Coronavirus / નેધરલેન્ડે ચીનથી મંગાવેલા કોરોનાના સુરક્ષા માસ્ક એકદમ હલકી ગુણવત્તાના; નેધરલેન્ડની પ્રતિક્રિયા જાણીને ચોંકી જશો

નેધરલેન્ડ પણ કોરોનાવાયરસથી સંક્રમિત છે અને અત્યાર સુધીમાં ત્યાં લગભગ 10,000 કેસ થયા છે જ્યારે 639 લોકોનાં મોત પણ થયા છે. બીજી તરફ, ચીને કોરોના ચેપને ઘણી હદ સુધી નિયંત્રણમાં લાવી દીધો છે અને હવે તેણે સામનો કરવા માટે અન્ય દેશોમાં માસ્ક, ગ્લોવ્સ, સેનિટાઇઝર અને દવાઓ વેચવાનું શરૂ કર્યું છે. જો કે ચીને કોરોનાના સામે નેધરલેન્ડને 6 લાખ માસ્ક વેચ્યા હતા, તે બધા ખરાબ ક્વોલીટીના કારણે નિરર્થક બન્યા છે.

નેધરલેન્ડ સરકારે જણાવ્યું છે કે ચીનથી આયાત કરાયેલા તમામ 6 લાખ માસ્ક બિલકુલ ઉપયોગી નથી અને પરત કરવામાં આવશે. જો કે, ચીનની આ ભૂલને કારણે નેધરલેન્ડની હોસ્પિટલોમાં માસ્કની અછત ઉભી થઈ છે. ન્યુઝ એજન્સી AFPના જણાવ્યા અનુસાર, નેધરલેન્ડ સરકારે કોરોનાના વધતા જતા કેસોને ધ્યાનમાં રાખીને ચીનમાંથી 13 લાખ માસ્કનો ઓર્ડર આપ્યો હતો. આમાંથી 6 લાખ માસ્ક તાજેતરમાં નેધરલેન્ડ પહોંચ્યા હતા, પરંતુ તેમની ગુણવત્તા ખરાબ હોવાને કારણે હવે તેઓ પરત જઈ રહ્યા છે.

ચીનનાં માસ્ક ઉપયોગી નથી

નોંધનીય છે કે નેધરલેન્ડની મોટાભાગની હોસ્પિટલોએ એમ કહીને માસ્ક પાછા મોકલ્યા છે કે તેઓ કોરોના ચેપને રોકવામાં સમર્થ નથી, તેમ જ તેમની ગુણવત્તા પણ સારી નથી. હાલમાં નેધરલેન્ડ સરકારે બાકીના માસ્ક ઉપર પણ પ્રતિબંધ મૂક્યો છે. હોસ્પિટલોએ ફરિયાદ કરી છે કે ચીનમાંથી ખરીદવામાં આવેલ FFP 2 માસ્ક સંપૂર્ણપણે ચહેરાને આવરી લેતા નથી, તેના ફિલ્ટરની ગુણવત્તા પણ ઓછી છે. આવી સ્થિતિમાં હાલના સંજોગોમાં આવા માસ્ક પહેરીને ડોક્ટર અને દર્દીઓને જોખમમાં મૂકી શકાય નહીં.

નેધરલેન્ડના આરોગ્ય મંત્રાલયે એક નિવેદન બહાર પાડીને કહ્યું છે કે આ માસ્કનો ઉપયોગ થઇ શકે એમ નથી. તેને પહેર્યા પછી પણ ચેપનું જોખમ રહેશે. નેધરલેન્ડની સરકારે પણ આ વિશે ચીની સરકાર સાથે વાત કરી છે અને બાકીના માસ્ક પાછા મોકલવાની વાત કરી છે. 

ચીનની કોરોના પરીક્ષણ કીટ પર પણ પ્રશ્નાર્થ

યુરોપિયન દેશ સ્પેન પણ કોરોના ચેપથી ભારે અસરગ્રસ્ત છે. તાજેતરમાં જ તેણે ચીનથી કોરોના પરીક્ષણ કીટ પણ ખરીદી હતી. જોકે આમાંની મોટાભાગની પરીક્ષણ કીટ ખામીયુક્ત હોવાનું જાણવા મળ્યું હતું, તેઓ કોરોના વાયરસનું પરીક્ષણ કરવામાં સમર્થ નથી એવા અહેવાલ છે. આ પછી સ્પેને પણ ચીનથી કોરોનાની પરીક્ષણ કિટ્સના ઉપયોગ પર પ્રતિબંધ મૂક્યો હતો. તમને જણાવી દઈએ કે તબીબી ઉપકરણોની નિકાસના મામલે ચીન વિશ્વનો પ્રથમ નંબરનો દેશ છે.