ડિજિટલ / PhonePe એપનું કદ વધ્યું અધધ 5 અબજ ટ્રાન્સેક્શન ; 1 વર્ષમાં 5 ગણી વૃદ્ધિ

ડિજિટલ પેમેન્ટ પ્લેટફોર્મ PhonePeએ શુક્રવારે જાહેરાત કરી હતી કે તેમની એપમાં 5 અબજ ટ્રાન્સેક્શન પૂર્ણ થયા છે. 

બેગ્લોરમાં હેડક્વાર્ટર ધરાવતી PhonePeએ ગયા વર્ષે નવેમ્બરમાં 1 અબજ ટ્રાન્સેક્શન્સ કર્યા હતા અને હવે ફક્ત એક વર્ષમાં તેણે આશ્ચર્યજનક રીતે 5 ગણી વૃદ્ધિ નોંધાવી છે એમ કંપનીએ નિવેદન આપ્યું હતું.

PhonePeના સ્થાપક અને CEO સમીર નિગમે નિવેદન આપ્યું હતું કે " અમારી આ 4 વર્ષની સફર ખૂબ અદભુત રહી છે. ફક્ત આર્થિક વૃદ્ધિ જ નહિ પણ પેમેન્ટ અને નાણાકીય સેવાઓ વડે અમે સારી એવી સામાજિક અસરો ઉભી કરી શક્યા છીએ. 

અમારું માનવું છે કે MSME ક્ષેત્ર ભારતીય અર્થતંત્રનું એન્જીન છે અને MSMEની સુવિધા વધે એ પ્રકારની ટેક્નોલોજી વિકસાવવી ખૂબ જરૂરી છે."

નોંધનીય છે કે ભારતમાં PhonePeના તોતિંગ 17 કરોડ 50 લાખ યુઝર્સ છે. ભારતના 215 શહેરોની 80 લાખથી વધુ MSMEs પેમેન્ટના વિકલ્પ તરીકે PhonePeનો ઉપયોગ કરે છે.  PhonePeના કુલ ટ્રાન્સેક્શનનું 56% નાના શહેરો અને નગરોમાંથી થાય છે. 

આ વર્ષે  PhonePeએ તેમના ગ્રાહકોને switch સુવિધા આપી છે જેમાં તેઓ  PhonePe એપની અંદર જ ખાણીપીણી, કરિયાણુ, શોપિંગ ફેસ્ટિવલ, ટ્રાવેલ વગેરે એપ્સની સેવા એક જ ટચથી માણી શકશે.

દેશના 15 કરોડ જેટલા બેન્ક એકાઉન્ટ્સ PhonePe એપ સાથે લિંક થયેલા છે. આ પ્લેટફોર્મ ઉપર 5 કરોડ 60 લાખ જેટલા ક્રેડિટ અને ડેબિટ કાર્ડ સેવ થયેલા છે.