VIDEO / કડકડતી ઠંડીમાં ડાયરાની રમઝટ: ડીસાના શેરપુરા ગામે નોટોનો ઢગલો થઇ જતા ગાયો માટે 1 કરોડથી વધુનું દાન એકત્ર

• ડીસાના શેરપુરા ગામે ડાયરામાં રૂપિયાનો વરસાદ
• શેરપુરાની ગૌ-શાળામાં કરવામાં આવ્યું હતું ડાયરાનું આયોજન
• ડાયરામાં ગાયો માટે 1 કરોડથી વધુનું દાન એકત્ર થયું

ગુજરાત સહિત સમગ્ર ભારત વિવિધ સંસ્કૃતિઓનો દેશ છે. એમાં પણ ગુજરાતમાં લોક ડાયરાના લોકો ખુબ જ દીવાના છે. હવે તો વિદેશોમાં પણ ડાયરાનું આયોજન કરવામાં આવે છે. ગુજરાતી કલાકારો ગુજરાતની ધરતી પર જ નહીં, વિદેશોમાં ભૂરિયાઓને ડોલાવી રહ્યા છે. ત્યારે બનાસકાંઠાના ડીસામાં ગતરાત્રીએ ગાયોના લાભાર્થે ડાયરાનું આયોજન કરવામાં આવ્યું હતું. જેમાં લોકોએ ગાયની પ્રતિમા પર નોટોનો વરસાદ કર્યો હતો.

ધારાસભ્ય  પ્રવીણ માળી પણ પૈસા ઉડાડતા નજરે પડ્યા
હિન્દુ ધર્મમાં ગાયને માતાનો દરજ્જો આપવામાં આવ્યો છે, હિન્દુ ધર્મના લોકો ગાયોને માતા તરીકે પણ પૂજા કરે છે ત્યારે ડીસા તાલુકાના શેરપુરા ગામે ગ્રામજનો દ્વારા ગાયોના લાભાર્થે (એક શામ ગૌ માતા કે નામ) ભવ્ય લોકડાયરાનું આયોજન કરવામાં આવ્યું હતું. જેમાં લોકોએ મન મુકીને પૈસા ઉડાવ્યા હતા. આ તકે ડીસાના ધારાસભ્ય  પ્રવીણ માળી રૂપિયા ઉડાડતા નજરે પડ્યા હતા.

થોડી જ વારમાં એકઠા થઈ ગયા લાખો રૂપિયા
શેરપુરા ગામે યોજાયેલા ડાયરામાં થોડી જ વારમાં લાખો રૂપિયા એકત્રિત થઈ ગયા હતા. ઉપરાંત આ ડાયરામાં આવેલા લોકો દ્વારા ખુલ્લા દિલે દાનનો ધોધ વહાવ્યો હતો. ડાયરામાં એકઠી થયેલી મોટી રકમ ગાયોની સેવા માટે વાપરવામાં આવશે તેવું એલાન પણ કરવામાં આવ્યું હતું. જેથી લોકોએ બમણા વેગે નોટોનો વરસાદ કર્યો હતો. 

જુઓ વીડિયો