અમદાવાદ: આગામી સપ્તાહે યુએસ ફેડરલ રિઝર્વની બેઠક મળી રહી છે. તે પૂર્વે સોનાના ભાવમાં ઘટાડાની ચાલ નોંધાઇ છે. ઘરઆંગણે પણ છેલ્લા એક મહિનાથી રૂ. ૩૧ હજારની આસપાસ ભાવ જોવા મળી રહ્યા હતા જેમાં પાછલા બે દિવસમાં રૂ. ૩૦૦થી ૪૦૦નો ઘટાડો જોવાઇ ચૂક્યો છે. આજે શરૂઆતે ૧૦ ગ્રામ શુદ્ધ સોનામાં રૂ. ૧૫૦ના ઘટાડે રૂ. ૩૦ ૬૦૦ની સપાટીએ ભાવ ખૂલ્યો હતો. દરમિયાન સપ્તાહ દરમિયાન વૈશ્વિક સોનાના ભાવમાં એક ટકાનો ઘટાડો જોવાયો હતો.
સ્થાનિક બુલિયન બજારના જાણકારોના કહેવા પ્રમાણે યુએસના ઇકોનોમી ડેટા નબળા આવતાં ડોલર મજબૂત થયો છે તો બીજી બાજુ આગામી સપ્તાહે યુએસ ફેડરલ રિઝર્વની બેઠક મળી રહી છે તે પૂર્વે બુલિયન બજારમાં નરમ ચાલ નોંધાઇ હતી.
દરમિયાન સોનાની પાછળ ચાંદીના ભાવમાં પણ ગાબડાં પડ્યાં હતાં. વૈશ્વિક બજારમાં ચાંદી બે સપ્તાહની નીચી સપાટીએ જોવા મળી છે એટલું જ નહીં સ્થાનિક બજારમાં ચાંદીમાં રૂ. ૨૦૦નો ઘટાડો નોંધાઇ ચાંદી રૂ. ૪૫ ૩૦૦ પ્રતિકિલોની સપાટીએ ખૂલી હતી.