ક્રિકેટ / 'પંત પહેલી પસંદ નથી', કોચ દ્રવિડે T20 વર્લ્ડકપ પહેલા ઋષભ પંતને લઈને કહી દીધી મોટી વાત

• ઋષભ પંતને પાકિસ્તાન સામે પ્લેઈંગ ઈલેવનમાં સ્થાન ન મળ્યું 
• પંત હાલ ટી20 ફોર્મેટમાં પહેલી પસંદના વિકેટકીપર નથી
• પંત સિવાય ટીમ ઈન્ડિયામાં દિનેશ કાર્તિક સિનિયર વિકેટકીપર છે

એશિયા કપમાં ભારતીય ક્રિકેટ ટીમની પહેલી મેચમાં ઋષભ પંતને પાકિસ્તાન સામે પ્લેઈંગ ઈલેવનમાં સ્થાન ન મળવાને લઈને ઘણી ચર્ચા થઈ હતી. બધા જાણે છે કે ઋષભ પંતને ટીમ ઈન્ડિયાનો હાલનો નંબર વન વિકેટકીપર માનવામાં આવે છે અને આવી સ્થિતિમાં તેને ડ્રોપ કરવા પર ઘણા સવાલો ઉભા થયા હતા. પણ હાલ મળતી જાણકારી પરથી એવું લાગી રહ્યું છે કે તેને ટી20 ફોર્મેટમાંથી તેનું ડિમોશન કરવામાં આવ્યું છે. 

આજે ટીમ ઈન્ડિયા ફરી એક વખત પાકિસ્તાન સામે મેદાનમાં ઉતરવા જઈ રહી છે. આ મેચ પહેલા ટીમ ઇંડિયન કોચ રાહુલ દ્રવિડે પ્રેસ કોન્સફરન્સમાં સાફ સાફ કહી દીધું હતું કે પંત હાલ ટી20 ફોર્મેટમાં પહેલી પસંદના વિકેટકીપર નથી. પંત સિવાય ટીમ ઈન્ડિયામાં દિનેશ કાર્તિક સિનિયર વિકેટકીપર છે. જે બંને મેચમાં ટીમ ઈન્ડિયાનો હિસ્સો રહ્યા છે. 

મુખ્ય કોચ દ્રવિડે આવતા મહિને યોજાનાર T20 વર્લ્ડ કપ તરફ ઈશારો કરતા કહ્યું હતું કે, “ટીમમાં કોઈ પ્રથમ પસંદગીનો વિકેટકીપર નથી. અમે પરિસ્થિતિઓ, મેદાનની સ્થિતિ અને વિરોધી ટીમ અનુસાર રમીએ છીએ અને તે મુજબ બેસ્ટ ઇલેવન પસંદ કરીએ છીએ." 

સાથે જ રાહુલ દ્રવિડે એમ પણ કહ્યું હતું કે, "દરેક પરિસ્થિતિ માટે પહેલી પસંદગીની પ્લેઈંગ ઈલેવન ન હોય શકે. તે બદલાતી રહેશે. તે દિવસે પાકિસ્તાન સામેના મેચમાં અમને લાગ્યું કે દિનેશ કાર્તિક એ મેચ માટે યોગ્ય પસંદગી છે." 

 
ટેસ્ટ ક્રિકેટમાં અને હવે ODI ક્રિકેટમાં પણ ઋષભ પંતે પ્લેઈંગ ઈલેવનમાં પોતાનું સ્થાન નિશ્ચિત કરી લીધું છે અને તે હાલ નંબર વન વિકેટકીપર છે પરંતુ T20માં દિનેશ કાર્તિકની વાપસીએ તેની જગ્યા મુશ્કેલીમાં મૂકી છે.  2022માં પંતે 13 T20 ઈન્ટરનેશનલ ઈનિંગ્સમાં માત્ર 260 રન બનાવ્યા છે અને તેનો સ્ટ્રાઈક રેટ માત્ર 135 રનનો છે.