રાજકારણ / પંજાબ કોંગ્રેસમાં મોટી ઉથલપાથલ વચ્ચે ગુજરાત આવી શકે છે રાહુલ ગાંધી, જાણો શું છે કાર્યક્રમ

• રાહુલ ગાંધી આવી શકે છે ગુજરાત
• ગુજરાત કોંગ્રેસે માગ્યો સમય
• સંયોજકોની બેઠકમાં હાજરી આપવા સમય માગ્યો

કોંગ્રેસનું મિશન ગુજરાત?
આગામી વર્ષ 2022માં દેશનાં અનેક રાજ્યોમાં વિધાનસભાની ચૂંટણી થવા જઈ રહી છે એવામાં ભાજપ અને કોંગ્રેસ બંને એક્શન મોડમાં આવી ગઈ છે. ગુજરાતમાં ભાજપે તો પંજાબમાં કોંગ્રેસે મુખ્યમંત્રીને ચૂંટણી પહેલા બદલી નાંખ્યા છે ત્યારે હવે રાહુલ ગાંધી પંજાબ બાદ મિશન ગુજરાતમાં જોડાય તેવી શક્યતા છે. 

સંયોજકોની બેઠકમાં રાહુલ ગાંધી હાજરી આપે તેવી શક્યતા 
ગુજરાતમાં આગામી વર્ષ વિધાનસભાની ચૂંટણી છે જ્યાં બીજી તરફ હજુ કોંગ્રેસમાં સંગઠન મજબૂત કરવાનો પડકાર છે. કોંગ્રેસમાં થોડા દિવસ પહેલા સુધી પ્રદેશ અધ્યક્ષ અને વિધાનસભામાં વિપક્ષનાં નેતા નવા આવશે તેવી ચર્ચા હતી. જોકે હજુ સુધી તેના પર કોઈ નિર્ણય લેવાયો નથી, આ સિવાય કોંગ્રેસનાં દિગ્ગજ નેતા રાજીવ સાતવનાં નિધન બાદ પ્રભારી પદ પર પણ કોઈની હજુ સુધી વરણી કરવામાં આવી નથી ત્યારે કોંગ્રેસનાં પેન્ડિંગ કામો વચ્ચે રાહુલ ગાંધીને ઓકટોબર મહિનામાં ગુજરાત આવવા માટે સમય માંગવામાં આવ્યો છે. ઓકટોબર મહિનામાં ગુજરાતમાં યોજાનાર સંયોજકોને બેઠકમાં રાહુલ ગાંધી હાજર રહે તેવી શક્યતા છે. 

ગુજરાતનાં રાજકારણમાં ગરમાવો 
નોંધનીય છે કે હાલમાં કોંગ્રેસમાં ઘણા બધા અન્ય ડખા પણ ચાલી રહ્યા છે. જેમાંથી એક રાજ્ય પંજાબનું મિશન કોંગ્રેસે પાર પાડી દીધું છે, હવે રાજસ્થાન અને છત્તીસગઢમાં પણ આગામી સમયમાં કોઈ મોટા ફેરફાર તેવી શક્યતા છે. ત્યારે ગુજરાતનાં રાજકારણમાં પણ ગરમાવો આવ્યો છે, રાજ્યમાં ભાજપ દ્વારા નવા મુખ્યમંત્રીની વરણી બાદથી કોંગ્રેસ ફરીથી આક્રમક મોડમાં આવી છે અને સીએમ પટેલ પર શાબ્દિક પ્રહાર કરવામાં આવી રહ્યા છે.