રાજકોટની આઠ વર્ષની બાળકીને કોઈ નરાધમ ફોસલાવીને લઇ ગયો હતો.આ ઘટનાએ પોલીસને દોડતી કરી મૂકી હતી. ભારે જહેમત બાદ બાળકી ગોંડલથી સહી સલામત મળી આવતા માતા-પિતાએ રાહતનો શ્વાસ લીધો.
રાજકોટની અપહૃત બાળકી ગોંડલ નજીકથી મળી
લેબોરેટરી તપાસ માટેનું કહી,યુવક ઉઠાવી ગયો
પોલીસની ભીંસથી બાળકી તરછોડી; તપાસ તેજ
રાજકોટના માંડા ડુંગર વિસ્તારના એક શ્રમજીવી પરિવારની માત્ર આઠ વર્ષની બાળકીને કોઈ નરાધમ ફોસલાવીને લઇ ગયો હતો.આ ઘટનાએ પોલીસને દોડતી કરી મૂકી હતી. ભારે જહેમત બાદ બાળકી ગોંડલથી સહી સલામત મળી આવતા માતા-પિતાએ રાહતનો શ્વાસ લીધો હતો.પંરતુ,પોલીસે આરોપીનો પીછો હજુ નથી છોડ્યો.બાજુમાં જ રહેતા શકમંદ રાજુનો ફોટો/સ્કેચ જારી કરતા પોલીસે,આ શખ્સ જોવા મળે તો તાત્કાલિક પોલીસને જાણ કરવા જણાવ્યું છે.
કેવી રીતે ઘટી ઘટના
ઘટનાની વિગત પ્રમાણે,આજીડેમ પોલીસ મથક વિસ્તારમાં આવેલા માંડા ડુંગર વિસ્તારમાં મૂળ બિહારના શ્રમજીવી પરિવારની 8 વર્ષીય બાળકીને,લેબોરેટરી રીપોર્ટ કરાવવા લઇ જવાનું કહીને બાઈક પર બેસાડી ઉઠાવી ગયો હતો. માતાની ફરિયાદના આધારે શહેર પોલીસે કેટલીક જગ્યાએ નાકાબંદી કરી અને ગ્રામ્ય પોલીસ પણ દોડતી થઇ ગઈ હતી. પોલીસ પાછળ પડી હોવાની ગંધ આવતા અપહરણકાર રાજુ બાળકીને ગોંડલ નજીક તરછોડીને ભાગી ગયો હતો. બાળકી તો હેમખેમ મળી ગઈ,પણ પોલીસે રાજુનો પીછો નથી છોડ્યો. પોલીસે તેનો ફોટો જારી કરીને સૂચિત કર્યું છે કે, આ શખસ ક્યાય નજરે પડે તો પોલીસને જાણ કરવી.
ફરાર રાજુને ઝડપવા ચક્રો ગતિમાન
અપહરણ પહેલા બાળકીને તાવ આવતો હતો અને તેના પિતા તેને દવાખાને લઇ ગયા હતા.પણ મેલી મુરાદના રાજુએ,તેના પિતાને કહ્યું કે, લેબોરેટરી ટેસ્ટ માટે લઇ જાઉં છું તેમ કહી બાઈક પર બેસાડી અપહરણ કરી ગયો હતો. રાજકોટ શહેર -ગ્રામ્ય પોલીસે છ અલગ-અલગ ટીમ બનાવી અપહરણકાર રાજુને શોધવા ચક્રો ગતિમાન કર્યા છે.