ફરી આવશે / PM મોદીના બર્થ-ડે પર ચિત્તા અભયારણ્ય માટે તડામાર તૈયારી, દાયકાઓ બાદ ફરી ભારત આવશે આ પ્રાણી

• વડાપ્રધાનના જન્મદિવસે ભારતમાં આવશે ચિત્તા
• મધ્યપ્રદેશના કુનો વન્યજીવન અભયારણ્યમાં તૈયારીઓ
• મુખ્યમંત્રી શિવરાજસિંહે આપ્યું નરેન્દ્ર મોદીને આમંત્રણ

મધ્યપ્રદેશના શ્યોપુરમાં આવેલા કુનો વન્યજીવન અભયારણ્યમાં ટૂંક સમયમાં જ ચિત્તાની એન્ટ્રી થઇ રહી છે. નામિબિયા અને દક્ષિણ આફ્રિકાથી લાવવામાં આવી રહેલા 8 જેટલા ચિત્તાને અહીં રાખવા માટે તૈયાર છે. વન્યજીવ અભ્યારણ્યના અધિકારીઓ આ માટે રણનીતિક તૈયારીઓમાં લાગી ગયા છે. ખુદ મુખ્યમંત્રી શિવરાજસિંહ ચૌહાણે ગુરુવારે ચીતા ટ્રાન્સલોકેશન પ્રોજેક્ટની સમીક્ષા કરી હતી. તેમણે અધિકારીઓને કામમાં ઝડપ લાવવાની સૂચના પણ આપી હતી. આ સાથે જ સીએમ શિવરાજ વડાપ્રધાન નરેન્દ્ર મોદી સાથે કુનોમાં ચિત્તાને રિલીઝ કરવાનો પ્રોજેક્ટ શરૂ કરવા માંગે છે.

PM મોદીના જન્મદિવસે શરૂ થશે ચિત્તા પ્રોજેક્ટ!
મુખ્યમંત્રી શિવરાજસિંહ ચૌહાણ પીએમ મોદીને કુનો વન્યપ્રાણી અભયારણ્યમાં ચિત્તા ટ્રાન્સલોકેશન પ્રોજેક્ટના ઉદ્ઘાટન માટે આમંત્રણ આપવા માંગે છે. સૂત્રોએ જણાવ્યું હતું કે રાજ્ય સરકારને અપેક્ષા છે કે પીએમ મોદી 17 સપ્ટેમ્બરે તેનું ઉદ્ઘાટન કરશે. આ દિવસે વડાપ્રધાનનો જન્મદિવસ પણ છે, તેમની ઉંમર 72 વર્ષની થશે. આ અવસરે મધ્ય પ્રદેશ સરકાર તેમને આમંત્રણ આપવા માંગે છે. મુખ્યમંત્રી કાર્યાલય તરફથી પીએમઓને પત્ર મોકલીને પીએમ મોદીની મુલાકાત માટે અનુકૂળ તારીખની માંગ કરવામાં આવી છે.

મુખ્યમંત્રી લઇ રહ્યા છે તમામ અપડેટ
કુનો અભ્યારણ્યમાં વિદેશથી આવતા ચિત્તાને રાખવાની તૈયારીઓ થઈ રહી છે તેમ છતાં અહીંના દીપડાઓ અધિકારીઓ માટે ચિંતાનું મોટું કારણ બની રહે છે. અધિકારીઓનું કહેવું છે કે ચિત્તાને અહીં લાવવા માટે બધુ બરાબર છે, પરંતુ દીપડા તેમના માર્ગમાં વચ્ચે આવે છે. જ્યાં સુધી આ દીપડાઓને બહાર કાઢવામાં નહીં આવે ત્યાં સુધી ચિત્તાને તેમના માટે બનાવવામાં આવેલા એન્ક્લોઝરમાં લઈ જઈ શકાશે નહીં. આ ચોમાસામાં ભારે વરસાદને કારણે સત્તાધીશોના પ્રયાસોમાં પણ મુશ્કેલીઓ ઉભી કરી છે.

નામીબિયા-આફ્રિકાથી ચિત્તાઓને કુનો પાર્કમાં લાવવામાં આવશે
જણાવવામાં આવી રહ્યું છે કે જે ચિત્તાના વાડા બનાવવામાં આવ્યા છે તેમાં જરૂરી સુરક્ષાનું ધ્યાન રાખવામાં આવ્યું છે. જો કે તેમાં પણ કેટલાક દીપડા ઘુસી ગયા હતા. આ દીપડાઓને બહાર કાઢીને પકડવા માટે, અન્ય સ્થળે લઈ જવા માટે તમામ પ્રયત્નો કરવામાં આવી રહ્યા છે. પાંજરામાં બકરી-બાઈટ અને પગની જાળના પ્રયત્નો કરવામાં આવ્યા હતા પરંતુ બધા વ્યર્થ ગયા. દીપડાઓને વાડામાંથી બહાર કાઢવા માટે બે હાથીઓને પણ લાવવામાં આવ્યા હતા પરંતુ તે કામ કરી શક્યું નહીં. વનવાસીઓએ આવશ્યક સ્થળોએ વન-વે સીડીઓ ઉભી કરી હતી, એવી આશા સાથે કે દીપડાઓ આ વાડ પર ચઢશે, જો કે, હજી પણ ઘણી સમસ્યાઓ ઉભી છે.

બે હેલીપેડ બનાવવામાં આવ્યા
હાલ ચિત્તા માટે 500 હેક્ટરની વાડ બંધ વિસ્તારમાં અનેક જરૂરી પગલાં લેવામાં આવી રહ્યા છે. બે હેલિપેડ બનાવવામાં આવી રહ્યા છે જ્યાંથી ચિત્તા અને વીઆઈપી એક સાથે ઉતરી શકશે. રાજ્યના વન પ્રધાન વિજય શાહ અને બે વરિષ્ઠ આઈએફએસ અધિકારીઓ નામિબિયા અને દક્ષિણ આફ્રિકાની મુલાકાત લઈ રહ્યા છે અને તેઓ ભારત પહોંચતા પહેલા ચિત્તાને જોઈ શકે.

વોલેન્ટિયર રાખવામાં આવશે
મધ્યપ્રદેશના વન વિભાગે પણ તેના કર્મચારીઓને ચિત્તા પ્રોજેક્ટ પોસ્ટિંગ માટે વોલેન્ટિયરને આમંત્રણ આપ્યું છે. વિભાગના વોટ્સએપ ગ્રુપમાં સંદેશ મોકલવામાં આવ્યો છે કે કુનો વાઇલ્ડલાઇફ એરિયામાં ફિલ્ડ ઓફિસર અને સ્ટાફની તાતી જરૂરિયાત છે અને જે લોકો રસ ધરાવતા હોય તેઓ રેન્જ ઓફિસર, ડેપ્યુટી રેન્જર, ફોરેસ્ટરને અરજી કરી શકે છે. તમે મુખ્ય વન્યપ્રાણી વોર્ડનનો પણ સંપર્ક કરી શકો છો. તેમની નિમણૂક વહીવટી આધાર પર થશે. વનના મુખ્ય સચિવે તમામ ડીએફઓને આવા વોલેન્ટિયરની ઓળખ કરવામાં વિશેષ રસ લેવા નિર્દેશ આપ્યો છે.