એલર્ટ / ઉત્તર પ્રદેશ, મધ્ય પ્રદેશ અને બિહાર સહિત 13 રાજ્યોમાં ભારે વરસાદની ચેતવણી

• આવનારા 3 દિવસોમાં દેશના અનેક રાજ્યોમાં થઈ શકે છે ભારે વરસાદ
• 16-18 સપ્ટેમ્બર સુધી ઉત્તર પ્રદેશના પૂર્વ ભાગમાં થઈ શકે છે વરસાદ
• આ વર્ષે ઉત્તર પ્રદેશમાં હાલ સુધી સામાન્યથી 24 ટકા ઓછો વરસાદ

હવામાન વિભાગે આપી ભારે વરસાદની ચેતવણી

ઉત્તર પ્રદેશ સહિત 13 રાજ્યોમાં સોમવારે ભારે વરસાદની ચેતવણી આપવામાં આવી છે. ભારતીય હવામાન વિભાગની જાણકારી અનુસાર ઓરિસ્સા અને પશ્ચિમ બંગાળમાં મેદાની વિસ્તારોમાં 50-60 કિલોમીટર/કલાકની ઝડપે પવન ફૂંકાઈ શકે છે. હવામાન વિભાગના અનુસાર દેશના અનેક રાજ્યોમાં વરસાદ થઈ શકે છે. ગુજરાતમાં તો વરસાદી મહેર જોવા મળી જ રહી છે. પરંતુ મધ્ય પ્રદેશ, રાજસ્થાન, અને ઉત્તર પ્રદેશમાં પણ વરસાદે તાંડવ મચાવ્યું છે. ક્યાંક આભ ફાટ્યું છે તો ક્યાંક લોકો ઘર વિહોણા બન્યા છે. ક્યાંક મુંગા પશુ પૂરના પ્રકોપનો ભોગ બન્યા છે.

આ વિસ્તારોમાં રહેશે ભારે વરસાદ

સોમવારે પૂર્વી ઉત્તર પ્રદેશ, પશ્ચિમ બંગાળના પહાડી વિસ્તારો, સિક્કિમ, અંડમાન નિકોબાર અને મેઘાલયમાં વધારે વરસાદ થઈ શકે છે. મધ્ય પ્રદેશના પૂર્વ ભાગ બિહાર, ગુજરાત, આંધ્ર પ્રદેશના અનેક વિસ્તારો, કર્ણાટક, તમિલનાડુના પણ કેટલાક વિસ્તારોમાં વરસાદ થઈ શકે છે. અન્ય તરફ મધ્ય પ્રદેશમાં 34 તો રાજસ્થાનમાં 36 ટકા સામાન્યથી વધુ વરસાદ થઈ શકે છે. હવામાન ખાતાથી મળતી માહિતિ અનુસાર  મધ્ય પ્રદેશમાં પૂર્વમાં વરસાદ મધ્યમ રહેશે. પણ પશ્ચિમ વિસ્તારમાં સક્રિય રહેશે. 

આ સ્થાનો કરાવવામાં આવ્યા ખાલી

આ સાથે ઈંદૌર, મંદસૌર, નીમચ, આગરા અને માલવા સહિત 10 જિલ્લામાં ભારે વરસાદની સંભાવના છે. નીમચમાં ભારે વરસાદના કારણે અસર પામેલા 2300 લોકોને સુરક્ષિત સ્થળે ખસેડવામાં આવ્યા છે. મંદસૌરના પણ 100થી 125 જેટલા ગામોને ખાલી કરાવી દેવાયા છે. અને સાથે જ લગભગ 14 હજાર લોકોને સુરક્ષિત સ્થળે ખસેડવામાં આવ્યા છે.  ભોપાલના 32 જિલ્લામાં સામાન્ય વરસાદ રહેશે.

આ સિવાય ગુજરાત, મરાઠવાડા, મધ્ય મહારાષ્ટ્ર સહિત દક્ષિણના 5 રાજ્યોમાં અનેક વિસ્તારોમાં ભારે વરસાદનું અનુમાન છે. ઉત્તર પ્રદેશમાં પણ સામાન્યથી 24 ટકા ઓછો વરસાદ થયો છે. હરિયાણામાં હાલ સુધી 41 ટકા અને બિહારમાં સામાન્યથી 22 ટકા ઓછો વરસાદ છે. 

સામાન્યથી 3ગણો વધુ વરસાદ
મંદસૌરમાં 1 જૂનથી હાલ સુધી 1927.8 મીમી વરસાદ થયો જે સામાન્ય રીતે 742.1 મીમી હોય છે. 
નીમચમાં 1 જૂનથી હાલ સુધી 1569.7 મીમી વરસાદ થયો જે સામાન્ય રીતે 706.9 મીમી હોય છે. 

ફોટો- Twitter.com