પાટણ: ગાંધીનગરમાં ભાજપનું ક્લસ્ટર સંમેલન યોજાયા બાદ હવે ભાજપની નજર ઉત્તર ગુજરાતની ત્રણ લોકસભાની સીટ પર છે. ભાજપ આગામી 8મી ફેબ્રુઆરીના રોજ ક્લસ્ટર સંમેલન યોજશે. પાટણ બનાસકાંઠા અને મહેસાણા એમ ત્રણ લોકસભાની સીટ માટે ભાજપ ક્લસ્ટર સંમેલન યોજવા જઈ રહ્યુ છે.
આ કાર્યક્રમમાં હરિયાણાના સીએમ મનોહરલાલ ખટ્ટર પણ હાજર રહેશે. ઉલ્લેખનીય છે કે લોકસભાની ચૂંટણીની તડામાર તૈયારીઓ થઈ રહી છે ત્યારે હવે ભાજપનું આ સંમેલન મહત્વનું સાબિત થશે. મહત્વની વાત છે કે તાજેતરમાં જ ભાજપે ગાંધીનગર ખાતે ક્લસ્ટર સંમેલન યોજ્યુ હતું.
જેમાં મુખ્યમંત્રી વિજય રૂપાણી અને જીતુ વાઘાણીના અધ્યક્ષસ્થાને આ કાર્યક્રમ યોજાયો હતો. જેમાં ચાર લોકસભા બેઠક માટે ચર્ચા વિચારણા હાથ ધરાઈ હતી. કેન્દ્રીય કક્ષાએ નિશ્ચિત થયા મુજબ રાજ્યમાં 9 જગ્યાએ સંમેલન યોજાશે. ત્યારે આ ભાજપનું બીજું ક્લસ્ટર સંમેલન પાટણ ખાતે યોજાવા જઈ રહ્યુ છે.
ગાંધીનગરમાં યોજાયું ક્લસ્ટર સંમેલન
ગાંધીનગરનાં કમલમ ખાતે ભાજપનું ક્લસ્ટર સંમેલન યોજાયું છે. આ સંમેલનમાં મુખ્યમંત્રી રૂપાણી જીતુ વાઘાણી ભીખુ દલસાણીયા હાજર રહ્યાં હતાં. લોકસભાની 4 બેઠકોનું કલસ્ટર સંમેલન છે. અમદાવાદની બે બેઠકો ગાંધીનગર અને સાબરકાંઠાની બેઠક અંગે ચર્ચા કરવામાં આવી છે.
4 લોકસભા બેઠકનાં પ્રભારી ઇન્ચાર્જ અને સહઇન્ચાર્જ પણ બેઠકમાં હાજર રહ્યાં હતાં. મહાનગર પાલિકાનાં ચૂંટાયેલા કોર્પોરેટર વિવિધ કમિટીનાં ચેરમેન અને મેયર પણ હાજર રહ્યાં હતાં. જિલ્લા પંચાયતનાં પ્રમુખ અને સભ્યો પણ ત્યાં હાજર રહ્યાં હતાં. ચારેય લોકસભા બેઠકોનાં પૂર્વ સાંસદ પણ હાજર રહ્યાં હતાં.
ઉલ્લેખનીય છે કે લોકસભાની ચૂંટણીને લઇને ગુજરાતમાં કાઉન્ટ ડાઉન શરૂ થઇ ગયું છે. ત્યારે બંને પક્ષો લોકસભાની સૌથી વધુ સીટો મેળવવા માટે ભાજપ અને કોંગ્રેસ બંને પક્ષો એડીચોટીનું જોર લગાવી રહ્યાં છે.
જેને લઇને તેનાં ભાગરૂપે આજનાં રવિવારનાં રોજ ભાજપનું ગાંધીનગરમાં ક્લસ્ટર સંમેલન કાર્યક્રમનું આયોજન કરાયું છે. તમને જણાવી દઇએ કે રાજ્યમાં ભાજપનાં આવાં 9 જેટલી જગ્યાએ સંમેલનો યોજાવાનાં છે. જેનું આ પ્રથમ સંમેલન ગાંધીનગર ખાતે યોજાયું છે.