કોરોના વાયરસ / લૉકડાઉનના વિરોધમાં પરપ્રાંતિઓનું તાંડવ, કહ્યું- 'અમને ઘરે જવા દો, અમે ભૂખે મરી રહ્યા છીએ'

• પરપ્રાંતિઓ દ્વારા લોકડાઉનનો વિરોધ
• અમને ઘરે જવા દો
• અમે ભૂખે મરી રહ્યા છીએ ઘરે મોકલો

લોકડાઉન લંબાવવાની અફવાથી ગિન્નાયેલા આ કારીગરોએ રસ્તા પર આગજની કરી હતી અને પોતાનો વિરોધ નોંધાવ્યો હતો. આ લોકોના વિરોધનો વિરોધ એટલો તિવ્ર હતો કે, રસ્તા પર જતી એમ્બ્યુલન્સ પણ ન બક્ષી અને તેના પર પથ્થરમારો કર્યો. જેથી પોલીસે તાત્કાલિક ઘટનાસ્થળે પહોંચી અને ટોળાના આગેવાનોની અટકાયત કરી લીધી.

રોડ રસ્તાઓ પર તાંડવ મચાવનારા આ પરપ્રાંતિયો ઉત્તરપ્રદેશ, બિહાર અને ઓડિશાના છે. તેઓ અહીં સુરતમાં કામ કરે છે પરંતુ હાલ કામધંધા બંધ થતા તેમની રોજગારી છીનવાઈ ગઈ છે. એટલે રોજનું કમાઇને રોજ ખાનારા આ મજુરો લોકડાઉનના કારણે ત્રસ્ત છે અને તેમનો પરિવાર ભૂખ્યો છે. એટલે તેઓ વિરોધ કરી રહ્યા છે.

કેટલીક જગ્યાએ પોલીસે માનવતા દાખવી

પોલીસે હાલ વિરોધ કરી રહેલા મજૂરોની અટકાયત તો કરી લીધી છે. પરંતુ માનવતા દાખવીને તેમને પોલીસ સ્ટેશનમાં જમાડી રહી છે. સેવાભાવી લોકો પણ તેને જમાડવા માટે આવ્યા છે. જોકે, ગુજરાત પોલીસે લોકડાઉનનું ઉલ્લંઘન કરનારા તમામ લોકો સામે પગલા લેવાની પણ ચેતવણી આપી છે.

દિવાળીના વેકેશન બાદથી લૂમ્સના કારખાનાઓ હજુ  પાટે ચડ્યા જ ન હતા

લોકડાઉન લૂમ્સના મજૂરો માટે પડ્યા પર પાટા સમાન છે. કારણ કે, સુરતમાં દિવાળીના વેકેશન બાદથી લૂમ્સના કારખાનાઓ હજુ  પાટે ચડ્યા જ ન હતા ત્યા લોકડાઉન થઈ ગયું. હવે તેઓની હાલત કફોડી થઈ રહી છે. એટલે પરત જવા માગે છે. કારણ કે, સરકારે સામાજિક સંસ્થાઓ દ્વારા ચલાવાતા રાહતના રસોડાઓ પણ બંધ કરાવી દીધા છે. પરિવારની ભૂખ અને વાયરસના ભય વચ્ચે હાલતો શ્રમિકોની રાહ મુશ્કેલ બની છે.