શિસ્ત ભંગ / અઘરી નોટ: નર્મદા ભાજપના સભ્યએ ખુલ્લેઆમ કહ્યું આ સાંસદને જાહેરમાં 2 તમાચા મારીશ, જાતે જ વીડિયો કર્યો વાયરલ

• સાંસદ મનસુખ વસાવાને જાહેરમાં થપ્પડ મારવાની ધમકી
• ભાજપના સભ્ય અમિત વસાવાએ વીડિયો બનાવી કર્યો વાયરલ
• અમિત વસાવા ભાજપના આદિજાતિ મોરચાના કારોબારી સભ્ય છે

આદિવાસી સમાજના દિગ્ગજ નેતા  અને સાંસદ મનસુખ વસાવાને જાહેરમાં લાફો મારવાની ધમકી આપતો વીડિયો વાયરલ થતાં ચકચાર મચી છે. ભાજપના સભ્ય અમિત વસાવાએ વીડિયો બનાવી વાયરલ કર્યો છે જેમાં પોતાનું નામ લઈ અમિત વસાવા ભાજપના આદિજાતિ મોરચાના કારોબારી સભ્ય એવું કહી સાંસદ મનસુખ વસાવાને એક વખત જાહેરમાં તમાચો લગાવીશ એવી ગર્ભિત ધમકી આપી રહ્યો છે. આ જ શખ્સે અગાઉ રાજપીપળા પાલિકાના પૂર્વ પ્રમુખને પણ થપ્પડ મારવાની ધમકી આપી હતી જે રાજપીપળામાં વીડિયો ટોક ઓફ ધ ટાઉન બન્યો હતો.

ભાજપના સભ્ય અમિત વસાવાએ શું આપી ધમકી?
હું અમિત વસાવા ભારતીય જનતા પાર્ટી આદિવાસી કારોબારી સભ્ય, હું ઈજ્જત તો નથી આપતો તેણે પણ મનુસખલાલ( મનસુખ વસાવા)ને એક દિવસ જાહેર મંચ પર 2 તમાચા મારીને રહીશ. કારણ કે એ વિરોધ પક્ષ એટલે કે વિપક્ષનું વધારે ખેચે છે. આ કારણ જ હું તેણે જાહેર મંચ પર 2 તમાચા મારીશ. મનસુખને..એ બહુ ભરત ભરત કર્યા કરે છે. એટલે ભરતને પણ મારીશ અને મનસુખને પણ જાહેર મંચમાં મારીશ.. 

હજુ સુધી નથી નોંધાઈ કોઈ ફરિયાદ કે ભાજપ દ્વારા પણ નથી લેવાયા કોઈ એક્શન
મહત્વનું છે કે ભાજપના સાંસદ મનસુખ વસાવા વારંવાર આદિવાસીના પ્રશ્નો કે લાગતી વળતી કોઈ પણ વાતને લઈ સરકાર સામે બે હિચક બોલતા હોય છે. સરકારના પોતાના સમાજમાંથી આવતા મંત્રી નિમિષા સુથાર પર વારંવાર આરોપ પણ કરતાં હોય છે. આ બધા વિવાદોને અલગ નજરથી જોઇ રહેલા ભાજપના સભ્ય અમિત વસાવાએ ખુલ્લેઆમ વીડિયો જાહેર કરી લાફા ઝીંકવાની ધમકી આપી છે. જો કે આ વીડિયો બહાર આવતા મનસુખ વસાવાની કોઈ પ્રતિક્રિયા સામે આવી નથી કે હજુ સુધી કોઈ ફરિયાદ પણ થઈ નથી પણ રાજકિય અદાવત રાખી  સાંસદને આવી લુખ્ખી ધમકી આપવી ભાજપ પાર્ટીના શિસ્તનો ભંગ છે. ત્યારે વીડિયો વાયરલ થયા બાદ ભાજપ સમગ્ર મામલે શું એક્શન લે છે તેના પર સૌ કોઈને નજર ટેકેલી છે.