સાબરકાંઠા / VIDEO : ભાઈ-બહેનના હેત અને શૌર્યના ઇતિહાસની સાતસો વર્ષની પરંપરા રહી અકબંધ, અશ્વદોડ જોવા ઉમટ્યા લોકો

• ભાઈબીજના દિવસે સાબરકાંઠામાં પરંપરાનું નિર્વહન
• ભાઈ-બહેનના હેત અને શૌર્યનો ઇતિહાસ
• અશ્વદોડ જોવા હજારોની જામે છે ભીડ

 સાબરકાંઠાની ધરતી પર સાતસો વર્ષ જૂની એક પરંપરાના નિર્વહનના છે. પોતાની પરંપરા સાચવવા માટે રાઠોડ પરિવારના સભ્યો આજે પણ સાબરકાંઠાના મુડેઠા ગામેથી પેપળું ગામે જ્યારે જાય છે ત્યારે તે પરંપરાને જોવા લાખો લોકો ઉમટી પડે છે. દર વર્ષે બેસતા વર્ષના દિવસે મૂઠેડાના રાઠોડ પરિવારના સભ્યો ચુંદડી લઇને પેપળું ગામે જાય છે અને ત્યાં ધર્મની માનેલી બહેનને ચોથબાને ચૂંદડી ઓઢાડવાની પરંપરા નિભાવે છે. દર વર્ષે ભાઈ બીજના દિવસે બહેનને પાડોશના ગામ પેપળુ ચુંદડી આપવા માટે રાઠોડ પરિવારના જે સભ્યો જાય છે તે અલગ અલગ પાટી એટલે કુળના હોય છે. જેમાં ખેતાણી, ભાલાણી, રાજાણી અને દુધાણી કુળના રાઠોડો જતા હોય છે. તેવામાં આ વખતે રાજાણી કુલના લોકોએ બખ્તર ધારણ કર્યું હતું. 

સાડા સાતસો વર્ષથી યોજાતી  અશ્વદોડ
મુડેઠા ગામમાં છેલ્લા સાડા સાતસો વર્ષથી યોજાતી આ અશ્વદોડમાં પાણીદાર અશ્વોની રફતારને નિહાળવા માટે દૂર દૂરથી હજારોની સંખ્યામાં જન મેદની ઉમટી પડે છે. સદીઓ પહેલા મોગલોના આતંકથી બચવા માટે મુડેઠાના રાઠોડ પરિવારના ભાઈઓ બખ્તર ધારણ કરીને જતા હતા. જે બખ્તર આજે પણ હયાત છે અને આજના દિવસે એ બખતર ખાસ ધારણ કરવામાં આવે છે. રફતાર અને શોર્યના આ સમન્વયને નિહાળવા માટે મોટી સંખ્યામાં લોકો ઉમટી પડતા હોય છે. ત્યારે કાયદો અને વ્યવસ્થા જાળવવી ખુબ જ અઘરી બની જતી હોય છે. પરંતુ આ અશ્વદોડની ખાસિયત એ છે કે, મોટી સંખ્યામાં જનમેદની ઉમટી પડતી હોવા છતાં અહી કોઈપણ જાતના પોલીસ બંદોબસ્તની જરૂર પડતી નથી. એટલું જ નહિ  આટલી મોટી સંખ્યામાં જન મેદની ઉમટી પડતી હોવા છતાં કોઈ દિવસ અપ્રિય ઘટના બની નથી. સદીયોથી ચાલી આવતી આ પરંપરાને નિભાવનારા અને નિહાળનારા બદલાતા ગયા પરંતુ આ પરંપરા આજે પણ બરકરાર છે. 
 

રાઠોડ કુળના લોકો તલવારબાજી કરી પટ્ટા રમતા હોય છે
કેટલીય પેઢીઓથી ચાલી આવતી આ પરંપરામાં રાઠોડ કુળના લોકો તલવારબાજી કરી પટ્ટા રમતા હોય છે. જેમ જેમ સમય બદલાય છે તેમ તેમ દરેક વસ્તુઓ બદલાતી જાય છે. પરંતુ બદલાતી રીતભાતો વચ્ચે પણ નવી પેઢીઓ પણ આ પરંપરાને જાળવી રાખવા માટે એટલી જ તત્પર જણાઈ રહી છે. આજના યુવા વર્ગમાં પણ આ પરંપરા સાચવી રાખવાનો ઉત્સાહ એટલો જ જોવા મળી રહ્યો છે.