રાજ્ય પોલીસ બેડામાં ફરજ બજાવતા વધુ 33 પોલીસ ઇન્સ્પેકટરની બદલીના ઓર્ડર ફાટ્યા છે.
33 પોલીસ ઇન્સ્પેકટરની તાબડતોબ બદલી
પોલીસ વડા આશિષ ભાટિયાએ કર્યા આદેશ જારી
ગત એપ્રિલ માસમાં કરાયા હતા પોલીસ આલમમાં મોટા બદલાવ
ગુજરાત પોલીસ વિભાગમાં બદલીનો દૌર યથાવત રહેવા પામ્યો છે. ગુજરાત વિધાનસભાની ચૂંટણીના આગમનને પગલે રાજ્યનાં પોલીસ વડા આશિષ ભાટિયાએ આદેશ જારી કરી 33 પોલીસ ઇન્સ્પેકટરની તાબડતોબ બદલી કરી અન્ય જગ્યાએ ફરજ સોંપી છે. અત્રે ઉલ્લેખનિય છે કે, ગત એપ્રિલ માસમાં રાજ્યના પોલીસ વિભાગમાં મોટા પ્રમાણમાં બદલી કરવામાં આવ્યા બાદ ફરી રાજ્યમાં પોલીસ આલમમાં બદલીનો સળવળાટ ઉપડ્યો છે.
33 બિન હથિયારી પોલીસ ઇન્સ્પેકટરની બદલીનો ઘણવો કઢાયો
જેમ- જેમ ગુજરાતમાં વિધાનસભાની ચૂંટણી નજીક આવી રહી છે તેમ સરકારના પોલીસ વિભાગ ઉપરાંત વહીવટી માળખામા ધરખમ ફેરફાર કરવામાં આવી રહ્યા છે. તેવા સંજોગો વચ્ચે આજે વહીવટી કારણોસર 33 બિન હથિયારી પોલીસ ઇન્સ્પેકટરની બદલીનો ઘણવો કાઢવામાં આવ્યો છે. રાજ્યનાં પોલીસ વડા આશિષ ભાટિયા દ્વારા કરાયેલા આદેશમાં જાહેર કરાયેલ વિગત અનુસાર એસીબીના જે.કે.ડાંગરને અમદાવાદ શહેરમાં ફરજ સોંપવામાં આવી છે. વધુમાં કચ્છ પૂર્વ ગાંધીધામમાં ફરજ બજાવતા પી.એન. ઝીંઝુવાડિયાને અમદાવાદ ગ્રામ્યમાં ફરજ સોંપાઈ છે. આ ઉપરાંત એસીબીના જે.આર.ઝાલાને પણ અમદાવાદ ગ્રામ્યમાં મુકાયા છે. તેજ રીતે સુરત શહેરમાં ફરજ બજાવતા એમ.વી.પટેલને અમદાવાદ શહેરમાં મુકાયા છે. આમ કુલ 33 પોલીસ ઇન્સ્પેકટરની અલગ અલગ સ્થળોએ ફરજ સોંપવામાં આવી છે.
એપ્રિલ માસમાં પોલીસ આલમમાં કરાયા હતા મોટા પાયે બદલાવ
નોંધનીય છે કે એપ્રિલ માસમાં રાજ્યના પોલીસ આલમમાં મોટા પાયે બદલાવ કરવામાં આવ્યા હતા. જે તે સમયગાળા દરમિયાન ગુજરાતના DGPએ તાત્કાલિક ઓર્ડર કરી અલગ અલગ જિલ્લાના 43 પોલીસ ઇન્સ્પેક્ટરોને ટ્રાન્સફર કરી દીધા હતા. મહત્વનું છે કે આ બદલી એ PI માટે કરવામાં આવી હતી જે સતત 3 વર્ષ કે તેથી વધુ તે જિલ્લામાં ફરજ બજાવતા હતા કે પછી જાહેરહિતના અર્થે તેમની બદલી કરાઈ હતી. તથા ગત 1 એપ્રિલના રોજ 88 PIની બદલી કરવામાં આવી હતી. ત્યારબાદ વધુ 33 પોલીસ ઇન્સ્પેકટર બદલી કરી દેવામાં આવી છે.