વિરોધ / યસબેંકમાં રાજકોટ મનપાના રૂા. 164 કરોડ ફસાયા, કોંગ્રેસ આ મુદ્દે આંદોલનના મૂડમાં

• રાજકોટ મનપાના સ્માર્ટસીટી પ્રોજેક્ટના રૂા 164 કરોડ ફસાયા
• કોંગ્રેસ મેયરને કરાશે રજૂઆત
• કોંગ્રેસ પોતે ફરીયાદી બની પોલીસમાં ક્રિમીનલ કેસ નોંધાવશે

યસ બેંકમાં હાલ ખાતેદારોની લાંબી લાઈનો જોવા મળી રહી છે પરંતુ યસ બેંકપાસે પૈસા નહીં હોવાથી ગ્રાહકોને પોતાના જ પૈસા નથી મળી રહ્યો. આરબીઆઈ દ્વારા યસબેંક પર 50,000ની સર્કીટ મારી છે જેથી યસ બેંકનાં ખાતા ધારકો મહીને ફક્ત 50,000 રૂપિયા જ ઉપાડી શકાશે ત્યારે આ સ્થિતિમાં સામાન્ય માણસ તો ઠીક પરંતુ રાજકોટ મહાનગરપાલિકા પણ મુસીબતમાં મૂકાઈ શકે છે. રાજકોટ મનપાના સ્માર્ટ સિટીના પ્રોજેક્ટના 164 કરોડ રૂપિયા યસ બેંકમાં અટવાઈ જતા મનપામાં રાજકારણ ગરમાયું છે. આ મામલે ત્વરિત પગલાં ભરવામાં નહીં આવે તો વિપક્ષે કાયદેસરના પગલાં ભરવાની ચીમકી ઉચ્ચારી છે.

રાજકોટ મનપાના સ્માર્ટસીટી પ્રોજેક્ટના રૂા 164 કરોડ ફસાયા

રાજકોટ મહાનગરપાલિકાના સ્માર્ટ સીટી પ્રોજેક્ટના 164 કરોડ રૂપિયા પણ યસ બેંકમાં જમા પડેલા છે ત્યારે અચાનક જ યસ બેંકમાં નાણાભીડ સર્જાતા હવે મનપામાં રાજકારણ ગરમાયું છે.164 કરોડ રૂપિયાને લઈને હવે કોંગ્રેસ મેદાનમાં આવ્યું છે કોંગ્રેસ આગેવાનોએ આક્ષેપ કરતા જણાવ્યું છે કે યસ બેંકમાં મનપાના 164 કરોડ રૂપિયા ફસાણા છે. યસ બેંકમાં રહેલ પ્રજાના પૈસાનું પુરૂ જોખમ છે કે એ પૈસા પાછા ન આવે. સરકારી બેંકને બદલે ખાનગી બેંકમાં શા માટે ખાતું ખોલવવામાં આવ્યું? 

કોંગ્રેસ મેયરને કરાશે રજૂઆત

કોંગ્રેસ શાસકોનો ઉધડો લેતા પૂછ્યું કે કોના આદેશથી સરકારી બેન્કને બદલે પ્રાઇવેટ બેન્કમાં આટલી મોટી રકમ મુકવામાં આવી? પ્રજાના પૈસા બાબતે આવી બેદરકારી રાખનાર પદાધિકારી કે અધીકારી વિરૂદ્ધ કાનુની પગલા લેવાની માંગણી કોંગ્રેસના આગેવાનોએ ઉચ્ચારી છે. કોંગ્રેસ દ્વારા સોમવારે આ બાબતે મેયરને રજૂઆત પણ કરશે આ બાબતમાં જો ત્વરીત પગલાં ભરવામાં નહી આવે તો આવતા અઠવાડીયે રાજકોટના પ્રજાજનના હીતમાં કોંગ્રેસ પોતે ફરીયાદી બની પોલીસમાં ક્રિમીનલ કેસ નોંધાવશે.