રૂપાલ પલ્લીને લઇને મોટા સમાચાર સામે આવ્યા છે. પલ્લીને લઈને સરકાર ઝૂકી છે અને ગાંધીનગર ખાતે પલ્લી યાત્રા યોજાશે. ઉલ્લેખનીય છે કે, પોલીસની હાજરીમાં નીકળશે વરદાયિની માતાની પલ્લી યોજાશે.
ગાંધીનગરના રૂપાલ ગામે પલ્લી નીકળશે
પોલીસની હાજરીમાં નીકળશે પલ્લી
પલ્લીવાસથી પલ્લી કાઢવા આપી મંજૂરી
પ્રાપ્ત થતી જાણકારી પ્રમાણે પોલીસ બંદોબસ્ત વચ્ચે નીકળનારી પલ્લી સીધી જ વરદાયિની માતાના મંદિર ખાતે પહોંચશે. જો કે, કોરોના કાળ ચાલી રહ્યો છે અને આ મહામારી વચ્ચે આવું આયોજન થઇ રહ્યું છે ત્યારે પોલીસ દ્વારા ગામની ફરતે બંદોબસ્ત ગોઠવાયો છે. આ સાથે જ ગ્રામજનોએ પણ પલ્લીને લઇને તૈયારીઓ પણ આરંભી દીધી છે.
ગઈ સાલ શું હતી વ્યવસ્થા
રૂપાલ સ્થિત વરદાયની માતાની પલ્લી પર આશરે રૂ.20 કરોડનું 4 લાખ કિલો ઘી ચડાવવામાં આવ્યું હતું. આ પલ્લીમાં 5 જ્યોતની પલ્લી રૂપાલના 27 ચકલામાંથી પસાર થઈ હતી. તે તમામ ચકલામાં ઘી ભરવાના પીપડાં અને ટ્રેક્ટરની ટ્રોલીઓ રાખવામાં આવી હતી. વહેલી સવારે શ્રદ્ધાળુઓએ પલ્લી પર ઘીનો અભિષેક કર્યો હતો જેને કારણે સમગ્ર ગામમાં ઘીની નદીઓ વહેતી થઇ હતી. મજબૂત સુરક્ષા વ્યવસ્થા ગોઠવાઈ માતાજીની પલ્લીના આશરે દસ લાખથી વધુ લોકોએ દર્શન કર્યા હતા. આટલા મોટા સમૂહને ધ્યાનમાં રાખીને પાર્કિંગની 7 જગ્યા એ વ્યવસ્થા કરવામાં આવી હતી. આ ઉપરાંત સુરક્ષા માટે 500 થી વધુ પોલીસ અધિકારીઓ અને પોલીસ કર્મચારીઓ સાથે 200 જેટલા હોમગાર્ડના જવાનો તૈનાત કરાયા હતા. વધુમાં 17થી18 જગ્યાએ વિડીયોગ્રાફી તેમજ 15 જેટલા સીસીટીવી કેમેરા પણ લગાવાયા હતા.
આ રહ્યો પલ્લીનો ઈતિહાસ અને વાયકા
ગાંધીનગર જિલ્લાના રૂપાલ ગામે મા વરદાયિનીની પલ્લીના ઇતિહાસ પર નજર કરીએ તો, દ્વાપર યુગમાં પાંડવોએ ગુપ્તવાસમાં જતાં પહેલાં પોતાના શસ્ત્રો ખીજડાના એક વૃક્ષની નીચે છૂપાવ્યા હતા. આ શસ્ત્રોની રક્ષા માટે તેઓએ વરદાયિની માતાને પ્રાર્થના કરી હતી.
જંગલની વચ્ચે ઘેરાયેલા રૂપાલ પંથકમાં ખીજડાના આ વૃક્ષની નીચે માતાજીની દેરી હતી. ગુપ્તવાસ પૂરો કરીને પાંડવો વિરાટનગર એટલે કે હાલના ધોળકામાંથી પરત ફરી શસ્ત્રો લેવા રૂપાલ આવ્યા ત્યારે શસ્ત્રોની પૂજા કરીને તેમણે પાંચ દિવાની જ્યોતવાળી પલ્લી બનાવી માતાજી પાસે મૂકી હતી.
આ પછી હસ્તિનાપુરના યુદ્ધમાં વિજય મેળવ્યા બાદ કૃષ્ણ સાથે પાંડવો ફરી અહીં આવ્યા હતા. જે બાદ સોનાની પલ્લી બનાવીને યાત્રા યોજી હતી. આ સમયથી એટલે કે પાંચ હજાર વર્ષથી રૂપાલમાં વરદાયિની માતાની પલ્લીનો મેળો પ્રતિ વર્ષ નવરાત્રી પર્વના નવમાં નોરતે યોજાય છે