Exclusive / રિયાલિટી ચેકઃ જનસુવિધા કેન્દ્ર પર લોકોની લાંબી લાઈનો, અધિકારીઓ કેબિનમાંથી ગાયબ, જનતા ત્રસ્ત

• કામચોર કર્મચારીઓનો જનતા બની ભોગ 
• અધિકારીઓની નબળી કામગીરીથી હાંલાંકી
• રેશનકાર્ડ,આયુષ્યમાન કાર્ડમાં ધાંધીયા

ગુજરાતના અનેક સરકારી વિભાગોમાં કામચોર અને ભ્રષ્ટાચારી અધિકારીઓ અને કર્મચારીઓની ભરમાળ હોવાની રાવ છે. ત્યારે કચેરીઓના આવા કર્મચારીઓની કામચોરી તથા નબળી કામગીરીનો ભોગ જનતાને બનવાનો વારો આવે છે. 

આરંભે સુરા વચનોમાં અધૂરા જેવી સ્થિતિ અમદાવાદના કરોડોના ખર્ચે તૈયાર કરાયેલા જન સુવિધા કેન્દ્રની જોવા મળી રહી છે.આ જન સુવિધા કેન્દ્રમાં જનતા પાયાની સુવિધાઓ માટે સંઘર્ષ કરતી નજરે પડે છે.જેને લઇને VTV ન્યૂઝે અમદાવાદના જન સુવિધા કેન્દ્રની સુવિધાનું રિયાલિટી ચેક કર્યું હતું જેમાં VTV ન્યૂઝ સમક્ષ જનતાએ પોતાની વ્યથા વ્યક્ત કરી હતી.વહેલી સવારથી જ શહેરીજનો આવકનો દાખલો,ચૂંટણી કાર્ડ, જ્ઞાતિ પ્રમાનપત્ર,સિનિયર સિટીઝન સહિતના પ્રમાણપત્ર કઢાવવા માટે આવે છે પરંતુ જન સુવિધા કેન્દ્રની અસુવિધાના કારણે લાંબી લાઇનો અને અંતે જનતાને બે-ત્રણ ધક્કા ખાવા મજબૂર થવુ પડે છે.જનતાની આ તમામ અસુવિધાઓ વચ્ચે જન સુવિધા કેન્દ્રના અધિકારીઓની કેબિનો ખાલી જોવા મળી હતી.આમ પરેશાન જનતા ફરિયાદ કોને કરે તે પણ પ્રશ્ન ઉભો થયો હતો.

સળગતા સવાલ ?

• અમદાવાદના જન સુવિધા કેન્દ્રમાં જનતાને અસુવિધા કેમ ?
• શા માટે જનતાને સુવિધા માટે વલખા મારવા પડે છે ?
• જન સુવિધા કેન્દ્ર પર આટલી લાઇનો કેમ છે ?
• શા માટે પાયાની સુવિધા માટે જનતા પરેશાન થઇ રહી છે ?
• શું જનતાની પરેશાની અધિકારીઓને નહીં દેખાતી હોય ?
• શા માટે જનતાની સમસ્યાઓને લઇને અધિકારીઓ ગંભીર નથી ?
• ક્યાં સુધી જનતા પરેશાન થતી રહેશે ?
• જન સેવા કેન્દ્ર્ પર જનતાને સુવિધા ક્યારે મળશે ? 

વડોદરામાં રેશનકાર્ડ માટે હાલાકી
વડોદરામાં રેશનકાર્ડ તથા આયુ્ષ્યમાન કાર્ડની કામગીરીમાં જનતાને ભારે હાંલાકીનો સામનો કરવો પડી રહ્યો છે. જેમાં અધિકારીઓની ભૂલનો ભોગ સામાન્ય જનતા બની રહી છે. રેશનકાર્ડમાં ભૂલના કારણે આયુષ્યમાન કાર્ડથી જનતા વંચિત છે તેમજ નામ કમી કરાવવા તથા ઉમેરવા માટે જનતા રોજે રોજ ધરમના ધક્કા ખાઈ રહી છે.  વડોદરા ઝોન 4ની કચેરીમાં જનતાની લાંબી લાઈનો છે છતાંય એસીમાં બેઠેલા અધિકારીઓના પેટનું પાણી પણ હલતું નથી

સાવરકુંડલા તાલુકાના પીઠવડી ગામે રોષ
તો સાવરકુંડલામાં પણ ગ્રામજનો અધિકારીઓની કામચોરીનો ભોગ બન્યા હતા જેથી તેઓએ TDO કચેરીનો ઘેરાવ કરી રામઘુન બોલાવી વિરોધ કર્યો હતો. સાવરકુંડલા તાલુકાના પીઠવડી ગામે મંત્રી બાબતે હોબાળો મચ્યો હતો.છેલ્લા 10 દિવસથી ધક્કા છતાં કામ ન થતા હોવાનો આક્ષેપ લાગ્યો હતો.