જંગ / યૂક્રેન સાથે કોઈ પણ ભોગે યુદ્ધ કરવાનો રશિયાનો ઈરાદો, પ્રમુખ પુતિનના ચોંકાવનારા નિવેદનથી મળ્યો સંકેત

• યૂક્રેન સાથે કોઈ પણ ભોગે યુદ્ધ કરવા રશિયાનો વિચાર
• પ્રમુખ પુતિને કહ્યું, શાંતિની વાતો ભૂલી જજો 
• પુતિને કરી રશિયન સુરક્ષા પરિષદની અસાધારણ બેઠક

રશિયા-યુક્રેન વચ્ચેનો તણાવ હાલ ઓછો થાય તેમ લાગતું નથી અને રશિયાના રાષ્ટ્રપતિ પુતિનનું વલણ વધુ આકરું બની ગયું છે. એએફપીએ વ્લાદિમીર પુતિનને ટાંકીને કહ્યું છે કે યુક્રેન સંઘર્ષને સમાપ્ત કરવા માટે શાંતિ યોજના બનવાની કોઈ સંભાવના નથી. રશિયાના રાષ્ટ્રપતિ વ્લાદિમીર પુતિને પૂર્વી યૂક્રેનમાં વધી રહેલા તણાવ વચ્ચે સોમવારે રશિયન સુરક્ષા પરિષદની અસાધારણ બેઠક કરી હતી. બેઠકમાં તેમણે કહ્યું કે યૂક્રેન વિવાદ ખતમ કરવા માટે શાંતિ યોજના બનાવવાની કોઈ સંભાવના નથી. પુતિનના આ નિવેદન બાદ એવો સંકેત મળ્યો છે કે રશિયા કોઈ પણ ભોગે યૂક્રેન સાથે યુદ્ધ કરવા તૈયાર છે. 

'No prospects' for peace plan to end Ukraine conflict, AFP quotes Russia President Vladimir Putin pic.twitter.com/4sxZszvYtE

— ANI (@ANI) February 21, 2022

રશિયા પૂર્વી યુક્રેનના પ્રજાસત્તાક રાજ્યોને આપી શકે મંજૂરી 

આ બેઠકમાં પુતિને કહ્યું કે, રશિયા પૂર્વી યુક્રેનના અલગાવવાદી ગણતંત્રોની સ્વતંત્રતાને માન્યતા આપવાની વિનંતી પર વિચાર કરી રહ્યું છે. પૂર્વી યુક્રેનના બે સ્વઘોષિત પ્રજાસત્તાકના બળવાખોર નેતાઓએ પુતિનને તેમની સ્વતંત્રતાને માન્યતા આપવા અપીલ કરી હતી. રશિયાના વિદેશ પ્રધાન લાવરોવે કહ્યું છે કે તેઓ ગુરુવારે જિનીવામાં અમેરિકાના વિદેશ પ્રધાન એન્ટની બ્લિન્કેનને મળશે.

સેટેલાઈટ તસવીરોએ ખોલી રશિયાની પોલ 
રશિયા અને યુક્રેન બંને તણાવે યુદ્ધને ટાળવાના રાજદ્વારી પ્રયત્નો પર ભાર મૂક્યો છે. પરંતુ સેટેલાઇટની તસવીરો મોસ્કોના અસલી ઇરાદાઓ બતાવી રહી છે. વાસ્તવમાં હાઈ રિઝોલ્યુશન સેટેલાઈટ તસવીરોમાં જોવા મળી રહ્યું છે કે રશિયાએ પોતાના પડોશી દેશ યુક્રેન સાથેની સરહદ પર સૈન્ય ગતિવિધિઓ તેજ કરી દીધી છે. મેક્સએઆર દ્વારા બહાર પાડવામાં આવેલી હાઇ-રિઝોલ્યુશન સેટેલાઇટ ઇમેજમાં બેલ્ગોરોડ, સોલોએટી અને વાલુઇકીમાં બખ્તરબંધ ઉપકરણો અને સૈનિકોના કેટલાક નવા વિસ્તારોની તૈનાતીનો ઘટસ્ફોટ કરવામાં આવ્યો છે.

યુક્રેનની સરહદથી 30 કિમી દૂર તૈનાતી
સેટેલાઇટ તસવીરોમાં જોવા મળી રહ્યું છે કે યુક્રેન સાથેની સરહદથી લગભગ 15 કિલોમીટર ઉત્તરમાં રશિયાના શહેર વાલુયકીની પૂર્વમાં કેટલાક હથિયારો તૈનાત કરવામાં આવ્યા છે. બેલગોરોડના ઉત્તર-પશ્ચિમમાં આવેલા અનેક નવા વિસ્તારોમાં પણ જમાવટ જોવા મળી છે. આમાંની મોટાભાગની જમાવટ યુક્રેન સાથેની સરહદથી લગભગ ૩૦ કિલોમીટરના અંતરે કરવામાં આવી છે. અહીં મોટાભાગના હથિયારો અને સૈનિકો તૈનાત કરવામાં આવ્યા છે. અન્ય કંપની-કદના એકમોને ખેતર અને ઔદ્યોગિક વિસ્તારોમાં તૈનાત કરવામાં આવ્યા છે.