બગાસું ખાતા પતાસું મળ્યું / શાકભાજી લેવા ગયેલા શખ્સ પાસે છુટા પૈસા ન હતા તો લોટરી ટિકિટ ખરીદી, બની ગયો કરોડપતિ

• કેરળના રહેવાસી સદાનંદનું ભાગ્ય ચમક્યુ 
• શાક લેવા જતા ખરીદી લોટરીની ટિકિટ 
• થઈ ગયો કરોડોપતિ 

નસીબ પણ લોકો સાથે વિચિત્ર રમત રમે છે. કેટલાક લોકો લોટરી જીતવા માટે કેટલી મહેનત કરે છે છતાં કંઈ થઈ નથી શકતું અને કેટલાક લોકો મજબૂરીમાં લોટરી ખરીદીને કરોડપતિ બની જાય છે. આવું જ કંઈક કેરળના કોટ્ટાયમના રહેવાસી સંદાનંદ સાથે થયું છે. સદાનંદને 500 રૂપિયાના છુટા કરાવવા માટે લોટરીની ટિકિટ ખરીદી હતી અને થોડા કલાકો પછી ખબર પડી કે તે કરોડપતિ બની ગયો છે.

લાગી ગયો જેકપોટ 
હકીકતે સદાનંદન સવારે શાકભાજી લેવા માટે ઘરની બહાર નીકળ્યા હતા. પરંતુ તેમને ખબર ન હતી કે ભાગ્યએ તેમનો દરવાજો ખટખટાવ્યો છે. તેમની પાસે 500 રૂપિયાની નોટ હતી તેના છુટ્ટા કરાવવા માટે તેમણે લોટરીની ટિકિટ ખરીદી. ત્યાર બાદ તેઓ શાકભાજી ખરીદીને ઘરે ગયા. થોડા કલાકો પછી તેમને ખબર પડે છે કે તેમને જેકપોટ લાગી ગયો છે અને તેણે 12 કરોડ રૂપિયા જીત્યા છે.

જો કે સદાનંદ લાંબા સમયથી લોટરીની ટિકિટ ખરીદતા હતા પણ તેમનું ક્યારેય તેમનું નસીબ જાગ્યુ ન હતું. સદાનંદ ઓલીપરામ્બિલ 77 વર્ષના છે અને તેઓ કેરળના કોટ્ટયમના રહેવાસી છે. હાલ કેરળમાં તેઓ ખૂબ ચર્ચામાં છે તેનું કારણ તેમની લોટરીની ટિકિટ છે. સદાનંદ છેલ્લા ઘણા સમયથી લોટરીની ટિકિટ ખરીદે છે પરંતુ આ પહેલીવાર છે જ્યારે તેમને બમ્પર ઇનામ મળ્યું છે. તેણે કેરળ સરકારની ક્રિસમસ ન્યૂ યર લોટરી માટે ટિકિટ ખરીદી હતી.

થોડા કલાકોમાં બની ગયા કરોડપતિ 
સવારે જ્યારે સદાનંદ શાકભાજી લેવા નિકળ્યા ત્યારે તેમની પાસે 500ના છુટ્ટા ન હતા જેના કારણે તેમણે મજબૂરીમાં લોટરી ટિકિટ ખરીદી. તેમણે કહ્યું કે તેમણે એક મીટ શોપ પર જઈને નોટના છુટા કરાવવાનો પ્રયત્ન કર્યો હતો અને જ્યારે ત્યાં છુટા ન મળ્યા તો તેમણે લોટરીની ટિકિટ ખરીદી અને જ્યારે પરિણામ આવ્યું તો તે દંગ રહી ગયો. તેને વિશ્વાસ ન હતો કે તે હવે કરોડપતિ બની ગયો છે. રિપોર્ટ અનુસાર, આવકવેરા બાદ સદાનંદને લગભગ 7.39 કરોડ રૂપિયા મળશે.