દિલ્હી હાઈકોર્ટે એક કેસની સુનાવણી કરતા એવી ટીપ્પણી કરી છે કે રસ્તાઓનું સમારકામ નાગરિકોનો અધિકાર છે અને રાજ્ય સરકાર તેની જવાબદારીમાંથી ન બચી શકે.
દિલ્હી હાઈકોર્ટની મહત્વની ટીપ્પણી
સારા રસ્તા નાગરિકોનો મૂળભૂત અધિકાર
પૈસાને બહાને રાજ્ય સરકાર જવાબદારીથી છટકી ન શકે
સારા રસ્તાઓ હોવા લોકોનો મૂળ અધિકાર છે અને લોકોને સારા રસ્તાઓ પૂરા પાડવાની રાજ્ય સરકારની જવાબદારી છે. હવે હાઈકોર્ટે પણ આ સંદર્ભે એક મહત્વની ટીપ્પણી કરીને સરકારને દર્પણ દેખાડી દીધું છે. પૈસા નથી, પૈસા નથી તેવા બહાને સરકારો રસ્તાઓ સારા કરવાનું ટાળતી હોય છે અને તેની જવાબદારીમાંથી છટકી જતી હોય છે પરંતુ હવે હાઈકોર્ટે તેને સ્પસ્ટ જણાવી દીધું છે, રસ્તાઓ સારા હોવા નાગરિકોનો હક છે અને તેમને સારા રસ્તાઓ મળવા જ જોઈએ.
પૈસા નથી તેવું બહાનું માન્ય આધાર નથી- હાઈકોર્ટ
જન કલ્યાણ વિકાસ સમિતિ દ્વારા રસ્તાઓના નિર્માણ માટે દાખલ કરવામાં આવેલી પીઆઈએલ પર સુનાવણી કરતા દિલ્હી હાઈકોર્ટે એક મહત્વની ટીપ્પણી કરી છે. કાર્યકારી મુખ્ય ન્યાયાધીશ વિપિન સાંઘી અને ન્યાયમૂર્તિ સચિન દત્તાની ડિવિઝન બેંચે કહ્યું કે રાજ્ય માટે રસ્તાઓની જાળવણીની ફરજથી બચવા માટે ભંડોળનો અભાવ એ માન્ય આધાર ન હોઈ શકે કારણ કે તે નાગરિકોના મૂળભૂત અધિકારો સાથે સંબંધિત છે.
રસ્તાઓ સારા કરાવવા માટે અરજદારે કરી હતી હાઈકોર્ટમાં પીઆઈએલ
રસ્તાઓ સારા કરાવવા માટે એક અરજદાર હાઈકોર્ટમાં જનહિતની અરજી દાખલ કરી હતી જેની પર આજે સુનાવણી ચાલી હતી. અરજદારે એવી રજૂઆત કરી હતી કે સરકારે મારી અરજીને એવું બહાનું કાઢીને નકારી કાઢી હતી કે તેની પાસે રસ્તાઓના સમારકામ માટે પૈસા નથી.
રસ્તાઓનું સમારકામ ન થવું નાગરિકોના મૂળભૂત અધિકારોનો ભંગ
જસ્ટિસ સાંઘીએ ટિપ્પણી કરી હતી કે, અમારી દ્રષ્ટિએ, રસ્તાઓનું સમારકામ ન થવાનું આ કારણ હોઈ શકે નહીં કારણ કે તેમાં નાગરિકોના મૂળભૂત અધિકારો શામેલ છે. પ્રતિવાદીઓ વતી આગોતરી નોટિસ પર હાજર રહેલા વકીલે કોર્ટને જાણ કરી હતી કે કામ શરૂ કરી દેવામાં આવ્યું છે પરંતુ ધારાસભ્ય દ્વારા આર્થિક સહાય પાછી ખેંચી લેવાને કારણે તે બંધ કરવામાં આવી છે. કોર્ટે આ અરજી પર નોટિસ જારી કરી અને ઉત્તરદાતાઓને નાણાકીય વ્યવસ્થા કરીને કામ આગળ વધારવા અને તે સંબંધમાં 22 નવેમ્બર સુધીમાં સ્ટેટસ રિપોર્ટ ફાઇલ કરવા નિર્દેશ આપ્યો હતો. હાઇકોર્ટે તંત્રની રિટ પિટિશનનો નિકાલ કરીને સંબંધિત સત્તાવાળાઓને ફરિયાદનો નિકાલ કરવાના નિર્દેશ આપ્યા હતા.