Health Tips / શું છે મહિલાઓને સતાવતી પીસીઓડી સમસ્યા, તેનાથી કેવી રીતે બચી શકાય?

• પીસીઓડી અથવા પીસીઓએસની સમસ્યાનું નિરાકરણ
• ગામડાની સ્ત્રીઓમાં વધી રહી છે સમસ્યા

પીસીઓડી અથવા પીસીઓએસની સમસ્યામાં મહિલાના અંડાશયમાં પુરુષ હોર્મોનનું સ્તર વધી જાય છે. આ કારણે વજન વધવુ, વધુ વાળ ઉગવા, ચહેરા પર ખીલ થવા, માસિકમાં અનિયમિતતા જેવી સમસ્યાઓ થાય છે. 

આ બિમારીનું સ્પષ્ટ કારણ તો જાણવા મળ્યુ નથી, પરંતુ મોટાભાગના કેસમા તણાવ અને બગડેલી જીવનશૈલી તેમજ ખાણીપીણીના કારણે પણ હોર્મોનનુ અસંતુલન મુખ્ય કારણ બને છે. મેનોપોઝ બાદ પણ જો બ્લીડિંગ થતુ હોય તો સતર્ક રહો. ઉંમરના આ પડાવ પર દરેક પ્રકારના લક્ષણ સામે આવે છે.

સતર્ક રહો

નાની ઉંમરમાં શરીરમાં કોઇ ગરબડ અથવા કોઇ પણ ઉંમરે જો આ રોગના લક્ષણો જોવા મળે તો તાત્કાલિક ઇલાજ કરાવી લેવો જોઇએ. નહીંતર ભવિષ્યમાં ડાયાબિટીસ, બ્લડ પ્રેશર, હ્રદય સંબંધિત રોગો અને ગર્ભાશયના કેન્સરની શક્યતાઓ વધી જાય છે.

ઇલાજની રીત

આ રોગમાં ડોક્ટર સૌથી પહેલા તેના લક્ષણ અંગે તપાસે છે. ત્યારબાદ લક્ષણોના આધારે ફિઝિકલ એગ્ઝામિનેશન ઉપરાંત બ્લડ ટેસ્ટ કરીને ઇલાજની પધ્ધતિ નક્કી કરવામાં આવે છે. આ રોગથી પિડાતી વ્યક્તિને જીવનશૈલીમાં બદલાવ અને જરુરિયાત અનુસાર હોર્મોનની દવાઓ પણ આપવામાં આવે છે.

લાઇફસ્ટાઇલ બદલો

તણાવમુક્ત રહો. આ માટે નિયમિત મેડિટેશન કરો અને સંગીત સાંભળો તેમજ પુસ્તકો વાંચો. પગપાળા ચાલવુ, જોગિંગ, યોગ, જુમ્બા, ડાન્સ, એરોબિક્સ, સાઇકલિંગ, સ્વિમિંગ કે કોઇ ફિઝિકલ એક્ટિવિટી કરો. 

જંકફુડ કે તળેલુ ખાવાના બદલે પૌષ્ટિક સંતુલિત આહાર લો. લીલા શાકભાજી, અળસી, દહીં, કિશમિશ, અખરોટ અને સિઝનલ ફ્રુટ્સ આહારમાં સામેલ કરો આ ઉપરાંત પિત્ઝા,
પાસ્તા, ડબ્બામાં મળતી વસ્તુઓ કે પ્રોસેસ્ડ ફુડ ન ખાવ.