ફિલ્મોનાં સીનને પણ ટક્કર મારે તેવી રીતે ગુના આચરતી કેટલીક ગેંગ સક્રિય છે. જેમાંની એક છે ચાદર ગેંગ. જે વર્ષે એકાદ મોટી ચોરી કરવા માટે અમદાવાદમાં આવે છે અને ત્યારબાદ ગુમ થઇ જાય છે. સ્પેશિયલ ૨૬ મૂવીમાં જે રીતે અલગ અલગ રાજ્યમાંથી ડુપ્લિકેટ સીબીઆઇના અધિકારી બનીને લૂંટ કરવા માટે જે રીતે હીરો આવે તેવી જ રીતે અમદાવાદમાં ચોરી કરવા માટે અલગ અલગ રાજ્યમાંથી ચાદર ગેંગ આવે છે અને ચોરી થઇ ગયા બાદ પોત પોતાનાં ઘરે જતા રહે છે.
ફિલ્મી વાર્તાને પણ ટક્કર મારે તેવી 'ચાદર ગેંગ'ની મોડસ ઓપરેન્ડી
બે દિવસની રજા બાદ શો રૂમ ખૂલ્યો ત્યારે ચોરીની જાણ થઈ
ચડ્ડી ગેંગ, ચીપકલી ગેંગ ચીખલીગર ગેંગ, દુપટ્ટા ગેંગ અને ટાબરિયા ગેંગ અને હવે ચાદર ગેંગ સક્રીય થઇ છે. ઉત્તરાયણના દિવસે સીજી રોડના સ્વસ્તિક ચાર રસ્તા પાસે આવેલા ગોલ્ડન આઈ શો રૂમમાંથી સાત તસ્કર રૂ.૨૫ લાખની કિંમતની રાડો કંપની સહિત બ્રાન્ડેડ કંપનીની ઘડિયાળોની ચોરી કરી ફરાર થઈ ગયા છે. સીસીટીવીમાં કેદ થયેલા સાત ચોરોએ ઉત્તરાયણના દિવસે સવારે ૭ થી ૭.૩૦ વાગ્યાના સમય દરમિયાન ચાદરની આડમાં શો રૂમનાં લોક તોડી એક સાગરીતને અંદર મોકલ્યો હતો. બે દિવસની રજા બાદ શો રૂમ ખૂલ્યો ત્યારે ચોરીની જાણ થઈ હતી.
ઉત્તરાયણ-વાસી ઉત્તરાયણના તહેવાર હોવાથી બે દિવસ માટે ગોલ્ડન આઈ શો રૂમ બંધ રાખવામાં આવ્યો હતો. ગત બુધવારે રાત્રે શો રૂમ બંધ કર્યા બાદ શનિવારે સવારે કર્મચારીઓ શો રૂમ પર આવ્યા ત્યારે લોક તૂટેલાં હતાં. શો રૂમના કબાટ અને કેશ કાઉન્ટરનો સામાન વેરવિખેર હાલતમાં પડ્યો હતો.
ચોરી થયાની ઘટના અંગે શો રૂમના કર્મચારીઓએ બનાવની જાણ પોલીસને કરી હતી. નવરંગપુરા પોલીસે સ્થળ પર પહોંચી તપાસ હાથ ધરતાં સીસીટીવીમાં સાત યુવકો શો રૂમની બહાર ઉત્તરાયણના દિવસે સવારે ૭ વાગ્યે જોવા મળ્યા હતા. આ યુવકોમાંથી એક યુવક ચાદર પહોળી કરી ઊભો રહે છે. બીજા છ યુવક ચાદરની આડમાં નીચે બેસી શો રૂમનાં લોક તોડતાં જોવા મળ્યા હતા. લોક તોડ્યા બાદ એક સાગરીતને શો રૂમની અંદર મોકલી ઘડિયાળની ચોરી કરાવે છે.
ચોરોએ 2 વર્ષ અગાઉ 20 લાખના મોબાઇલની પણ કરી હતી ચોરી
તસ્કર યુવકો રાડો, ટોમી જેવી બ્રાન્ડેડ કંપનીની રૂ.૨૫ લાખની મતાની ઘડિયાળોની ચોરી કરી હતી. આ સિવાય ચાદર ગેંગે બે વર્ષ પહેલાં સેલ્સ ઇન્ડિયામાં વીસ લાખ રૂપિયાના મોબાઇલ ફોનની ચોરી કરી હતી. જેમાં ચાદર ગેંગનો હાથ હતો. પોલીસને શંકા છે કે સેલ્સ ઇન્ડિયામાં થયેલી ચોરીમાં જે આરોપીઓ હતા તે જ આરોપીઓએ ઘડિયાળની ચોરી કરી છે.
ચોરી કર્યા પછી અલગ અલગ બસમાં બેસીને જતા રહે છે
આ ગેંગ ચોરી કરવા માટે અમદાવાદમાં આવે છે અને શહેરના ફરતે આવેલા મકાનને ભાડે રાખે છે ત્યારબાદ ટાર્ગેટ કરીને દુકાનમાં શોપિંગ કરવા માટે જાય છે અને વીસેક દિવસ બાદ ચોરીની ઘટનાને અંજામ આપે છે. ઘડિયાળના શો રૂમમાં થયેલી ચોરીમાં પોલીસે ગીતા મંદિર સુધીના સીસીટીવી કબજે કર્યા છે. જેમાં સાતેય ચોર ગીતામંદિર સુધી આવે છે અને ત્યારબાદ અલગ અલગ જગ્યાની બસમાં બેસીને જતા રહે છે. પોલીસને શંકા છે કે આ તમામ ચોર અલગ અલગ રાજ્યમાં રહે છે.
ચાદરની આડમાં તાળું તોડીને એક જ યુવક ચોરી કરે છે
પોલીસના જણાવ્યા અનુસાર એક યુવક ચાદર પકડીને ઊભો રહે અને બીજા છ યુવકો તાળું તોડે છે ત્યાર બાદ એક દુકાનનું શટર થોડું ઊંચું કરીને એક યુવક દુકાનમાં જાય છે અને બીજા યુવકો દુકાનની આસપાસ વેરવિખેર થઇ જાય છે. યુવકને ક્યાંથી વસ્તુ ચોરવી તેની જાણ હોવાથી ગણતરીની મિનિટોમાં ચોરી કરે છે અને ત્યાર બાદ રફ્ફુચક્કર થઇ જાય છે.
નેપાળમાં કિંમતી ચીજવસ્તુઓ વેચી દેવામાં આવે છે
ચાદર ગેંગ અલગ અલગ રાજ્યોમાં રહે છે અને ચોરેલી વસ્તુઓને નેપાળમાં જઇને સસ્તા ભાવે વેચી દેતા હોય છે. સેલ્સ ઇન્ડિયામાં થયેલી ચોરીમાં ક્રાઇમ બ્રાંચને છેક નેપાળ સુધી પગેરું મળ્યું હતું પરંતુ આરોપીઓ હજુ સુધી મળી આવ્યા નથી.