અમદાવાદ / એ ભાઈ.. RTO, ટ્રાફિક પોલીસ એક નજર ઈધર ભી....

• શહેરમાં સ્કૂલવર્ધી માટે અંદાજે 70 હજાર સ્કૂલ રિક્ષા
• 60 હજાર સ્કૂલવાન દોડે છે
• અમદાવાદમાં રોજના 3.50 લાખથી વધુ બાળકો કરે છે વાહનોનો ઉપયોગ

કડક કાર્યવાહીની જાહેરાત છતાં આજે પણ શહેરમાં સ્કૂલ વાન અને રિક્ષામાં નિયમોનો ભંગ કરીને બાળકોને જોખમી રીતે ઘેટાં બકરાંની જેમ ભરવામાં આવે છે.

શહેરમાં સ્કૂલમાં જવાના અને છૂટવાના સમયે રિક્ષામાં બાળકો લટકીને જતાં હોય એવાં દૃશ્યો રોજ જોવા મળે છે, જેથી થોડા દિવસ પહેલાં એક જાગૃત નાગરિકે અમદાવાદ પોલીસને આ મામલે સોશિયલ મીડિયામાં ફરિયાદ કરતો એક ફોટો શેર કર્યો હતો. પોલીસે બીજા જ દિવસે આરોપી સ્કૂલ ડ્રાઈવરને ઝડપી પાડ્યો હતો અને તેના વિરુદ્ધ ફરિયાદ નોંધી કાયદેસરની કાર્યવાહી હાથ ધરી હતી, જોકે આ માત્ર ટોકન કામગીરી હતી.

અમદાવાદ પોલીસે બાળકોના જીવ જોખમમાં મૂકતા રિક્ષાચાલકોની ઘણી રિક્ષા ડિટેઈન પણ કરી હતી. તેમ છતાં પણ  ‌રિક્ષાચાલકો નિયમોનો સરેઆમ ભંગ કરતા જોવા મળે છે. અમદાવાદમાં રોજના 3.50 લાખથી વધુ બાળકો રિક્ષા કે વાનમાં સ્કૂલે જાય છે. શહેરમાં સ્કૂલવર્ધી માટે અંદાજે 70 હજાર સ્કૂલ રિક્ષા અને 60 હજાર સ્કૂલવાન દોડે છે. શિક્ષણ બોર્ડે નિયમો બનાવ્યા છે પણ શાળામાં ચાલતી સ્કૂલ બસમાં તેનું પાલન કરવામાં આવતું નથી. સ્કૂલ વાન અને બસનું ચેકિંગ કરવાનો હાઇકોર્ટનો આદેશ છે પણ જાણે તેને ઘોળીને પી જવાયો છે.