T 20 World Cup 2021 / મહામુકાબલોઃ આવતી કાલે દુનિયાને મળશે નવો ટી-20 વર્લ્ડકપ ચેમ્પિયન

• આવતીકાલે વિશ્વને મળશે નવો ટી-20 વર્લ્ડ કપ ચેમ્પિયન
• દુબઈમાં ઓસ્ટ્રેલિયા અને ન્યૂઝીલેન્ડ વચ્ચે ખિતાબી જંગ રમાશે
• શું કિવી ટીમ નવો ઈતિહાસ લખી શકશે કે કેમ ?

આવતીકાલે ૧૪ નવેમ્બરે દુબઈ ઇન્ટરનેશનલ ક્રિકેટ સ્ટેડિયમમાં ઓસ્ટ્રેલિયા અને ન્યૂઝીલેન્ડ વચ્ચે ખિતાબી જંગ રમાશે. બંને ટીમે આ પહેલાં ક્યારેય પણ ટી-૨૦ વિશ્વકપ ટ્રોફી જીતી નથી. આથી દુનિયાને નવો ટી-20 વર્લ્ડકપ વિજેતા મળવાનો છે.

પાકિસ્તાની ચાહકોને નિરાશા જ હાથ લાગી

અગાઉ બીજી સેમિફાઇનલ માટે દુબઈનું સ્ટેડિયમ પાકિસ્તાની સમર્થકોથી ખીચોખીચ ભરેલું હતું, પરંતુ પાકિસ્તાની ચાહકોને નિરાશા જ હાથ લાગી હતી, કારણ કે મેથ્યુ વેડે ૧૭ બોલમાં અણનમ ૪૧ રનની વિસ્ફોટક ઇનિંગ્સ રમીને ઓસ્ટ્રેલિયન ટીમને છ બોલ બાકી હતા ત્યારે જીત અપાવી દીધી હતી. આ સાથે જ પાકિસ્તાનની સફર આ મેગા ઇવેન્ટમાં સમાપ્ત થઈ ગઈ. પાકિસ્તાનની ટીમ ટી-૨૦ વિશ્વકપનો ખિતાબ ૨૦૦૯માં જીતી ચૂકી છે.

આવતીકાલના મુકાબલા પર ક્રિકેટ ચાહકોની નજર

આવતી કાલે રમાનારા આ મહામુકાબલા પર દુનિયાભરના ક્રિકેટ ચાહકોની નજર છે. આ ઉપરાંત ફેન્સને એ વાતનો પણ ઇંતેજાર છે કે શું કિવી ટીમ નવો ઇતિહાસ લખી શકશે કે કેમ? કારણ કે આવું પહેલી વાર નથી જ્યારે ન્યૂઝીલેન્ડનો સામનો ઓસ્ટ્રેલિયા સામે આઇસીસી ટૂર્નામેન્ટની ફાઇનલમાં થઈ રહ્યો હોય. આ પહેલાં આ બંને ટીમ વર્ષ 2009માં ચેમ્પિયન્સ ટ્રોફીની ફાઇનલમાં અને ત્યાર બાદ વર્ષ ૨૦૧૫ના વન ડે વર્લ્ડકપની ફાઇનલમાં એકબીજા સામે ટકરાઈ ચૂકી છે, પરંતુ બંને વાર કિવી ટીમને હારનો સામનો કરવો પડ્યો છે.

શું ન્યૂઝીલેન્ડની ટીમ આ વખતે નવો ઇતિહાસ રચી શકશે?

આ બે ફાઇનલ મુકાબલા ઉપરાંત ઓસ્ટ્રેલિયા અને ન્યૂઝીલેન્ડની ટક્કર એ પહેલાં પણ થઈ ચૂકી છે, પરંતુ એ બંને વાર વિજય તો ઓસ્ટ્રેલિયન ટીમનો જ થયો છે. ૧૯૯૬ના વર્લ્ડકપમાં પણ ન્યૂઝીલેન્ડની ટીમને ઓસ્ટ્રેલિયાએ હરાવી હતી, જ્યારે ૨૦૦૬ ચેમ્પિયન્સ ટ્રોફીમાં પણ કિવી ટીમને હારનો સામનો કરવો પડ્યો હતો એટલે કે આ બંને ટીમ આઇસીસી ટૂર્નામેન્ટની નોકઆઉટ મેચમાં અત્યાર સુધીમાં કુલ ચાર વાર ટકરાઈ છે અને દરેક વખતે ન્યૂઝીલેન્ડની ટીમને હારનો સામનો કરવો પડ્યો છે. વર્ષ ૧૯૯૬, ૨૦૦૬, ૨૦૦૯ અને ૨૦૧૫ બાદ ફરી એક વાર ૨૦૨૧માં આ બંને ટીમ એકબીજા સામે આઇસીસી ટૂર્નામેન્ટમાં ટકરાવાની છે ત્યારે શું ન્યૂઝીલેન્ડની ટીમ આ વખતે નવો ઇતિહાસ લખી શકશે ખરી? ઉલ્લેખનીય છે કે પ્રથમ સેમિફાઇનલમાં ન્યૂઝીલેન્ડની ટીમે ઈંગ્લેન્ડને હરાવીને ફાઇનલની ટિકિટ કન્ફર્મ કરી હતી.