ઍલર્ટ / દેશનાં 12 રાજ્યો માટે આગામી 72 કલાક ભારે: તોફાન સાથે વરસાદ-કરાવૃષ્ટિનું ‘એલર્ટ’ જાહેર

• ભારતીય હવામાન વિભાગ દ્વારા યલો એલર્ટ જાહેર
• આગામી ૭૨ કલાક ૧૨ રાજ્ય માટે ભારે
• આંધી સાથે વરસાદ-કરાવૃષ્ટિનું ‘એલર્ટ’

માર્ચ મહિનામાં જ્યારે ગરમી પડવી જોઈએ ત્યારે તેના બદલે આંધી-તોફાન સાથે ભારે વરસાદ અને કરાવૃષ્ટિના કારણે દેશમાં લાખો હેક્ટર જમીન પર ઊભા પાકને ભારે નુકસાન થયું છે. કમોસમી વરસાદના કારણે રવી પાક અને શાકભાજીને મોટું નુકસાન થયું છે. હરિયાણાના ૧૧ જિલ્લાના ૨,૭૨૦ ગામમાં ૧,૫૭,૫૫૭ એકર જમીન પરનો પાક નાશ પામ્યો છે. રાજસ્થાનના ૧૦ જિલ્લામાં ૪૦ ટકા પાક બરબાદ થઈ ગયો છે. પંજાબના પટિયાલા, સંગરુર, ફતેહગઢ, લુધિયાણા સહિતના જિલ્લામાં ચાર લાખ હેક્ટર જમીન પરના ઘઉંના પાકને ભારે નુકસાન પહોંચ્યું છે.
 

વરસાદ અને કરા પડવાની શક્યતા
માર્ચ મહિનાનું ત્રીજું સપ્તાહ ચાલી રહ્યું છે અને હવામાનમાં ઝડપથી ઉપરાછાપરી પલટા આવી રહ્યા છે. ભારતીય હવામાન વિભાગના જમાવ્યા અનુસાર આજથી ૨૫ માર્ચ સુધી એટલે કે બે દિવસ ઉત્તર-પશ્ચિમ ભારતમાં એક વધુ વેસ્ટર્ન ડિસ્ટર્બન્સ સક્રિય થતાં દેશનાં ૧૨ રાજ્ય માટે આગામી ૭૨ કલાક ભારે રહેશે. ખાનગી હવામાન એજન્સી સ્કાયમેટ વેધરના જણાવ્યા અનુસાર આ ૧૨ રાજ્યમાં આંધી-તોફાન સાથે મોટા પાયે વરસાદ અને કરા પડવાની શક્યતા છે અને તેથી એલર્ટ જારી કરવામાં આવ્યું છે.

૨૪થી ૨૬ માર્ચ દરમિયાન મધ્ય ભારતમાં પણ ગાજવીજ સાથે વરસાદ
આજે દિલ્હી, ઉત્તરપ્રદેશ, પંજાબ, હરિયાણા સહિત ઉત્તર ભારતનાં કેટલાંય રાજ્યોમાં તોફાની પવનો ફૂંકાશે અને ભારે વરસાદ સાથે કરા પડશે. હવામાન વિભાગના કહેવા મુજબ ૨૪થી ૨૬ માર્ચ દરમિયાન મધ્ય ભારતમાં પણ ગાજવીજ સાથે વરસાદ થશે. ૨૬ માર્ચે પૂર્વ ભારતનાં રાજ્યોમાં વરસાદ પડશે. આજે સાંજથી હિમાચલ પ્રદેશ, ઉત્તરાખંડ, પંજાબ, હરિયાણા, ચંડીગઢ, પશ્ચિમ ઉત્તરપ્રદેશ અને રાજસ્થાનના અંતરિયાળ વિસ્તારોમાં કરાવૃષ્ટિ થશે.

ભારે પવન સાથે-સાથે ભારે વરસાદ પણ થશે
ગુજરાત, પૂર્વ મધ્યપ્રદેશ, છત્તીસગઢ, પૂર્વ વિદર્ભ અને તેલંગાણાના કેટલાક વિસ્તારોમાં પણ ૭૨ કલાકમાં વરસાદ સાથે કરા પડશે. આ ઉપરાંત પૂર્વોત્તર ભારત, ઓડિશા, પશ્ચિમ બંગાળ, ઝારખંડ અને ઉત્તરપ્રદેશના તરાઈ વિસ્તારોમાં પણ વરસાદની સંભાવના છે. તટીય આંધ્રપ્રદેશ અને તામિલનાડુમાં પણ વરસાદ થશે. જ્યારે આવતી કાલે પંજાબ, હરિયાણા, દિલ્હી, પશ્ચિમ ઉત્તરપ્રદેશ અને રાજસ્થાનમાં છૂટાછવાયા વરસાદ સાથે કરા પડશે.દિલ્હી-એનસીઆર સહિત ઉત્તર ભારતમાં આજે હળવો વરસાદ થશે, જ્યારે આવતીકાલે કલાકના ૩૦થી ૪૦ કિલોમીટરની ઝડપે પવન ફૂંકાવાની સાથે-સાથે ભારે વરસાદ પણ થશે. 

ભારતીય હવામાન વિભાગે યલો એલર્ટ જારી કરીને જણાવ્યું છે કે દિલ્હીમાં આજે અને આવતી કાલે ઝરમર વરસાદ થશે, જ્યારે શુક્રવારે તોફાની પવન સાથે ભારે વરસાદ પડશે.   આ ઉપરાંત જમ્મુ-કાશ્મીર, લદ્દાખ, હિમાચલ પ્રદેશ, બાલ્ટિસ્તાન અને ઉત્તરાખંડમાં પણ તેજ આંધી-તોફાન સાથે વરસાદ ઉપરાંત હિમવર્ષા પણ થઈ શકે છે.