે દેશની રક્ષા કરતા સ્વપનિલને ખાતરી આપી કે તમે દેશની રક્ષા કરો. તમારા પરિવારની રક્ષા માટે વીટીવી છે. આ ખાતરીથી જવાનનો હાંશકારો થયો. પરંતુ જે ત્રણ આ પરિવારે વિતાવ્યા હતા. તે ખરેખર ખુબ જ કષ્ટ દાયક અને પીડાદાયક હતા. જવાન સ્વપનિલના માતાએ જ્યારે વીટીવી સમક્ષ પોતાની આપવીતિ જણાવી ત્યારે તેમના આંસુ સરી પડ્યા હતા. 

વડોદરામાં રહેતો આ પવાર પરિવાર દેશભક્ત પરિવાર છે. પુત્ર સ્વપનિલ આર્મી છે. તો પિતા પણ આર્મીમાં હતા અને દીકરી પણ પોલીસમાં ફરજ બજાવે છે. જવાનની પત્નીએ પણ વીટીવી સમક્ષ પોતાની વેદન વ્યક્ત કરી હતી. 

કોઇએ પરિવારના હાલચાલ પણ ન પૂછ્યા મળ્યા માત્ર આશ્વાસનના બે ત્રણ શબ્દો 

આપણે સૈન્યના જવાનોને જોઈ ગર્વ કરીએ છીએ. અને તેમની વાહવાહી કરીએ છીએ. પરંતુ ક્યારેય આપણે તે જવાનોના પરિવાર વિશે નથી વિચારતા. .જવાનના પરિવારના ક્યારેય હાલચાલ નથી પુછતા. સ્વપનિલ પવારનો પરિવાર છેલ્લા 3 દિવસથી ફસાયેલો હતો. પરંતુ કોઈએ તેમના હાલચાલ જાણ્યા નથી. 

સ્થાનિક કોર્પોરેટર, કોઈ અધિકારી કે પછી સરકાર. તમામ લોકો મુકપ્રક્ષેક બનીને જ બેસી રહ્યા હતા. જે આપણા સૌના માટે શરમજનક ઘટના કહેવાય. કારણ કે એક જવાન પોતાનું સર્વસ્વ અર્પણ કરીને મા ભોમની રક્ષા કરવા જતો હોય છે. તે ક્યારેય નથી વિચારતો કે પોતાના પરિવારનું શું થશે. તેના માટે તો દેશ જ સર્વસ્વ હોય છે. પરંતુ તે જ જવાનના પરિવાર પર જ્યારે સંકટ આવી પડે ત્યારે કેમ કોઈ તેવો વિચાર કરતું નથી ?.