ક્રિકેટ / કેપ્ટન બન્યા બાદ તરત જ ચમક્યો રોહિત, તોડી નાખ્યા કોહલી અને ધોનીનાં આ રેકોર્ડ

• રોહિત શર્માએ T20 ઈન્ટરનેશનલ ક્રિકેટમાં વિરાટ કોહલીનો રેકોર્ડ તોડ્યો છે
• રોહિત શર્મા T20 આંતરરાષ્ટ્રીય ક્રિકેટમાં સૌથી વધુ 50+ સ્કોર છે
• રોહિત શર્માએ ન્યૂઝીલેન્ડ સામેની ત્રીજી T20માં 56 રન બનાવ્યા હતા

રોહિત શર્માએ કોલકાતાના ઈડન ગાર્ડનમાં શાનદાર ઈનિંગ રમી

રવિવારે ન્યુઝીલેન્ડ સામેની ત્રીજી અને અંતિમ ટી20 ઈન્ટરનેશનલ મેચમાં, રોહિત શર્માએ કોલકાતાના ઈડન ગાર્ડનમાં શાનદાર ઈનિંગ રમી અને ટી20 ઈન્ટરનેશનલ ક્રિકેટનો વર્લ્ડ રેકોર્ડ બનાવ્યો છે. રોહિત શર્માએ 31 બોલમાં પાંચ ચોગ્ગા અને ત્રણ છગ્ગાની મદદથી 56 રન બનાવ્યા હતા. રોહિતની ઇનિંગના દમ પર ભારતે 20 ઓવરમાં 7 વિકેટે 184 રન બનાવ્યા હતા.
 
 

રોહિતે T20 ઈન્ટરનેશનલ ક્રિકેટમાં વિરાટ કોહલીનો વર્લ્ડ રેકોર્ડ તોડી નાખ્યો

આ અડધી સદી સાથે રોહિત શર્માએ T20 ઈન્ટરનેશનલ ક્રિકેટમાં વિરાટ કોહલીનો વર્લ્ડ રેકોર્ડ તોડી નાખ્યો. રોહિત શર્મા T20 ઈન્ટરનેશનલ ક્રિકેટમાં સૌથી વધુ ફિફ્ટી પ્લસ સ્કોર બનાવનાર વિશ્વનો પ્રથમ બેટ્સમેન બની ગયો છે. રોહિત શર્માની આ 26મી T20 ઈન્ટરનેશનલ ફિફ્ટી હતી અને આ સિવાય તેણે ચાર સદી પણ ફટકારી છે. આ રીતે, ફિફ્ટી પ્લસ સ્કોરના મામલામાં રોહિત શર્માની કુલ સંખ્યા 30 થઈ ગઈ છે. રોહિત શર્માએ 29 ફિફ્ટી પ્લસ સ્કોર બનાવનાર પૂર્વ ભારતીય કેપ્ટન વિરાટ કોહલીને પાછળ છોડી દીધો છે.

ફિફ્ટી પ્લસ સ્કોરમાં આ ટોપ-5 છે

રોહિત શર્મા T20 ઈન્ટરનેશનલ ક્રિકેટમાં સૌથી વધુ ફિફ્ટી પ્લસ સ્કોર બનાવનાર બેટ્સમેન બની ગયો છે. આ યાદીમાં વિરાટ કોહલી બીજા સ્થાને છે. T20 ઈન્ટરનેશનલ ક્રિકેટમાં પાકિસ્તાનના કેપ્ટન બાબર આઝમ સૌથી વધુ ફિફ્ટી પ્લસ સ્કોરના મામલે ત્રીજા સ્થાને છે. બાબર આઝમે 25 વખત ફિફ્ટી પ્લસ સ્કોર બનાવ્યો છે. આ યાદીમાં ઓસ્ટ્રેલિયાના ઓપનર ડેવિડ વોર્નર ચોથા સ્થાન પર છે. વોર્નરે 22 ફિફ્ટી પ્લસ સ્કોર બનાવ્યા છે. ન્યૂઝીલેન્ડના ઓપનર માર્ટિન ગુપ્ટિલે આ યાદીમાં ટોપ-5 પૂર્ણ કર્યું છે. ગુપ્ટિલે 21 વખત ફિફ્ટી પ્લસ સ્કોર બનાવ્યો છે.

રોહિત ધોનીની બરાબરી પર પહોંચી ગયો

આંતરરાષ્ટ્રીય ક્રિકેટમાં સૌથી વધુ ફિફ્ટી પ્લસ સ્કોર બનાવનાર ભારતીય ક્રિકેટરોમાં રોહિત શર્મા એમએસ ધોનીની બરાબરી કરે છે. આંતરરાષ્ટ્રીય ક્રિકેટમાં ભારતીય ક્રિકેટરોમાં સૌથી વધુ 50+ સ્કોર બનાવવાના મામલે સચિન તેંડુલકર (264) ટોચ પર છે. રાહુલ દ્રવિડ (194), વિરાટ કોહલી (188), સૌરવ ગાંગુલી (145) પછીના ત્રણ સ્થાન પર છે. રોહિત શર્મા અને એમએસ ધોની સંયુક્ત રીતે પાંચમા સ્થાને છે. બંનેએ 124 વખત ફિફ્ટી પ્લસ સ્કોર બનાવ્યો છે.

રોહિત શર્માએ ઈન્ટરનેશનલ ક્રિકેટમાં 150 સિક્સ ફટકારી 

આ મેચમાં રોહિત શર્માએ ટી-20 ઈન્ટરનેશનલ ક્રિકેટમાં 150મી સિક્સર ફટકારી હતી. આવું કરનાર તે પ્રથમ ભારતીય અને વિશ્વનો બીજો ક્રિકેટર છે. ન્યૂઝીલેન્ડનો માર્ટિન ગુપ્ટિલ (161) ટી-20 આંતરરાષ્ટ્રીય ક્રિકેટમાં સૌથી વધુ સિક્સર મારનાર બેટ્સમેન છે. વેસ્ટ ઈન્ડિઝનો ઓપનર યુનિવર્સ બોસ ક્રિસે ગેલ ટી-20 ઈન્ટરનેશનલ ક્રિકેટરમાં સૌથી વધુ સિક્સ મારવાના મામલે ત્રીજા સ્થાને છે.ગેલે 124 સિક્સર ફટકારી છે. આ યાદીમાં ઈંગ્લેન્ડનો મર્યાદિત ઓવરનો કેપ્ટન ઈયોન મોર્ગન 119 સિક્સ સાથે ચોથા સ્થાને છે. ઓસ્ટ્રેલિયાના કેપ્ટન  એરોન ફિન્ચે 113 સિક્સ સાથે ટોપ-5ની યાદી પૂરી કરી છે.