અમદાવાદ / દાણીલીમડામાંથી ઝડપાયું ઘરેલુ ગેસમાંથી કોમર્શિયલ ગેસમાં રીફિલિંગ કરવાનું કૌભાંડ, ક્રાઇમ બ્રાન્ચે કરી રેડ, 1700માં પધરાવતા

• દાણીલીમડામાંથી ઝડપાયું ગેસ રીફિલિંગ કૌભાંડ
• ઘરેલુ ગેસમાંથી કોમર્શિયલ ગેસમાં રીફિલિંગ કરવાનું કૌભાંડ
• ક્રાઇમ બ્રાન્ચને મળી સફળતા

ગરીબોને ઘરેલુ ગેસના બાટલા મળતા નથી ત્યાં દાણીલીમડા કે.જી.એન એન્ટરપ્રાઈઝના ગોડાઉનમાં ક્રાઇમ બ્રાન્ચે દરોડાે પાડીને ગેરકાયદે ઘરેલુ ગેસમાંથી કોમર્શિયલ ગેસમાં રીફિલિંગ કરવાનું કૌભાંડ પકડી પાડ્યું હતું. આ મામલામાં બે લોકોની ધરપકડ કરી ૮૭ ગેસ સિલિન્ડર સાથે ત્રણ લાખ રૂપિયાનો મુદ્દામાલ કબજે કર્યો છે. સામાન્ય પાઇપના ટુકડાની મદદથી ડોમેસ્ટિક ગેસ સિલિન્ડરમાંથી કોમર્શિયલ સિલિન્ડર રીફિલિંગ અને ચોરીનો વેપલો ચાલી રહ્યો હતો. આ ગુનામાં એક આરોપીને વોન્ટેડ પણ જાહેર કરવામાં આવ્યો છે.

આરોપીઓ ગેસનું રીફિલિંગ કરતા ઝડપાયા

ક્રાઇમ બ્રાન્ચના સ્ટાફના માણસોએ શહેરમાં સઘન પેટ્રોલિંગ હાથ ધર્યું હતું. દાણીલીમડા વિસ્તારમાં પેટ્રોલિંગ દરમિયાન તેમને બાતમી મળી હતી કે  સિકંદર માર્કેટ પાસે કે.જી.એન એન્ટરપ્રાઈઝ નામના ગોડાઉનમાં ગેસના સિલિન્ડરમાંથી ઇલેક્ટ્રોનિક સાધનો વડે રીફિલિંગની શંકાસ્પદ પ્રવૃત્તિ ચાલી રહી છે. જેથી ક્રાઇમ બ્રાન્ચે રેડ કરતાં સ્થળ ઉપરથી બે શખ્સ ઘરેલુ વપરાશના ગેસનાં સિલિન્ડરમાંથી કોમર્શિયલ સિલિન્ડરમાં ઇલેક્ટ્રોનિક સાધન વડે પાઇપથી ગેસનું રીફિલિંગ કરતા ઝડપાઇ ગયા હતા. 

૮૭ ગેસ સિલિન્ડર સહિતનો મુદામાલ જપ્ત

પોલીસે મોહસીન ઉર્ફે પપ્પુભાઈ શેખ અને રવીન્દ્ર જૈન નામના શખ્સની  ધરપકડ કરી હતી. આ ગુનાનો અન્ય એક આરોપી હરિસિંગ ફરાર થઈ ગયો હતો. જેને વોન્ટેડ જાહેર કરાયો છે. પોલીસે ૮૭ ગેસ સિલિન્ડર, સિલિન્ડર સીલ અને ગેસ ચોરી કરવા બનાવાયેલાં સાધનો સહિત ત્રણ લાખ રૂપિયા ઉપરાંતનો મુદ્દામાલ કબજે કરી તપાસ હાથ ધરી છે. હાલ પોલીસે ગેરકાયદે ગેસ રીફિલિંગમાં કોને કેટલા રૂપિયા મળતા હતા અને કેટલા સમયથી ગેસ રીફિલિંગનું કામ કરવામાં આવતું હતું તે સહિતની દિશામાં વધુ તપાસ હાથ ધરી છે.
શહેરમાં કેટલાક ઠેકાણે ગેરકાયદે રાંધણ ગેસના બાટલા વાહનોમાં ભરી આપવાની પ્રવૃત્તિ સતત ધમધમતી રહે છે. જેને કારણે ગેસના બાટલા મૂળ કિંમતથી બે ગણી કિંમતે મળતિયાઓ દ્વારા વેચી દેવામાં આવતાં ઘણી વાર ગેસના બાટલાની અછત ઊભી થાય છે. પોલીસ તથા પુરવઠા તંત્ર દ્વારા આ દિશામાં નિયમિતપણે તપાસ કરી આવા બે નંબરી વ્યવસાય કરનારાઓ સામે નક્કર પગલાં ભરવામાં આવે તે ઇચ્છનીય છે.

સિલિન્ડરનું થતું હતું ૧૨૦૦થી ૧૭૦૦ રૂપિયામાં વેચાતું

હાલ તો ગેસ સિલિન્ડરના આ કૌભાંડનો પર્દાફાશ કરવામાં ક્રાઇમ બ્રાન્ચને સફળતા મળી છે ત્યારે કોમર્શિયલ ગેસ સિલિન્ડર ૧૨૦૦થી ૧૭૦૦ રૂપિયામાં વેચાતું હોવાનું પણ સામે આવ્યું છે ત્યારે સવાલ એ થાય છે કે આ વિસ્તારમાં આટલી મોટી માત્રામાં ગેસ સિલિન્ડર કેમ રાખવામાં આવ્યા હતા ત્યાં કોઈ મોટી હોનારત કે બનાવ બન્યો હોત તો તેના માટે જવાબદાર કોણ? બીજી તરફ આ આરોપી સિવાય અન્ય લોકો પણ અમદાવાદના કયા વિસ્તારમાં ગેસ સિલિન્ડર સપ્લાય કરતા હતા અને બીજા કયા આરોપી આ કૌભાંડમાં સંડોવાયેલા છે તે અંગે પોલીસે વધુ તપાસ હાથ ધરી છે.'