દેશમાં આસમાન આંબી રહેલા પેટ્રોલ-ડીઝલના ભાવવધારાની વચ્ચે ફેબ્રુઆરીમાં પણ સામાન્ય લોકોને એક મોટો ઝટકો લાગ્યો છે.
ફેબ્રુઆરીમાં છૂટક મોંઘવારી વધીને 5.03 ટકા થઈ
ખાદ્ય ચીજવસ્તુઓ અને ઈંધણના ભાવવધારાને કારણે મોંઘવારી વધી
જાન્યુઆરીમાં ઓદ્યોગિક ઉત્પાદન પણ 1.6 ટકા ઘટ્યું
ફેબ્રુઆરીમાં છૂટક મોંઘવારી વધીને 5.03 ટકા થઈ છે. જાન્યુઆરીમાં છૂટક મોંઘવારી દર 4.04 ટકા હતો. રાષ્ટ્રીય આંકડાકીય કાર્યાલય દ્વારા શુક્રવારે જારી થયેલા આંકડા અનુસાર ખાદ્ય ચીજવસ્તુઓ અને ઈંધણના ભાવવધારાને કારણે છૂટક મોંઘવારી દર લગભગ 1 ટકા વધીને 5.03 ટકા થયો છે. સાથે જાન્યુઆરીમાં ઓદ્યોગિક ઉત્પાદન પણ 1.6 ટકા ઘટ્યું છે. ખાદ્ય ચીજવસ્તુઓ, પેટ્રોલ-ડીઝલના ભાવવધારા અને ખાદ્ય તેલ તથા બીજી ચીજવસ્તુઓના ભાવમાં અસહ્ય વધારાને કારણે છૂટક મોંઘવારીમાં વધારો થયો છે.
ખાદ્ય મોંઘવારીમાં વધારો
એનએસઓના આંકડા અનુસાર, ફેબ્રુઆરીમાં ખાદ્ય મોંઘવારી દર વધીને 3.87 ટકા થયો છે જે જાન્યુઆરીમાં 1.89 ટકા હતો. ઈંધણના ભાવવધારાને કારણે મોંઘવારી દરમાં વધારો છે. જાન્યુઆરીમાં 2.53 ટકા હતો જે વધઈને 3.87 ટકા પર પહોંચી ગયો છે. હાઉસિંગ મોંઘવારીમાં ઘટાડો થયો છે. ફેબ્રુઆરીમાં હાઉસિંગ મોંઘવારી દર જાન્યુઆરીમાં 3.25 ટકાની તુલનાએ ઘટીને 3.23 ટકા પર આવ્યો હતો. કપડા અને પગરખાનો મોંઘવારી દર વધીને 4.21 ટકા થયો હતો. જાન્યુઆરીમાં આ દર 3.82 ટકા હતો.
દાળનો મોંઘવારી દરમા પણ ઘટાડો જોવા મળ્યો હતો. ફેબ્રુઆરીમાં દાળની મોંઘવારી દર ઘટીને 12.45 ટકા રહ્યો જ્યારે જાન્યુઆરી તેમાં 13.39 ટકા હતો.
જાન્યુઆરીમાં ઔદ્યોગિક ઉત્પાદનમાં ઘટાડો
જાન્યુઆરીમાં ઔદ્યોગિક ઉત્પાદનમાં પણ ઘટાડો જોવા મળ્યો હતો. સત્તાવાર ડેટામાં જણાવ્યાનુસાર જાન્યુઆરીમાં આઈઆઈપી 1.6 ટકા રહ્યો છે. ઈન્ડેક્સ ઓફ ઈન્ડસ્ટ્રીયલ પ્રોડક્શનના આંકડા અનુસાર જાન્યુઆરીમાં 2021 માં બાંધકામ ક્ષેત્રના ઉત્પાદનમાં 2 ટકાનો ઘટાડો નોંધાયો હતો.