વિરામ બાદ વધુ એક વખત અમદાવાદ શહેરમાં ધોધમાર વરસાદ પડયો હતો. જેંને લઈને અનેક વિસ્તારોમાં પાણી ભરાયા હતા.
અમદાવાદના વિવિધ વિસ્તારોમાં પાણી ભરાયા
પાણી ભરાતા થયો ટ્રાફિક જામ
પાણી ભરાતા વાહનચાલકોને ભારે હાલાકી
રાજ્યમાં ફરી એક વખત વરસાદની સિસ્ટમ સક્રિય થતાં વરસાદનો નવો રાઉન્ડ આવ્યો છે. જેમાં હવામાન વિભાગ દ્વારા શનિવાર-રવિવારે અમદાવાદમાં પણ ભારે વરસાદની આગાહી કરવામાંઆ આવી હતી. જે આગાહીને લઈને આજે શનિવાર બપોર બાદ અમદાવાદમાં વરસાદી માહોલ જામ્યો હતો અને સાંજના સમયગાળા દરમિયાન અનરાધાર વરસાદ ત્રાટક્યો હતો. અમદાવાદ શહેરમાં ધોધમાર વરસાદ થયો હતો. જેને લઈને શહેરના વિવિધ વિસ્તારોમાં પાણી ભરાયા હતા.મુખ્ય માર્ગો પર જાણે નદીઓ વહેતી થઇ હોય તેવા દ્રશ્યો સર્જાયા હતા.
હાટકેશ્વરમાં ઘુંટણ સમા પાણી ભરાયા
થોડા દિવસના વિરામ બાદ ફરીથી મેઘરાજા અમદાવાદ પર ફરીથી મહેરબાન થયા ત્યારે શહેરમાં મોડી સાંજે ધોધમાર વરસાદની શરૂઆત થઇ હતી. ધોધમાર વરસાદને પગલે શહેરના વિવિધ વિસ્તારોમાં પાણી ભારાયા હતા અને ટ્રાફીક જામની સ્થિતીનું નિર્માણ થયું હતું. ખાસ તો હાટકેશ્વર વિસ્તારમાં ઘૂંટણસમા પાણી ભરાયા હતાં જેના કારણે વાહનચાલકોને ભારે હાલાકી ભોગવાનો વારો આવ્યો હતો.
અમદાવાદમાં અનરાધાર વરસાદ
અમદાવાદના બોડકદેવ, હાટકેશ્વર, આંબાવાડી, માનસી સર્કલ, હિંમતલાલ પાર્ક નવરંગપુરા, બાપુનગર, નરોડા, પ્રહલાદનગર, ચાંદખેડા, ચાંદલોડિયા, કાલુપુર, વસ્ત્રાપુર, મણીનગર સહિતના વિસ્તારોમાં વરસાદ પડ્યો હતો. જેને લઈને ચોતરફ પાણી... પાણી જેવી સ્થિતિ સર્જાઇ હતી. આમ અમદાવાદમાં પૂર્વથી માંડીને પશ્ચિમ સુધી મેઘરાજાએ તોફાની બેટિંગ કરી હતી.
હજુ આગામી ત્રણ દિવસની આગાહી
રાજ્યમાં વરસાદને લઇ હવામાન વિભાગ દ્વારા વધુ એક આગાહી કરવામાં આવી છે. જેમા હવામાન વિભાગની આગાહી અનુસાર, આગામી ત્રણ દિવસ રાજ્યમાં વરસાદી માહોલ રહેશે. જેમાં ઉત્તર ગુજરાત અને કચ્છમાં ભારે વરસાદની આગાહી કરવામાં આવી છે. કચ્છમાં આગામી 2 દિવસ અતિભારે વરસાદ થવાની સંભાવના છે. સાથે સૌરાષ્ટ્ર, બનસકાંઠા, સાબરકાંઠા, વલસાડ, તાપીમાં ભારે વરસાદની આગાહી કરવામાં આવી છે. સાથે મધ્ય ગુજરાત, અમદાવાદ અને ગાંધીનગરમાં સામાન્ય વરસાદ થવાની શક્યતા છે.