એક તરફ હોસ્પિટલમાં સુવિધા અને સારવારના નામ પર દર્દીઓ પાસેથી મસમોટી ફી લેવામાં આવે છે તો બીજી તરફ હોસ્પિટલની લાપરવાહીને કારણે જ લોકોના જીવ જોખમાય છે. આવુ એટલા માટે કારણ કે હોસ્પિટલના સંચાલકો પોતાની ફરજ ભૂલી જાય છે. ફરજ એ છે કે મે઼ડિકલ વેસ્ટનો યોગ્ય નિકાલ કરવો. પરંતુ વડોદરાના પાદરામાં હોસ્પિટલોમાં મેડિકલ વેસ્ટનો યોગ્ય નિકાલ કરવામાં આવતો નથી. આ લાપરવાહી સામે વીટીવી ન્યૂઝના કેમેરામાં કેદ થઇ છે.
મોતીનગર રોડ પર જાહેરમાં મેડિકલ વેસ્ટ ફેંકાયો
આપ જોઇ શકો છો કે મોતીનગરનો આ રોડ છે. રોડ પર જાહેરમાં જ મેડિકલ વેસ્ટ જોવા મળી રહ્યો છે. ઇન્જેક્શન, સિરીંજ સહિતનો મેડિકલ વેસ્ટ આ રીતે જાહેરમાં ફેંકાતા શહેરીજનોમાં રોષ ફાટી નીકળ્યો છે. શહેરીજનોના આરોગ્ય સામે જોખમ ઉભુ થયું છે. હોસ્પિટલમાં વપરાયેલી દવા, ઇન્જેક્શનો, સીરિંજ બોક્સ જાહેરમાં ફેંકવામાં આવ્યા છે. સામાન્ય રીતે મેડિકલ વેસ્ટને ડિસ્પોઝ કરવાની એક સિસ્ટમ હોય છે.તંત્ર દ્વારા પણ આ અંગે અનેક વાર સૂચના આપવામાં આવે છે તેમ છતાં નિયમોનું કોઇ પાલન થતુ નથી.
શું કરી રહ્યું છે વડોદરાનું તંત્ર ?
ત્યારે આવા લોકો સામે તંત્ર પણ કાર્યવાહી કરવામાં નિષ્ફળ સાબિત થયુ છે. એક તરફ લોકો પાણીજન્ય રોગોથી હેરાન પરેશાન તો છેજ. તેમાં પણ પાછો કોરોનાકાળ. ત્યારે આવા સમયમાં હોસ્પિટલ સંચાલકોની લાપરવાહી કોઇનો જીવ લઇ શકે છે. આવુ તો અનેકવાર સામે આવ્યુ છે પરંતુ તંત્ર પણ કોઇ કાર્યવાહી ન કરીને આ કામગીરીમાં મૂક સંમતિ દર્શાવી રહ્યું છે. ત્યારે હવે જોવુ રહ્યું કે વીટીવીના અહેવાલ બાદ તંત્ર દ્વારા કોઇ કાર્યવાહી કરવામાં આવશે કે કેમ ? તંત્ર દ્વારા આવી લાપરવાહ હોસ્પિટલ સામે દંડ ફટકારવામાં આવશે કે કેમ તે જોવુ રહ્યું.
વીટીવી ગુજરાતીના સળગતા સવાલ
આ હોસ્પિટલોને જાહેરમાં મેડિકલ વેસ્ટ ફેંકવાનો પરવાનો કોને આપ્યો?
શહેરીજનોના સ્વાસ્થય સામે જોખમ ઉભુ થાય છે તેની કેમ કોઇને પરવાહ નથી ?
શું પાદરાની હોસ્પિટલોમાં મેડિકલ વેસ્ટના યોગ્ય નિકાલની કોઇ વ્યવસ્થા નથી?
શું તંત્ર મેડિકલ વેસ્ટના યોગ્ય નિકાલની વ્યવસ્થાનું મોનિટરિંગ નથી કરતું?
ક્યાં સુધી જનતાના આરોગ્ય સાથે ચેડા થતા રહેશે?
આ બેદરકાર હોસ્પિટલો પર પગલાં ક્યારે લેવાશે?
આ બેફામ હોસ્પિટલો સામે કોઇ દાખલારૂપ કાર્યવાહી થશે ખરી?