બોલિવૂડના દિગ્ગજ એક્ટર અક્ષય કુમારની ફિલ્મ 'મિશન મંગલ'થી ડિરેક્ટર તરીકે ડેબ્યૂ કરનાર જગન શક્તિને ગઈકાલથી (25 જાન્યુઆરી) હોસ્પિટલમાં એડમિટ કરવામાં આવ્યા છે અને તેમની હાલત ઘણી જ ગંભીર છે. સૂત્રોના જણાવ્યા પ્રમાણે, તેઓ લાંબા સમયથી બીમાર છે અને તેમના બ્રેનમાં બ્લડ ક્લોટ થઈ ગયો છે.
મળતી માહિતી અનુસાર, જગન શક્તિના મગજમાં રહેલાં બ્લડ ક્લોટનો ઈલાજ ચાલી રહ્યો છે. તે હાલ સબઅર્બન હોસ્પિટલમાં ભરતી છે. રિપોર્ટ પ્રમાણે, જગનનો પરિવાર પણ મુંબઈ આવી ગયો છે અને તેઓ હાલ હોસ્પિટલમાં જ છે. સૂત્રો મુજબ, જગન શક્તિ તેના મિત્રો સાથે વાતચીત કરતા હતાં અને અચાનક જ બેભાન થઈને પડી ગયા. જે બાદ તેમને તાત્કાલિક હોસ્પિટલ લઈ જવામાં આવ્યા હતાં. હાલ ડોક્ટર તેમની તપાસ કરી રહ્યાં છે અને તેમના સ્વાસ્થ્ય પર સતત નજર રાખી રહ્યાં છે.
તમને જણાવી દઈએ કે, જગન શક્તિએ લાંબા સમય સુધી ડિરેક્ટર આર બાલ્કી સાથે કામ કર્યું હતું. તેમણે આર બાલ્કીની 'ચીની કમ' સહિતની ફિલ્મ્સમાં આસિસ્ટન્ટ ડિરેક્ટર તરીકે કામ કર્યું હતું. હાલમાં તેઓ અક્ષય કુમાર સાથે એક અન્ય ફિલ્મ પર ચર્ચા કરી રહ્યાં હતો. વર્ષ 2014માં રિલીઝ થયેલી સુપરહિટ તમિલ ફિલ્મ કથ્થીની હિન્દી રીમેક ઈક્કા અક્ષય કુમાર સાથે બનાવવાના છે.
જગન શક્તિએ ડિરેક્ટ કરેલી પહેલી ફિલ્મ જ રહી સુપરહિટ
જગન શક્તિએ અક્ષય કુમાર, વિદ્યા બાલન, સોનાક્ષી સિંહા, તાપસી પન્નુ સ્ટારર મિશન મંગલથી ડિરેક્ટર તરીકે ડેબ્યૂ કર્યું હતું. વર્ષ 2019માં રિલીઝ થયેલી આ ફિલ્મે બોક્સ ઓફિસ પર 200 કરોડથી વધુ કમાણી કરી હતી. આ ફિલ્મ ભારતના માર્સ ઓર્બિટર મિશન પર આધારિત હતી.