એક્શન / ઇન્સ્ટામાં ફોલોઅર્સ વધારવા પોરબંદરની યુવતીને પિસ્તોલ સાથે વીડિયો બનાવવો ભારે પડ્યો, થઇ આ કાર્યવાહી

• યુવતીને હથિયાર સાથે વીડિયો બનાવો ભારે પડ્યો
• પોલીસે યુવતીને ગણતરીના કલાકોમાં ઝડપી પાડી
• આર્મ એક્ટ હેઠળ નોંધ્યો ગુનો

પોરબંદરના નેશનલ હાઇવે રોડ પરના યુવતીના પિસ્તોલ સાથેના વાયરલ વીડિયોના આધારે પોલીસ તપાસમાં લાગી હતી. તપાસના અંતે પોલીસે યુવતી અને અન્ય એક શખ્સ પર આર્મ એક્ટ અંતર્ગત ગુન્હો નોંધ્યો હતો અને પોલીસે ગણતરીની કલાકોમાં જ બંને શખ્સને ઝડપી પાડ્યા હતા.

કારમાંથી ઉતરી પિસ્તોલ હાથમાં લઇને એક્શન કરતા 2 વીડિયો બનાવ્યા હતા
આજના સોશિયલ મીડિયાના યુગમાં યુવાનો કોઈને કોઈ રીતે ફેમસ થવાના પ્રયત્નો કરતા હોય છે. ત્યારે 2 દિવસ પૂર્વે પોરબંદર નજીકના નેશનલ હાઇવે પર એક યુવતી કારમાંથી ઉતરી પિસ્તોલ હાથમાં લઈને એક્શન કરી ગીતો સાથેના 2 વીડિયો સોશિયલ મીડિયામાં વાયરલ થયા હતા. વાયરલ વીડિઓને આધારે ઉદ્યોગનગર પોલીસ ખાતે તપાસ શરૂ કરી હતી. તપાસ દરમિયાન પોરબંદરના સીતારામનગરમાં રહેતી અંજલી ચાવડા નામની યુવતી એ વીડિયો સોશિયલ મીડિયામાં મુક્યો હોવાનું સામે આવ્યું હતું.

એક્સ આર્મીમેનની લાઇસન્સવાળી હતી રિવોલ્વર
પોલીસે ગણતરીની કલાકોમાં જ અંજલી ચાવડાને ઝડપી પાડી હતી અને પૂછપરછ હાથ ધરી હતી. પૂછપરછ દરમિયાન 9 મહિના પહેલાં આ વીડિયો બનાવ્યો હતો. તેમજ રિવોલ્વર તેમના સંબંધી પ્રફુલ મકવાણાએ આપી હોવાની કબૂલાત આપી હતી. આ રિવોલ્વર એક્સ આર્મીમેન પ્રફુલ મકવાણાની હતી અને લાઇસન્સવાળી હતી. જેથી પોલીસે યુવતી તેમજ પ્રફુલ મકવાણા  વિરુદ્ધ આર્મ એક્ટ હેઠળ ગુનો નોંધવામાં આવ્યો હતો.

ફોલોઅર્સ વધારવા બનાવ્યો હતો આવો વીડિયો
યુવતીએ સોશિયલ મીડિયામાં ફોલોઅર્સ વધારવા માટે પિસ્તોલ સાથે વીડિયો અપલોડ કર્યો હોવાનું જણાવ્યું હતું. હાલ તો પોલીસે બને શખ્શો વિરુદ્ધ ગુન્હો નોંધાયો છે અને પોલીસે 2 મોબાઈલ અને રિવોલ્વર જપ્ત કરી આગળની કાર્યવાહી હાથ ધરી છે.