બંગાળની ખાડીમાં વાવાઝોડું સક્રિય થતાં હવામાન વિભાગ દ્વારા આગાહી કરવામાં આવી છે. IMDના ડાયરેક્ટરે જણાવ્યું છે કે, આગામી 13 ડિસેમ્બર સુધી ડાંગ, તાપી, વલસાડ અને નવસારીમાં સામાન્ય વરસાદની સંભાવના છે.
ગુજરાતનાં વાતાવરણમાં આવશે પલટો
ઠંડી સાથે માવઠાની હવામાન વિભાગની આગાહી
ડાંગ, તાપી, વલસાડ, નવસારીમાં સામાન્ય વરસાદની સંભાવના
બંગાળની ખાડીમાં સર્જાયેલું ચક્રવાત ‘મંડૌસ’ દક્ષિણ પશ્ચિમ બંગાળની ખાડી તરફ આગળ વધ્યું છે અને તે ચેન્નાઈથી લગભગ 480 કિમી પૂર્વ-દક્ષિણપૂર્વ અને કરિયાકલથી 390 કિમી દૂર છે. જેને પગલે ભારેથી અતિ ભારે વરસાદ શક્યતા છે. જેના કારણે ચેન્નાઇ, ચેંગસપટ્ટૂ, કાંચીપુરમ, વિલુપ્પુરમ, કુડ્ડાલોર, રાનીપેટ, વેલ્લોર સહિત તિરૂવલ્લૂરની સ્કૂલ-કોલેજોમાં રજાઓ જાહેર કરી દેવામાં આવી છે. બંગાળની ખાડીમાં વાવાઝોડું સક્રિય થતાં હવામાન વિભાગે જણાવ્યું કે, વાવાઝોડાના કારણે ગુજરાતના વાતાવરણમાં પલટો આવશે.
ગુજરાતમાં હળવા વરસાદની સંભવના
IMDના ડાયરેક્ટર મનોરમા મોહંતીએ કહ્યું કે, ગુજરાતમાં 24 કલાક બાદ 2થી 4 ડીગ્રી તાપમાન વધી જશે. આગામી 5 દિવસ સૌરાષ્ટ્ર-કચ્છમાં વરસાદની કોઈ સંભાવના નથી. આગામી 3 દિવસ સૌરાષ્ટ્રમાં વાતાવરણ સૂકું રહેશે. 12 અને 13 ડિસેમ્બરે દક્ષિણ ગુજરાતમાં સામાન્ય માવઠાની સંભાવના છે. ડાંગ, વલસાડ, નવસારી અને તાપીમાં સામાન્ય વરસાદની શક્યતા છે. 12 અને 13 ડિસેમ્બરે ઉત્તર ગુજરાતમાં પણ વાદળ છાયું વાતાવરણ રહેશે.
ડિસેમ્બરના અંતમાં તો કડકડતી ઠંડી અનુભવાશે
અત્રે ઉલ્લેખનીય છે કે, રાજ્યમાં ઠંડીનું જોર વધી રહ્યું છે વહેલી સવારે ઠંડા અને સૂકા પવન ફુંકાતા તાપમાનમાં ઘટાડો થઈ રહ્યો છે. રાજ્યમાં ઉત્તર પૂર્વના પવન ફૂંકાઇ રહ્યા છે. ધીમે ધીમે ઠંડીનું જોર વધશે અને ડિસેમ્બરના અંતમાં તો કડકડતી ઠંડીનો અહેસાસ થશે.