અમંગળવાર / અંતિમસંસ્કારથી પરત આવતી કાર અને ટ્રક વચ્ચે ગમખ્વાર અકસ્માત, છ લોકોના મોતથી પરિવાર પર દુ:ખોનો પહાડ તૂટી પડ્યો

• બિહારમાં ગમખ્વાર અકસ્માત 
• કાર અને ટ્રક વચ્ચે ટક્કરમાં છના મોત 
• અંતિમસંસ્કારથી પરત આવી રહ્યા હતા લોકો 

અમંગળ સવાર

મંગળવારની સવારમાં બિહારમાંથી અમંગલ સમાચાર આવી રહ્યા છે. જમુઈ જિલ્લામાં એક મોટો અકસ્માત થયો છે જેમા સિકંદરાની નજીક એક ટ્રક અને સુમો વિક્ટા વચ્ચે જોરદાર ટક્કર થઈ હતી જેમા કારમાં સવાર છ લોકોના મોત થયા છે જ્યારે ચાર લોકો ગંભીર રૂપે ઈજાગ્રસ્ત થયા છે. જાણકારી મળતા જ પોલીસ સહિતનો કાફલો ઘટનાસ્થળે પહોંચી ગયો છે અને ઘાયલોનાં ઈલાજનું ધ્યાન રાખવામાં આવી રહ્યું છે, 

કાળનો કોળિયો બન્યા છ લોકો 

સ્થાનિક મીડિયા અહેવાલો અનુસાર સિકંદરાનાં મુખ્ય રસ્તા પર પીપરા ગામની નજીક આ ગમખ્વાર અકસ્માત થયો જેમા સામે આવ્યું છે કે બધા જ લોકો અંતિમ સંસ્કાર માટે ખેરાથી પટણા ગયા હતા અને પરત ફરતી વખતે જ કાળનો કોળિયો બની ગયા હતા. 

કારના ફૂરચાં ઊડી ગયા 

ટ્રક અને કાર વચ્ચે સામસામે જ જોરદાર ટક્કર થઈ અને કારનાં ફૂરચે ફૂરચા ઊડી ગયા હતા, ટક્કર એવી ભયંકર હતી કે છ લોકોના ઘટનાસ્થળ પર જ મોત થઈ ગયા હતા જ્યારે ચાર લોકોને નજીકની હોસ્પિટલમાં ખસેડવામાં આવ્યા હતા. અકસ્માત થયા બાદ આસપાસનાં લોકો દોડી આવ્યા હતા અને પોલીસને ફોન કરવામાં આવ્યો હતો. મૃતકોનાં પરિવારને સૂચના આપી દેવામાં આવી છે.