શહેરની ફતેહવાડી કેનાલ પાસે રવિવારે મોડી રાત્રે કચ્છના એક યુવકના ગળા પર છરી મૂકીને એક મહિલા સહિત ત્રણ લોકોએ લૂંટી લેવાનો કિસ્સો સામે આવ્યો છે. યુવક શટલ રિક્ષામાં બેસીને સરખેજ જતો હતો ત્યારે પેસેન્જરના સ્વાંગમાં બેઠેલી મહિલા અને એક યુવકે તેને લૂંટી લીધો હતો.
ભૂજના ભારતનગરમાં રહેતા અને કચ્છમાં એક ડ્રિન્કિંગ વોટર કંપનીમાં ગાડી ચલાવતા રપ વર્ષીય સાગર મહેન્દ્રભાઇ પારેખે વેજલપુર પોલીસ સ્ટેશનમાં લૂંટની ફરિયાદ કરી છે.
બે દિવસ પહેલા સાગર અમદાવાદના પાલડી વિસ્તારમાં રહેતી તેની માસિયાઇ બહેનને મૂકવા માટે ભૂજથી આવ્યો હતો. ત્યાર બાદ તેના મિત્રને જુહાપુરા મળવા ગયો હતો. જ્યાંછી કચ્છ જવાનું હોવાથી તે શટલ રિક્ષામાં બેઠો હતો. જ્યાં પહેલેથી એક મહિલા તથા એક યુવક બેઠા હતાં. રિક્ષા સરખેજ જવાની હોવાથી ડ્રાઇવર તેને ફતેહવાડી તરફ લઇ ગયો હતો જેથી સાગરે તેને પૂછતાં એક પેસેન્જરને ઉતારવાનો હોવાનું કહ્યું હતું.
ત્યારબાદ ફતેહવાડી કેનાલ પાસે અવાવરું જગ્યા પર ડ્રાઇવરે રિક્ષાને ઊભી રાખી હતી અને સાગરને બહાર કાઢ્યો હતો. મહિલા સહિત યુવકે સાગરને પકડી રાખ્યો હતો અને ડ્રાઇવરે તેના ખીસામાંથી ધારદાર છરી કાઢી હતી. ડ્રાઇવરે છરી સાગરના ગળા પર મૂકી હતી અને તારી પાસે જે કાંઇ હોય તે આપી દે તેવી ધમકી આપી હતી. રિક્ષા ડ્રાઇવરે તેના ખીસામાંથી પર્સ કાઢવાની કોશિશ કરતાં સાગરે તેનો વિરોધ કર્યો હતો. જેથી તેના પર છરી હુલાવી દીધી હતી. સાગર ખસી જતાં છરી તેના હાથના અંગૂઠા પર વાગી હતી.
ગભરાઇ ગયેલા સાગરે પાકિટ આપી દીધું હતું. જેમાં ૫૦૦ રૂપિયા રોક્ડા હતા. જ્યારે એક ડેબિટ કાર્ડ હતું. લૂંટારુ ટોળકીએ ડેબિટ કાર્ડનો પિન નંબર માંગ્યો હતો જોકે સાગરે તે આપવાનો ઇન્કાર કરતાં તેને મૂઢ માર માર્યો હતો. સાગરે ડેબિટ કાર્ડનો પિન આપતાં એક યુવક એટીએમમાં રૂપિયા ઉપાડવા માટે ગયો હતો. થોડાક સમય પછી સાગરના મોબાઇલમાં ૧૯ હજાર રૂપિયા ડેબિટ થયા હોવાનો મેસેજ આવ્યો હતો. બેન્કમાંથી રૂપિયા ઉપાડી લીધા બાદ ત્રણ જણાએ મોબાઇલ ફોન પણ લૂંટી લીધો હતો અને ચાલુ રિક્ષામાં તેને ધક્કો મારીને નાસી છુટ્યા હતા. સાગરે આ મામલે વેજલપુર પોલીસ સ્ટેશનમાં ફરિયાદ કરી છે.