રાજ્યમાં કાળઝાળ ગરમી પડી રહી છે. લોકો ગરમીથી પરેશાન થઇ રહ્યા છે ત્યારે આગામી સમયમાં હજુ પણ તાપમાન વધશે તેમ હવામાન વિભાગે જણાવ્યું હતું.
રાજ્યમાં હવામાન વિભાગની આગાહી
આગામી 5 દિવસ તાપમાન વધવાની આગાહી
રાજ્યભરમાં હિટવેવની અસર રહેશે
ગુજરાતમાં ગરમી કહેર વર્તાવી રહી છે. દિવસ જાય તેમ ગરમીનું પ્રમાણ વધ્યુ છે. જો કે ક્યાંક ક્યાંક શીત પવનો ગરમીમાં આંશિક રાહત આપી જાય છે પરંતુ ગુજરાતની ગરમી તો ભયંકર. બપોરે તો ઘરની બહાર નીકળવું મુશ્કેલ બન્યું છે. આકરી ગરમીને લીધે તંત્ર દ્વારા ઠેર ઠેર લીલા પડદાના વિસામા બનાવવામાં આવી રહ્યા છે. ઠેર ઠેર પાણીની પરબો શરુ કરવામાં આવી છે.ત્યારે આગામી દિવસમાં ગરમીને લઇને હવામાન વિભાગે શું આગાહી કરી આવો જાણીએ.
5 દિવસ તાપમાન વધશે
રાજ્યના હવામાન વિભાગ દ્વારા આગામી 5 દિવસ તાપમાન વધવાની આગાહી કરવામાં આવી છે. રાજ્યભરમાં હિટવેવની અસર રહેશે તેમ પણ જણાવ્યું. અમદાવાદ,ગાંધીનગર,પાટણમાં તથા સૌરાષ્ટ્ર,સુરેન્દ્રનગર અને કચ્છમાં હિટવેવની આગાહી કરવામાં આવી છે. પવનની દિશા બદલાતા તાપમાનમાં વઘારો થશે તેમ જણાવ્યું છે. ઉત્તરી પશ્ચિમનો પવન હોવાને લીધે તાપમાન વધશે.
અમદાવાદમાં ઓરેન્જ એલર્ટ જાહેર
અમદાવાદમાં ગરમીનો પારો 42 ડિગ્રીને પાર પહોંચ્યો છે. હજી પણ ગરમી વધવાને પગલે અમદાવાદમાં ઓરેન્જ એલર્ટ આપવામાં આવ્યું છે. બે દિવસ માટે અમદાવાદ,ગાંધીનગર,પાટણમાં ઓરેન્જ એલર્ટ અપાયું છે જ્યારે બે દિવસ માટે સુરેન્દ્રનગર અને કચ્છમાં યલ્લો એલર્ટ અપાયું છે.
આસની ચક્રવાતની ગુજરાતમાં કોઇ અસર નહી
'આસની' નામનું ચક્રવાતી તોફાન આગામી 24 કલાકમાં વધુ તીવ્ર બને તેવી સંભાવના છે. આ ચક્રવાત હવે વિશાખાપટ્ટનમથી 940 કિમી અને ઓડિશાના પુરીથી 1000 કિમીના અંતરે છે. ચક્રવાત 10 મેના રોજ પશ્ચિમ બંગાળમાં પહોંચી શકે છે તે જોતા રાજ્ય હાઈ એલર્ટ પર છે. જો કે વેસ્ટ બંગાળના વાવાઝોડા આસનીની ગુજરાત પર કોઇ અસર નહી થાય હવામાન વિભાગે જણાવ્યું હતું.
ઉત્તર ગુજરાતના કેટલાક વિસ્તારોમાં માવઠાની પણ આગાહી
હવામાન વિભાગના સૂત્રોના જણાવ્યા અનુસારે અમદાવાદમાં રવિવારથી બુધવાર દરમિયાન ગરમી 44 ડિગ્રીને પાર થવાની છે. આગાહી પ્રમાણે અમદાવાદમાં ઓરેન્જ એલર્ટ જાહેર કરવામાં આવ્યુ છે. આ સાથે ઉત્તર ગુજરાતના કેટલાક વિસ્તારોમાં માવઠાની હવામાન વિભાગ દ્વારા આગાહી પણ કરવામાં આવી છે. આમ અમદાવાદમાં આગામી ચાર દિવસમાં ગરમીનો વધુ એક રાઉન્ડ અનુભવાશે.
આ રાજ્યોમાં ફરી હેરાન કરશે લૂ
ભારતીય હવામાન વિભાગની તાજેતરની આગાહી મુજબ, તારીખ 8મે થી 11 મે દરમિયાન હરિયાણા, રાજસ્થાન, મધ્યપ્રદેશ, મહારાષ્ટ્ર, પંજાબ અને જમ્મુ-કાશ્મીરના જમ્મુ વિભાગમાં ગરમીની લહેર આવવાની શક્યતા છે. તો તારીખ 10 મેથી દિલ્હીમાં હિટવેવની સ્થિતિ જોવા મળી શકે છે. એ સિવાય યુપી, બિહાર અને ઝારખંડ જેવાં રાજ્યોમાં ગરમીનો પ્રકોપ જોવા મળશે, પરંતુ લૂથી રાહત મળશે.
ગુજરાતમાં વરસાદને લઇને શું કરી આગાહી ?
હવામાન નિષ્ણાંત અંબાલાલ પટેલે રાજ્યમાં વરસાદને લઇ આગાહી કરી છે. અંબાલાલે આગાહી કરતા જણાવ્યું કે, રાજ્યમાં 15 જૂન બાદ વરસાદ આવવાની શક્યતા છે. સાથે તેમણે જણાવ્યું કે, આ વર્ષે શરૂઆતમાં ચોમાસું સારૂં રહેશે. ઉપરાંત વેસ્ટર્ન ડિસ્ટબન્સની અસરનાં કારણે વાતાવરણમાં સતત પલટો જોવા મળી શકે છે. 11 મેથી 17 મે વચ્ચે આંધીના પ્રમાણમાં પણ વધારો થવાની સંભાવના છે. સાથે સૌરાષ્ટ્ર અને ઉત્તર ગુજરાતના ભાગોમાં પ્રી મોન્સૂન એક્ટિવિટી રહેશે. ઉપરાંત 18 મેથી 5 જૂન વચ્ચે અરબી સમુદ્રમાં હવામાનમાં પલટો આવવાની શક્યતા છે. જેને લઇ જૂનથી સપ્ટેમ્બર વચ્ચે 99 ટકા વરસાદ થવાની સંભાવના સેવાઈ રહી છે.