લાચારી / પેટ્રોલના વધતાં ભાવ પર ગડકરીનું ચોંકાવનારું નિવેદન, જાણો કેમ કહ્યું 'અમે કશું ન કરી શકીએ!'

• પેટ્રોલ ડીઝલના ભાવમાં સતત વધારો
• કેન્દ્રીય મંત્રીનું ચોંકાવનારુ નિવેદન
• 'ભારત સરકારના કંટ્રોલ બહાર છે સ્થિતિ'

એક તરફ લોકો મોંઘવારીથી ત્રાહિમામ પોકારી ઉઠ્યા છે. તેમાં પણ પેટ્રોલ ડીઝલના વધતા ભાવે સામાન્ય જનતાનું બજેટ ખોરવી નાંખ્યું છે. ટ્રાન્સપોર્ટેશનનો ખર્ચ વધતા હવે તમામ ચીજ વસ્તુઓના ભાવ આસમાને પહોંચ્યા છે. જો કે હજી રોજબરોજ પેટ્રોલ ડીઝલના ભાવ તો બિલ્લી પગે વધી જ રહ્યા છે. તેવામાં વધતા ભાવને લઇને કેન્દ્રીય મંત્રી નીતિન ગડકરીએ ચોંકાવનારુ નિવેદન આપ્યું.

ભાવ વધારો યોગ્ય- નીતિન ગડકરી

કેન્દ્રીય મંત્રી નીતિન ગડકરીએ છેલ્લા ચાર દિવસમાં ત્રણ વખત ઈંધણના ભાવ વધારાને યોગ્ય ઠેરવ્યો છે. તેમણે શુક્રવારે કહ્યું કે રશિયા અને યુક્રેન વચ્ચે ચાલી રહેલા યુદ્ધને કારણે આંતરરાષ્ટ્રીય બજારમાં તેલની કિંમતો વધી છે. આ સ્થિતિ ભારત સરકારના નિયંત્રણની બહાર છે.

અમે કંઇ કરી શકીએ તેમ નથી- નીતન ગડકરી

રોડ ટ્રાન્સપોર્ટ અને હાઈવે મંત્રી ગડકરીએ એક ખાનગી ન્યૂઝ ચેનલના કાર્યક્રમમાં પેટ્રોલ ડીઝલ અંગે નિવેદન આપતા જણાવ્યું હતુ કે 80 ટકા તેલ ભારતમાં આયાત કરવામાં આવે છે. રુસો-યુક્રેન યુદ્ધ વચ્ચે આંતરરાષ્ટ્રીય બજારમાં તેલના ભાવ વધી ગયા છે અને અમે તેના વિશે કંઈ કરી શકીએ તેમ નથી.

ઇંધણ મામલે આત્મનિર્ભર બનવાની જરુર

કેન્દ્રીય મંત્રીએ કહ્યું કે અમે 2004 થી ભારતને આત્મનિર્ભર બનાવવા પર ભાર આપી રહ્યા છીએ, "જેની સાથે આપણે સ્વદેશી ઉર્જા ઉત્પાદન ક્ષમતાઓ વિકસાવવાની જરૂરિયાત પર ભાર મૂકીને  આપણે જાતે ઇંધણ  બનાવવાની જરૂર છે".

છેલ્લા 4 દિવસથી ઇંધણના ભાવમાં વધારો

શુક્રવારે પેટ્રોલ અને ડીઝલના ભાવમાં લિટર દીઠ 80 પૈસાનો વધારો કરવામાં આવ્યો હતો, જે ચાર દિવસમાં ત્રીજો વધારો છે. આજે શનિવારે ફરી પેટ્રોલ અને ડીઝલના ભાવમાં પ્રતિ લીટર 80 પૈસાનો વધારો કરવામાં આવ્યો છે. એક જ અઠવાડિયામાં પેટ્રોલ અને ડીઝલમાં 3.20 રુપિયા પ્રતિ લિટર વધારવામાં આવ્યા. મહત્વનું છે કે પાંચ રાજ્યોની વિધાનસભા ચૂંટણીને કારણે 137 દિવસ સુધી ઇંધણના ભાવમાં કોઇ બદલાવ કરવામાં આવ્યો ન હતો જે દરમિયાન ક્રૂડ ઓઇલના ભાવમાં 45 ટકાનો વધારો થવા પામ્યો હતો.