વિદેશ યાત્રા / રશિયા-યુક્રેન યુદ્ધ વચ્ચે આગામી મહિને PM મોદી જઇ શકે છે વિદેશ પ્રવાસ, આ 3 દેશોની કરશે મુલાકાત

• PM મોદી આગામી મહિને જઇ શકે છે વિદેશ પ્રવાસ પર
• મોદી જર્મની, ડેન્માર્ક અને ફ્રાન્સની મુલાકાત લઈ શકે છે
• પીએમ મોદીની આ વર્ષની આ પ્રથમ વિદેશ યાત્રા હશે

વડાપ્રધાન નરેન્દ્ર મોદી મે મહિનામાં ત્રણ દેશોના પ્રવાસે જઈ શકે છે. મેના પ્રથમ સપ્તાહમાં તેઓ જર્મની, ડેન્માર્ક અને ફ્રાંસના પ્રવાસે જશે. જણાવી દઇએ કે, પીએમ મોદીની આ વર્ષની આ પ્રથમ વિદેશ યાત્રા હશે. આવી સ્થિતિમાં તેના અનેક અર્થ નીકાળી શકાય.

1મેથી 5 મે વચ્ચે વડાપ્રધાન મોદી યુરોપિયન દેશોના પ્રવાસે જઈ શકે છે

એવાં અહેવાલ પણ સામે આવી રહ્યાં છે કે, 1મેથી 5 મે વચ્ચે વડાપ્રધાન મોદી યુરોપિયન દેશોના પ્રવાસે જઈ શકે છે. જો કે, આ અંગે હજુ સુધી કોઈ ઔપચારિક જાહેરાત કરવામાં આવી નથી આવી પરંતુ તૈયારીઓ પૂર્ણ કરી લેવામાં આવી છે. પીએમ મોદીની મુલાકાતની વાત કરીએ તો તેઓ જર્મનીમાં ચાન્સેલર ઓલાફ શુલ્ટ્ઝને મળી શકે છે. જ્યારે ડેન્માર્કમાં પીએમનું ફોકસ નોર્ડિક દેશો સાથે સંબંધો સુધારવા પર હોઇ શકે છે. એવું પણ કહેવામાં આવી રહ્યું છે કે, ડેન્માર્કમાં પીએમ મોદી ભારતીય સમુદાયના લોકો સાથે પણ વાતચીત કરી શકે છે.

રશિયા-યુક્રેન યુદ્ધ દરમ્યાન પીએમ મોદીની આ મુલાકાતનું મહત્વ ઘણું વધી ગયું

હાલમાં રશિયા-યુક્રેન યુદ્ધ ચાલી રહ્યું છે, તેના કારણે પણ પીએમ મોદીની આ મુલાકાતનું મહત્વ ઘણું વધી ગયું છે. ભારતે આ યુદ્ધને લઈને તટસ્થ વલણ અપનાવ્યું છે અને ભારતે એક વખત પણ રશિયા વિરુદ્ધ મતદાન કર્યું નથી. આવી સ્થિતિમાં, પીએમ મોદી યુરોપિયન દેશોના પ્રવાસ દરમિયાન તે તણાવ દૂર કરવાનો પ્રયાસ કરી શકે છે. રશિયન તેલ ખરીદવાને લઈને શરૂ થયેલા વિવાદ અંગે પણ ચર્ચા શક્ય છે.

ભારત સરકારના એક વરિષ્ઠ અધિકારીએ જણાવ્યું કે, યુરોપ સાથે ભારતના સંબંધો ખૂબ જ મહત્વપૂર્ણ છે. આવી સ્થિતિમાં, આ મુલાકાત દરમિયાન પણ પીએમ મોદી પ્રાદેશિક સહયોગ, વેપાર અને અર્થવ્યવસ્થા પર સૌથી વધુ ભાર આપશે. ભારતની ચિંતા એ પણ છે કે યુરોપિયન યુનિયન દેશની દ્રષ્ટિએ ત્રીજો સૌથી મોટો વેપારી ભાગીદાર છે. ત્યારે રશિયા-યુક્રેન યુદ્ધના કારણે તે ભાગીદારીને અસર ના પડે તેનો ભારત સંપૂર્ણ પ્રયાસ કરશે.