શિક્ષણ જગત શર્મસાર / ટ્યુશન ટીચરોનો ત્રાસ: વડોદરામાં 13 વર્ષની દીકરી સાથે અડપલાં કરનારો ઝડપાયો, સુરતમાં પણ ગંભીર કેસ

• વડોદરામાં ટ્યુશન ક્લાસીસ ચલાવતા લંપટ શિક્ષકની કાળી કરતૂત
• 13 વર્ષની સગીરા સાથે શિક્ષકે કર્યા શારીરિક અડપલા
• સમગ્ર મામલો પહોંચ્યો વારસીયા પોલીસ મથકે
• પોલીસે લંપટ શિક્ષક સામે ફરિયાદ નોંધી કરી ધરપકડ

સમાજમાં માં પછી જો કોઈ બીજા ગુરુ હોય તો એ શિક્ષક છે. પરંતુ આજકાલ અમુક શિક્ષકો અભ્યાસ કરાવવાને બદલે લંપટ લીલાઓ કરતા હોવાનું જોવા મળે છે. આવું જ બન્યુ છે વડોદરામાં. શહેરના વારસીયા વિસ્તારમાં આવેલા પ્રાર્થના ફ્લેટમાં ટ્યુશન ક્લાસ ચલાવતા શિક્ષકે 13 વર્ષની સગારી સાથે શારીરિક અડપલા કર્યા હતા. જે બાદ સગીરાએ આ ઘટનાની જાણ પોતાના વાલીને કરતા આ મામલો પોલીસ મથકે પહોંચ્યા હતો.

એકલતાનો લાભ ઉઠાવીને લંપટ શિક્ષકે કર્યા અડપલા
સગીરાના પરિવારજનોએ નોંધાવેલી ફરિયાદ અનુસાર, 5 જાન્યુઆરીએ બપોરે 3 વાગ્યે તેમની પુત્રી ઝુલેલાલ મંદિર પાસે ઉદય મોહનરાવ ભાલેરાવ (ઉં.વ 61)ને ત્યાં ટયુશને થોડી વહેલાં ગઇ હતી. અન્ય વિદ્યાર્થી ન હતા. એકલતાનો લાભ ઉઠાવીને લંપટ શિક્ષકે સગીરા સાથે અંગ છેડતી કરી હતી. શિક્ષકે કરેલા અડપલાં અને જાતીય સતામણીથી સગીરા ગભરાઈ ગઇ હતી.

સમગ્ર મામલો વારસીયા પોલીસ મથકે પહોંચ્યો 
જે બાદ સગીરાએ માતા અને દાદીને પોતાની સાથે થયેલી ગેરવર્તણુકની જાણ કરતા સમગ્ર મામલો વારસીયાપોલીસ મથકે પહોંચ્યો હતો અને લંપટ શિક્ષક ઉદય મોહનરાવ ભાલેરાવ વિરુદ્ધ ફરિયાદ નોંધાવી હતી. ઘટનાની જાણ થતાં DCP ઝોન-4 પન્ના મોમાયાએ વારસીયા પોલીસને શિક્ષક વિરુદ્ધ કડક કાર્યવાહી કરવાની સૂચના આપી હતી. જે બાદ પોલીસે લંપટ શિક્ષક સામે પોક્સો સહિતની કલમો લગાવી તેની ધરપકડ કરી છે 

સુરતમાંથી હેવાન શિક્ષકની માનસિક વિકૃતતા આવી સામે
સુરતમાં શિક્ષકે ટ્યૂશનમાં ભણતા માત્ર આઠ વર્ષના વિદ્યાર્થી પર સૃષ્ટી વિરુદ્ધનું કૃત્ય આચર્યુ છે. ડિંડોલી પોલીસે આરોપી શિક્ષક ગણેશ આહિરેની ધરપકડ કરીને તપાસ શરૂ કરી છે. સુરતમાં ટ્યૂશન કલાસિસમાં બનેલી સમગ્ર ઘટનાની વાત કરીએ તો ડિંડોલી વિસ્તારમાં ગણેશ આહિરેનું ટ્યૂશન ક્લાસિસ આવેલુ છે. આ ટ્યૂશન ક્લાસમાં વિદ્યાર્થીઓ આસપાસમાંથી વિદ્યાર્થી અહીં અભ્યાસ કરવા આવે છે. ત્યારે શુક્રવાર સાંજે આ હેવાનની માનસિક વિકૃતતા સામે આવી છે. 

આરોપી શિક્ષકની ધરપકડ
ટ્યૂશનમાં અભ્યાસ કરતા એક વિદ્યાર્થીને આ હેવાન શિક્ષક વોશરૂમમાં લઈ ગયો હતો અને વિદ્યાર્થી પર સૃષ્ટી વિરુદ્ધનું કૃત્ય આચર્યું હતું. આ ઘટનાની જાણ થતા વિદ્યાર્થીના માતા-પિતાએ ડિંડોલી પોલીસ સ્ટેશનમાં ફરિયાદ નોંધાવી હતી.  ડિંડોલી પોલીસે આરોપી શિક્ષક ગણેશ આહિરેની ધરપકડ કરીને તપાસ શરૂ કરી હતી. જ્યારે વિદ્યાર્થીને સારવાર અર્થે સ્મિમેર હોસ્પિટલમાં દાખલ કરવામાં આવ્યો હતો.