વિજ્ઞાનને પડકાર / 'કાકા' બન્યા કોયડો ! 61 વર્ષથી આંખનું મટકુંય નથી માંડ્યું તોય તાજા, રાતે કરે છે ચોંકાવનારુ કામ

• થાઈલેન્ડના 80 વર્ષ દાદાની 61 વર્ષથી ઊંઘ ગાયબ
• 18 વર્ષની ઉંમરે તાવ આવ્યો ત્યારથી આજ દિન સુધી નથી સુતા
• આખી રાત દારુ ગાળીને કાઢે છે 

ડોક્ટરોનું માનવું છે કે દરેક વ્યક્તિને લગભગ 7થી 8 કલાકની ઊંઘ લેવી જરૂરી છે. સારી ઊંઘ શરીરને આરામ આપે છે અને વ્યક્તિને તાજગી-સ્ફૂર્તિલાનો અનુભવ કરાવે છે. પરંતુ કેટલાક લોકો ઓછી ઊંઘ લઈને કામ પણ ચલાવે છે. પરંતુ દુનિયામાં તો એક એવો પણ માણસ છે જે ક્યારેક સુતો નથી અને છતાંય જીવે છે, વાત માન્યામાં નહીં આવે પરંતુ સાચી છે. થાઈલેન્ડના મોટી ઉંમરના કાકા છેલ્લા 61 વર્ષથી ઊંઘ્યા નથી. 

18 વર્ષની ઉંમરે તાવ આવ્યો, ત્યારથી આજ દિન સુધી સુતા નથી 
આ વ્યક્તિનું નામ થાઈ એન્ઝોક છે જેમની ઉંમર 80 વર્ષની છે અને 18 વર્ષની ઉંમરે તાવ આવ્યો હતો જે પછી આજ દિન સુધી ક્યારેય પણ સુતા નથી. થાઈએ પ્રખ્યાત યુટ્યુબર ડ્રુ બિન્કીને આપેલા એક ઇન્ટરવ્યુમાં આ વાતનો ખુલાસો કર્યો છે. તેમણે કહ્યું કે 1962થી તેમની ઊંઘ હંમેશ માટે ગાયબ થઈ ગઈ છે. વર્ષોથી તેની પત્ની અને બાળકો સૂતાં હોય છે પણ તેને ઊંઘ આવતી નથી. 80 વર્ષીય એન્ઝોકેએ જણાવ્યું હતું કે તેમને 18 વર્ષની ઉંમરે તાવ હતો અને તે રાત પછી તેઓ ક્યારેય સૂતા ન હતા. 

શું કરે છે રાતે 
એન્ઝોકે કહ્યું કે તે રોજ પથારીમાં સૂઈ જાય છે અને પછી આંખો બંધ કરીને સૂવાનો પ્રયત્ન કરે છે, પરંતુ તેના મનમાં કંઈક ચાલી રહ્યું છે. જેના કારણે તેની ઉંઘ પૂર્ણ થતી નથી. તેણે કહ્યું કે તે હજારો રાત સુધી જાગતો રહ્યો છે. એન્ઝોકે કહ્યું કે તે દારુ ગાળીને રાત કાઢે છે. રાતે લગભગ 3 વાગ્યા સુધી દારુ ગાળવાનું કામ કરે છે અને ત્યાર બાદ બીજું આડુઅવળું કામ કરીને રાત કાઢે છે. તેમણે કહ્યું કે કેટલાક લોકો વિદેશથી આની સચ્ચાઇ જાણવા માટે આવ્યા હતા અને આખી રાત તેમની સાથે રહીને વાસ્તવિકતા જાણવાનો પ્રયાસ પણ કર્યો હતો. તેની સ્થિતિ જાણીને વિદેશીઓને પણ આંચકો લાગ્યો હતો.