VTV EXCLUSIVE / 2022માં ફરી ગુજરાતમાં....: જીતને લઈને રક્ષામંત્રી રાજનાથસિંહનો સૌથી મોટો દાવો

• કેન્દ્રીય રક્ષામંત્રી રાજનાથસિંહ ગુજરાત પ્રવાસે
• રાજનાથસિંહની VTV સાથે ખાસ વાતચીત
• ફરી પૂર્ણ બહુમત સાથે બનશે ભાજપની સરકારઃ રાજનાથસિંહ

ગુજરાત વિધાનસભાની પ્રથમ તબક્કાની ચૂંટણી માટે પ્રચાર પડઘમ શાંત થઈ ગયા છે. વિધાનસભાની ચૂંટણીના બીજા તબક્કા માટે રાજકીય પક્ષોએ પ્રચાર અભિયાન તેજ બનાવી દીધું છે. રાજકીય પક્ષો મતદારોને આકર્ષવા માટે તનતોડ મહેનત કરી રહ્યા છે. ભાજપના સ્ટાર પ્રચારકો રાજ્યના વિવિધ વિસ્તારોમાં સભા અને રોડ શૉ યોજી રહ્યા છે. ત્યારે ગુજરાતમાં પ્રચાર માટે આવેલા કેન્દ્રીય રક્ષામંત્રી રાજનાથસિંહે VTV ન્યૂઝ સાથે ખાસ વાતચીત કરી. જેમાં તેઓએ જણાવ્યું કે, ગુજરાતમાં 2022માં ફરી પૂર્ણ બહુમત સાથે ભાજપની સરકાર બનશે.

કોંગ્રેસ પાસે કોઈ મુદ્દા નથી માટે દુષ્પ્રચાર કરે છેઃ રાજનાથસિંહ
કેન્દ્રીય રક્ષામંત્રી રાજનાથસિંહે જણાવ્યું કે, 'ગુજરાતમાં ભારતીય જનતા પાર્ટી જીતી રહી છે, સામાન્ય બહુમતીથી નહીં હાઈ બહુમતી સાથે ભારતીય જનતા પાર્ટી વિજય પ્રાપ્ત કરી રહી છે. કોંગ્રેસની પાસે બોલવા માટે કોઈ મુદ્દા નથી માટે દુષ્પ્રચાર કરે છે. ગુજરાતનો વિકાસ ભારતીય જનતા પાર્ટીએ કર્યો છે.' 

આમ આદમી પાર્ટી પોતાનું અસ્તિત્વની લડાઈ લડી રહી છેઃ રાજનાથસિંહ
આમ આદમી પાર્ટી પર પ્રહાર કરતા રાજનાથસિંહે કહ્યું કે, આમ આદમી પાર્ટી પોતાનું અસ્તિત્વ બચાવવાની લડાઈ લડી રહી છે. માત્ર તે પોતાની ઉપસ્થિતિ નોંધાવવાની લડાઈ લડી રહી છે. 

બે તબક્કામાં યોજાશે ચૂંટણી
ગુજરાતમાં બે તબક્કામાં ચૂંટણી યોજાવા જઈ રહી છે. પ્રથમ તબક્કાની 89 બેઠકો માટે  1 ડિસેમ્બરના રોજ મતદાન થશે, આ માટે કુલ 788 ઉમેદવારો ચૂંટણીના મેદાનમાં છે. જ્યારે બીજા તબક્કાની 93 બેઠકો માટે 5 ડિસેમ્બરના રોજ મતદાન થશે. બીજા તબક્કાની 93 બેઠકો માટે 833 ઉમેદવારો મેદાનમાં છે.  આમ ગુજરાત વિધાનસભાની 182 બેઠકો માટે કુલ 1621 ઉમેદવારો મેદાનમાં છે.