અમદાવાદમાં નવરાત્રી આયોજકો સાથેની મિટિંગમાં પાર્ટી પ્લોટમાં આવનારા તમામ ખેલૈયાઓ માટે વાહન પાર્કિંગ સહીતની વ્યવસ્થા અંગે આયોજકોને આદેશ અપાયા હતા.
અમદાવાદમાં પોલીસ અને ગરબાના આયોજકોની મિટિંગ
ખેલૈયાઓ વાહન પાર્કિંગ સહીતની વ્યવસ્થા આપવા આદેશ
પાર્ટી પ્લોટમાં પોલીસ કરશે સરપ્રાઇસ ચેકિંગ
નવરાત્રીને લઇને આજે પોલીસે ગરબાના આયોજકો સાથે મિટિંગ કરી હતી. જેમાં તંત્ર દ્વારા જાહેર કરાયેલા નિયમોનું પાલન કરવામાં આવ તેને લઇને ટ્રાફિક વિભાગ દ્વારા આયોજકોને સૂચનાઓ આપવામાં આવી હતી. વધુમાં અમદાવાદ શહેર પોલીસ દ્વારા નવરાત્રીમાં પાર્ટી પ્લોટ અને ક્લબોમાં યોજાતા ગરબાને લઈને ચુસ્ત બંદોબસ્ત પણ ગોઠવી દેવામાં આવ્યો છે. ઉપરાંત પાર્ટી પ્લોટમાં આવનારા તમામ ખેલૈયાઓ માટે વાહન પાર્કિંગથી લઈને સુરક્ષા બાબતો અને CCTVની યોગ્ય વ્યવસ્થા કરવા આયોજકોને આદેશ અપાયા છે.
42 જેટલા પાર્ટી પ્લોટને અપાઈ મંજૂરી
કોરોનાના બે વર્ષ બાદ આ વખતે ધામધૂમથી નવરાત્રી યોજાશે. જેને લઈને અમદાવાદ પોલીસ એક્શનમાં આવી છે. અમદાવાદ શહેર પોલીસ તેમજ મ્યુનિસિપલ કોર્પોરેશન દ્વારા સાથે રહીને રાત્રિના સમયે સ્ટ્રીટ લાઈટ અને શેરીઓની લાઈટ ચાલુ રહે તે માટે જણાવાયું છે. સાથે જ આ વર્ષે એસજી હાઇવે પણ વાહન ચાલકો માટે ખુલ્લો રાખવાનો નિર્ણય લેવામાં આવ્યો છે. રાત્રિના 12:00 વાગ્યા સુધી લાઉડ સ્પીકર વગાડવાની મંજૂરી આપવામાં આવી છે. શહેર પોલીસે 42 જેટલા પાર્ટી પ્લોટને મંજૂરી આપી છે ત્યારે શહેર પોલીસ દ્વારા પાર્ટી પ્લોટ પર સરપ્રાઈઝ ચેકિંગ કરશે અને નિયમનું પાલન નહિ કરનાર સામે કાર્યવાહી કરવાનું પણ જણાવાયું છે.
નવરાત્રીમાં ટેકનોલોજીના ઉપયોગ સાથે પોલીસ કરશે કાર્યવાહી
બીજી બાજુ કોઈ રોડ પર વાહનો પાર્ક કરાશે તો તેના માટે ટોઈંગ વાન અલગ અલગ વિસ્તારમાં ફરતી રાખવામાં આવશે. અમદાવાદ શહેર પોલીસ આ વખતે નવરાત્રીમાં ટેકનોલોજીનો ભરપૂર ઉપયોગ કરશે. જેમાં ખાસ કરીને બોડીવોન કેમેરા તેમજ ઇન્ટરસેપટર અને સ્પીડ ગનની સાથોસાથ બ્રિથ એનેલાઇઝરનો પણ ઉપયોગ કરશે. રાત્રિના સમયે શહેરના મહત્વના ટ્રાફિક સિગ્નલો ચાલુ રાખવામાં આવશે, જેથી કરીને ટ્રાફિકની સમસ્યા ન સર્જાય સાથે જ અમદાવાદ શહેર પોલીસ દ્વારા તૈયાર કરાયેલી ખાસ શી ટીમ અલગ અલગ જગ્યાઓ પર સિવિલ ડ્રેસમાં તેમજ ટ્રેડિશનલ કપડામાં સજ્જ થઈને રોમિયોગીરી કરતા શખ્સોને ઝડપી કાયદાનો પાઠ ભણાવશે. સાથે જ આયોજકોએ બાઉસનરો ભીડની માત્રામાં રાખવા અને સીસીટીવીનું રેકોર્ડિંગ એક માસ સુધી રાખવા સૂચના આપવામાં આવી છે.