લાલિયાવાડી! / પ્રજા બિચારી હેરાન જ થાયને! રાજકોટ પંચાયત ઓફિસમાં 'લોલમલોલ', 7 સમિતિમાંથી 6 સમિતિના ચેરમેન ગાયબ

• રાજકોટ જિલ્લા પંચાયતમાં પદાધિકારીઓની સુસ્તી
• 7 સમિતિમાંથી 6 સમિતિના ચેરમેન હાજર નહીં
• VTV NEWS પહોંચ્યું રાજકોટ જિલ્લા પંચાયત ભવન

VTV NEWS રાજકોટ જિલ્લા પંચાયત ભવન પહોંચતા કચેરીમાં પદાધિકારીઓની હાજરીને લઇને ચોંકાવનારો ખુલાસો થયો છે. રાજકોટ જિલ્લા પંચાયત ભવનમાં VTV પહોંચતા પદાધિકારીઓની સુસ્તી જોવા મળી. ભવનમાં જિલ્લા પંચાયતની 6 સમિતિના ચેરમેન ગેરહાજર જોવા મળ્યા. જેમાં શિક્ષણ સમિતિના ચેરમેન ગીતાબેન, ઉત્પાદન સહકાર અને સિંચાઈ સમિતિના ચેરમેન જ્યોત્સનાબેન પાનસુરીયા, બાંધકામ સમિતિના ચેરમેન પી.જી.ક્યાડા અને મહિલા બાળ વિકાસ સમિતિના ચેરમેન સુમિતાબેન ગેરહાજર જોવા મળ્યાં છે. જિલ્લા પંચાયતમાં માત્ર કરોબારી ચેરમેન હાજર છે. ગાંધીનગર ખાતે સચિવાલયમાં પણ મંત્રીઓ સોમ અને મંગળવારે હાજર રહેતા હોય છે, ત્યારે આજે મંગળવાર હોવા છતાં જિલ્લા પંચાયતના ચેરમેનો રજાના મુડમાં હોય તેવું લાગી રહ્યું છે.

ઓફિસમાં પંખા, AC અને લાઇટ ચાલુ છતાં મહિલા અને બાળ વિકાસ સમિતિના અધ્યક્ષ ગેરહાજર

મહત્વનું છે કે, કહી શકાય કે લોકશાહીમાં સોમ અને મંગળ મંત્રીઓ પણ હાજર હોય છે ત્યારે વાત કરીએ મહિલા અને બાળ વિકાસ સમિતિના અધ્યક્ષ સુમિતાબેન રાજેશભાઇ ચાવડા કે જેઓની ઓફિસમાં પંખા, AC અને લાઇટ ચાલુ છે છતાં ઓફિસમાં સુમિતાબેન હાજર નથી. સૌરાષ્ટ્રના પાટનગરની આ જિલ્લા પંચાયત છે છતાં અહીં માત્ર એક કારોબારી ચેરમેન સદેવસિંહ અને એક મોહનભાઇ દાખડા જ અત્યારે હાજર છે.

અમે તો 2-4 જણા ચેરમેન કાયમી હાજર જ હોઇએ છીએ : મોહનભાઇ દાખડા

આ અંગે મોહનભાઇ દાખડાએ જણાવ્યું કે, 'કોઇને કંઇ કામ હોય અને ના આવ્યા હોય બાકી અમે તો 2-4 જણા ચેરમેન કાયમી હાજર જ હોઇએ છીએ. તમને ગમે ત્યારે આવવાની છૂટ છે. લોકો કોઇ હેરાન ના થાય એટલે અમારી ચેમ્બર કાયમી ખુલ્લી હોય છે.' જો કે તેઓએ મહિલા સદસ્યોની ગેરહાજરી અંગે નિવેદન આપતા કહ્યું કે, 'એ મને ખ્યાલ નથી.

કોઇને કંઇ કામ હશે એટલે આજે તેઓ ગેરહાજર હશે: સદેવસિંહ

જ્યારે કારોબારી ચેરમેન સદેવસિંહે જણાવ્યું કે, 'લગભગ તો સોમવારે અને ગુરૂવારે દરેક ચેરમેન હાજર રહેતા જ હોય છે. આજે મંગળવાર છે એટલે કદાચ કોઇ કામના લીધે ગેરહાજર રહ્યાં હોય. બાકી સોમવાર અને ગુરૂવારે તો બધા હાજર હોય જ છે. કોઇને કંઇ કામ હશે એટલે આજે તેઓ ગેરહાજર હશે. બાકી રહી વાત અમારી તો અમે તો અહીં રેગ્યુલર 10થી 6 હાજર હોઇએ જ છીએ. અમને જ્યારથી ભાજપે આ જવાબદારી સોંપી છે ત્યારથી અમે અહીં સતત હાજર રહીએ છીએ. લોકોના પ્રશ્નો સાંભળીને અમે તેનું નિરાકરણ લાવીએ છીએ.'