દક્ષિણ કાશ્મીરના શોપિયાં જિલ્લાના ઇમામ સાહબ ગામમાં સુરક્ષાદળ અને આતંકી વચ્ચે અથડામણ જોવા મળી રહી છે. જેમાં સેનાએ એક આતંકીને ઠાર માર્યો છે. બધા આતંકીઓ ત્રણ માળની બિલ્ડિંગમાં છુપાયેલા છે જ્યાંથી તેઓ સતત સુરક્ષાદળ પર ફાયરિંગ કરી રહ્યાં છે. સેના અને આતંકીઓ વચ્ચે અથડામણ હજુ પણ ચાલી રહી છે.
સુરક્ષાદળને ગુપ્ત જાણકારી મળી હતી કે આ ગામમાં આતંકીઓ છુપાયેલા છે. ગુરૂવાર મોડી રાતથી જ સેનાએ આ ગામનો ઘેરાવ કર્યો હતો. જે જગ્યા પર આતંકીઓ છુપાયેલા છે તે જગ્યા પર જ સેનાએ ફાયરિંગ કર્યું. જેને લઇને આતંકીઓએ સેના પર ફાયરિંગ કર્યું છે. સેના અને આતંકીઓ વચ્ચે હાલમાં અથડામણ ચાલુ છે.
ઉલ્લેખનીય છે કે 25 એપ્રિલના રોજ દક્ષિણ કશ્મીરના અનંતનાગ જિલ્લાના બિજબેહારા વિસ્તારમાં સેના અને આતંકીઓ વચ્ચે અથડામણ જોવા મળી હતી જેમાં બે આતંકીઓ ઠાર મરાયાં હતા. સેનાની 3 આરઆર અને એસઓજીની સંયુક્ત ટીમ દ્વારા બંગદર વિસ્તારમાં સર્ચ ઓપરેશન હાથ ધરાયું હતું.
જ્યારે આ અગાઉ 20 એપ્રિલના રોજ પણ સેના અને આતંકીઓ વચ્ચે અથડામણ થઇ હતી. જેમાં સોપારના વાટરગામમાં એક આતંકી ઠાર મરાયો હતો. જ્યારે 13 એપ્રિલના રોજ શોપિયામાં સેનાએ બે આતંકીઓ ઠાર માર્યા હતા. ઉલ્લેખનીય છે કે સેના દ્વારા ઘાટી વિસ્તારમાં ઓપરેશન ઓલઆઉટ ચલાવામાં આવી રહ્યું છે.