ઉત્તરપ્રદેશની અમેઠી બેઠક પર લોકસભા ચૂંટણીના પાંચમા તબક્કા અંતર્ગત મતદાન થઈ રહ્યું છે. અમેઠી દેશની હાઈ-પ્રોફાઇલ બેઠકમાંથી એક છે. આ બેઠક પર કુલ 27 ઉમેદવારો પોતાનું નસીબ અજમાવી રહ્યાં છે, પરંતુ અહીં મુખ્ય મુકાબલો રાહુલ ગાંધી અને સ્મૃતિ ઈરાની વચ્ચે છે. ત્યારે મતદાનમાં ગરબડી થવાના આરોપ સ્મૃતિએ લગાવ્યા છે.
કેન્દ્રીય મંત્રી સ્મૃતિ ઈરાનીએ અમેઠીમાં રાહુલ ગાંધી બુથ કેપ્ચરિંગ કરાવી રહ્યાંનો આરોપ લગાવ્યો છે. અમેઠીનો એક વીડિયો ટ્વિટર પર શેર કર્યો છે. સ્મૃતિએ કહ્યું કે, તેઓએ ચૂંટણી પંચ અને વહિવટી તંત્રને આ અંગેની ફરિયાદ કરી કાર્યવાહીની માગ કરી છે.
સ્મૃતિ ઈરાનીએ જે વીડિયો ટ્વિટર એકાઉન્ટર પરથી શેર કર્યો છે તેમાં એક વૃદ્ધ મહિલા કેમેરાની સામે કહે છે કે, હાથ પકડીને પરાણે મારી આંગળી પંજા પર મૂકી દીધી. હું કમળને મત આપવા માગતી હતી પણ પંજા પર મત અપાવી દીધો.
— Chowkidar Smriti Z Irani (@smritiirani) May 6, 2019
ભાજપના નેતા વિવેક મહેશ્વરીએ આ વીડિયો સાથે જાણકારી પણ આપી છે કે આ મામલો ગૌરીગંજના ગુજરટોલા બૂથ નંબર 316નો છે, જ્યાં અધિકારીએ પરાણે કોંગ્રેસને મત અપાવી દીધો. જો કે, આ વીડિયો કેટલો સાચો છે અને કેટલો ખોટો તેની પુષ્ટી હજુ સુધી થઈ નથી.
આ ઉપરાંત કેન્દ્રીય મંત્રી સ્મૃતિ ઈરાનીએ આરોપ લગાવ્યો છે કે અમેઠીની એક હોસ્પિટલમાં એક વ્યક્તિને સારવાર આપવાનો ઈન્કાર કરવામાં આવતા તેનું મોત નિપજ્યું છે.પરંતુ આ વાતની પુષ્ટી કરતા મૃતકના પરિવારજનો જુઠ્ઠુ બોલી રહ્યા હોવાનું સામે આવ્યું છે અને સ્મૃતિ ઈરાનીની પોસ્ટ ખોટી હોવાના કોંગ્રેસના નેતા પ્રહાર કરી રહ્યા છે.