હવામાન ખાતું / ગુજરાતમાં આગામી 3 દિવસ વરસાદને લઈ આગાહી, અમરેલી જિલ્લામાં નદી-નાળા છલકાયા

• રાજ્યમાં વરસાદી માહોલ યથાવત
• વરસાદને લઇ હવામાન વિભાગનું અનુમાન 
• દક્ષિણ ગુજરાતમાં હળવાથી ભારે વરસાદની આગાહી

ગુજરાતમાં વરસાદી માહોલ આગામી દિવસમાં પણ યથાવત્ રહેશે. વરસાદને લઇને હવામાન વિભાગના અનુમાન મુજબ ત્રણ દિવસ રાજ્યમાં વરસાદી માહોલ રહેવાની શકયતા છે. જો કે, રાજ્યમાં હજુ પણ 48 ટકા વરસાદની ઘટ છે. દક્ષિણ ગુજરાતમાં હળવાથી ભારે વરસાદની આગાહી છે. સૌરાષ્ટ્રમાં મધ્યમ વરસાદનું અનુમાન જણાવ્યું છે. ઉત્તર ગુજરાત અને મધ્ય ગુજરાતમાં સામાન્ય વરસાદ રહેશે.

• નવસારી,સુરત,ડાંગ અને તાપીમાં વરસાદની આગાહી
• ગીર સોમનાથ,અમરેલી અને ભાવનગરમાં વરસાદ વરસી શકે
• રાજકોટ,દ્વારકા અને પોરબંદરમાં વરસી શકે વરસાદ
• ગાંધીનગર,વડોદરા અને અમદાવાદ સહિત સામાન્ય વરસાદનું અનુમાન
• બનાસકાંઠા, સાબરકાંઠા, અરવલ્લી, મહીસાગરમાં સામાન્ય વરસાદ રહેશે
• વરસાદ ખેંચાતા ખેડૂતોની વધી રહી છે પરેશાની

જૂનાગઢ જિલ્લામાં નોંધાયો વરસાદ

લાંબા સમયથી જૂનાગઢ જિલ્લામાં સાર્વત્રિક વરસાદની રાહ જોવામાં આવતી હતી. ત્યારે આજે માળીયા, માંગરોળના ગ્રામ્ય વિસ્તારમાં વરસાદ વરસ્યો છે. વરસાદના કારણે સૂકા તરફ જતા પાકને જીવનદાન મળ્યું છે. સારો વરસાદ થતા ખેડૂતોમાં ખુશીની લાગણી જોવા મળી છે. અરવલ્લીમાં યાત્રાધામ શામળાજી, મોડાસા, ભિલોડામાં ઘીમીઘારે વરસાદ નોંધાયો હતો. 

ભાવનગરના મહુવા પંથકના ગ્રામ્ય વિસ્તારોમાં ધોધમાર વરસાદ નોંધાયો હતો. જેમાં માલવાવ, કલસાર, દાઠા ,રાણીવાડમાં વરસાદ વરસ્યો હતો. વરસાદી પાણીના કારણે માર્ગો પર પુરની સ્થિતિ જોવા મળી હતી. 

અમરેલીના લીલીયામાં બે કલાકમાં 4 ઇંચથી વધુ વરસાદ નોંધાયો હતો. જેને લઈ નાવલી નદીમાં ઘોડપૂર આવ્યું હતું. નાવલી નદીના પાણી શહેરના અનેક વિસ્તારોમાં ફરી વળ્યાં હતા. બજાર અને સોસાયટીમાં પાણી ફરી વળતા લોકોને હાલાંકી પડી હતી. લીલીયાથી સાવરકુંડલા જવાનો સ્ટેટ હાઇવે બંધ થયો હતો.