વિવાદ / અમદાવાદની મતદાન યાદીમાં ક્યાંથી આવ્યા પાકિસ્તાની નાગરિકોના નામ, જાણો સમગ્ર મામલો

• મતદાર યાદીમાં 3 પાકિસ્તાની નાગરિકોના નામ 
• હાલ કુબેરનગરમાં રહે છે ત્રણેય શખ્સો
• ચૂંટણી વિભાગે કામગીરી હાથ ધરી 

અમદાવાદમાં ત્રણ પાકિસ્તાની નાગરિકોના નામ મતદાર યાદીમાં સામે આવ્યા છે. નરોડા વિધાનસભાની એક મતદાર યાદીમાં આ ઘટના બની છે. જેમાં સુરેશ પારપીયાની, મહેશ પારપીયાની અને હરેશ પારપીયાનીનું નામ યાદીમાં સામે આવ્યું છે. હાલ કુબેરનગરમાં ત્રણેય શખ્સો રહે છે. તંત્ર દ્વારા તપાસ કરતા સમગ્ર મામલો સામે આવ્યો છે. આ જાણકારી સામે આવ્યા બાદ ચૂંટણી વિભાગે નામો રદ કરવાની કામગીરી હાથ ધરી છે. ત્રણેય શખ્સો સામે મેઘાણીનગર પોલીસ સ્ટેશનમાં ફરીયાદ નોંધવામાં આવી છે.

આ અંગે અધિક જિલ્લા ચૂંટણી અધિકારી ચેતન ગાંધીએ જણાવ્યું કે, 47 નરોડા વિધાનસભાની મતદાર યાદીમાં ત્રણ વ્યક્તિ વિશે ફરિયાદ મળી છે. જેમાં નામ સાથે ઉલ્લેખ થયો છે કે, આ ત્રણેય ભારતના નાગરિક નથી. અને આમ છતાં તેમનું મતદાન યાદીમાં છે.  ફરિયાદ બાદ 150 દિવસની તપાસ પછી ત્રણેય લોકો ભારતના નાગરિક ન હોવાનું પુરવાર થયું છે. જે બાદ મતદાન અધિકારી પાસે મામલો પહોંચ્યો છે. અને સેક્શન 31 મુજબ ફરિયાદ નોંધવાની કામગીરી હાથ ધરાઈ છે. ખોટા ડિક્લેરેશન આપવા વિરુદ્ધ પોલીસ ફરિયાદ પણ કરાઈ છે.