લોકસભાની ચૂંટણી માટે મતદાન યોજવા જઈ રહ્યું છે ત્યારે હાલ ઠેરઠેર ચૂંટણી પ્રચાર ચાલી રહ્યો છે. આ દરમિયાન સુરેન્દ્રનગર બેઠક માટે પ્રચાર કરી રહેલા હાર્દિક પટેલને કડવો અનુભવ થયો છે.
આજે પાસના બંને પૂર્વ કન્વીરોને કડવો અનુભવ થયો છે. એકબાજુ રેશમા પર અજાણ્યા શખ્સોએ હુમલો કર્યો તો બીજી બાજુ હાર્દિક પટેલને એક યુવકે ચાલુ સભામાં જ લાફો ઝીંકી દીધો.
પ્રાપ્ત થતી માહિતી અનુસાર સુરેન્દ્રનગરના બલદાણા ગામે આજે સવારે હાર્દિક પટેલ કોંગ્રેસની જનઆક્રોશ સભા સંભોધી રહ્યો હતો. ત્યારે અચાનક જ અજાણ્યા યુવકે લાફો મારી દેતા હોબાળો મચી ગયો હતો. આ ઘટના બાદ સભામાં હાજર લોકોએ યુવકને પકડી અને તેને ઢોર માર માર્યો હતો.
અચાનક જ લાફો મારી દેતા હાર્દિક ચોંકી ગયો હતો. ઘટનાબાદ સ્થાનિકોએ હાર્દિકને લાફો મારનારની જોરદાર ધોલાઇ કરી હતી. લોકોએ શખ્સના કપડાં ફાડી નાંખ્યા. જો કે હાર્દિક પટેલે પોતાના સમર્થકોને રોકવાનો પ્રયત્ન કર્યો.
ઘટના સ્થળ પર હાજર પોલીસે શખ્સને બચાવ્યો અને એને હોસ્પિટલમાં દાખલ કર્યો. લાફો મારનાર વ્યક્તિની હાલત ખૂબ જ ગંભીર છે. લાફો પડ્યા બાદ હાર્દિક પટેલે કહ્યું કે ભાજપ ઇચ્છે છે કે મને મારી નાંખવામાં આવે, એ લોકો હુમલો કરાવી રહ્યા છે, પરંતુ અમે ચુપ રહીશું નહીં.
તો જૂનાગઢના વંથલીમાં રેશમા પટેલ પર પણ હુમલો થયો. જેને લઇ રેશમા પટેલે વંથલી પોલીસ સ્ટેશનમાં ફરિયાદ નોંધાવી છે. એટલે કે, આજે બંને પૂર્વ પાસ કન્વીનરોને એક કડવો અનુભવ થયો છે. આંદોલન કરી અને નેતા બની ગયેલા લોકોને હવે રોષનો ભોગ બનવો પડી રહ્યું હોય તેવું લાગી રહ્યું છે.