કોરોના વાયરસ સામે સમગ્ર દુનિયા નીડરતાથી ઝીંક ઝીલી રહ્યું છે. રોજ ને રોજ વધતા જતા કેસીસની સામે કોરોનાના દર્દીઓ જેમને આ રોગ મટી જાય છે તેમની પણ સંખ્યા ધીમી પણ મક્કમ ગતિએ વધી રહી છે. ગુજરાતના અમદાવાદ શહેરના સૌથી શરૂઆતમાં કેસની મહિલા આજે કોરોના વાયરસથી મુક્ત થઇ છે. હોસ્પિટલથી ઘરે પહોંચતી વેળાએ ફ્લેટમાં લોકો તેનું તાળી પાડીને સ્વાગત કર્યું. આ રોગને હરાવવા બદલ આ મહિલાએ અમદાવાદ માટે એક પ્રેરણારૂપ દ્રષ્ટાંત મુક્યું છે.
અમદાવાદ શહેરમાં ફિનલેન્ડથી યાત્રા કરીને પરત ફરેલી મહિલાને કોરોના પોઝીટીવ આવતા શહેરમાં ભયનો માહોલ ફેલાયો હતો. જો કે સકારાત્મક વાત એ છે કે આ મહિલાએ સાવચેતીના ભાગરૂપે પોતાની જાતને સેલ્ફ આઈસોલેશનમાં રાખી હતી.
પોતાના સોશ્યલ મીડિયા ઉપર તેણે લખ્યું હતું કે તે નોર્ધન લાઈટ્સ જોવા માટે ફિનલેન્ડની યાત્રાએ ગઈ હતી જ્યાં વધી કાળજી રાખ્યા છતાં તેને ચેપ લાગી ગયો હતો. તેણે સ્પષ્ટતા કરી હતી કે તે કોઈના સંપર્કમાં આવી નથી અને લોકોને સોશ્યલ મીડિયા ઉપર ચાલી રહેલી અફવાઓથી દુર રહેવા કહ્યું હતું.
ઇન્સ્ટાગ્રામ ઉપર તેણે પોતાના આ રોગની અપડેટ્સ તે સતત મુકતી હતી. તેણે જણાવ્યું હતું કે તેને થોડા દિવસ કફના લક્ષણો રહ્યા બાદ થોડા સમય માટે શ્વાસ લેવામાં તકલીફ પડવાની શરૂઆત થઇ હતી. જો કે ડોકટરોએ કહેલી દવાઓ તેણે સતત ચાલુ રાખી હતી.
આ લક્ષણો ઠીક થતાની સાથે જ તેનો સતત બીજી વખત કોરોના ટેસ્ટ નેગેટીવ આવતા તેને હોસ્પિટલથી રજા આપવામાં આવી હતી. તેના ઘરે જયારે તે પાછી ફરી હતી ત્યારે તેને પાડોશીઓએ તાળીઓથી વધાવી લીધી હતી અને સ્વસ્થ થવા ઉપર તેને અભિનંદન પાઠવ્યા હતા.
આ મહિલા સ્વસ્થ થઇ ગઈ છે જે સમગ્ર ગુજરાત માટે એક આનંદ અને પ્રેરણાની વાત છે અને એ વાતનું પ્રતિક છે કે આપણે હિમ્મત અને સાચવણીથી આ વાયરસને હરાવી દઈશું.